ⵉⵥⵍⵉ ⵅ ⵉⵥⵍⴰⵏ 5

1 “ⵏⴻⵛⵛ ⵓⵙⵉⵖ-ⴷⴷ ⵖⴰⵔ ⵡⴻⵃⵡⵉⵛ ⵉⵏⵓ, ⴰ ⵓⵍⵜⵎⴰ, ⴰ ⵜⴰⵙⵍⵉⵜ ⵉⵏⵓ, ⵍⴻⵇⴹⴻⵖ ⵎⵉⵔⵔⵓ ⵉⵏⵓ ⴰⴽ-ⴷ ⴱⴰⵍⵙⴰⵎ. ⵉⵏⵓ, ⵛⵛⵉⵖ ⴰⵖⵔⵓⵎ ⵏ ⵜⵣⵉⵣⵡⴰ ⴰⴽ-ⴷ ⵜⴰⵎⵎⴻⵏⵜ ⵉⵏⵓ, ⵙⵡⵉⵖ ⴱⵉⵏⵓ ⵉⵏⵓ ⴷ ⵓⵖⵉ ⵉⵏⵓ. ⵉⵎⴻⴷⴷⵓⴽⴽⴰⵍ, ⴻⵛⵛⴻⵎ, ⵙⵡⴻⵎ, ⵙⵛⴰⵔⴻⵎ, ⴰ ⵉⵎⵄⵉⵣⵣⴻⵏ!” ⵜⴰⵙⵍⵉⵜ ⵜⵣⴻⵀⵣⴰ ⴰⴷ ⵜⴰⵔⵣⴻⵎ ⵉ ⵢⴻⵙⵍⵉ 2 “ⵏⴻⵛⵛ ⵟⵟⵙⴻⵖ, ⵎⴰⵛⴰ ⵓⵍ ⵉⵏⵓ ⵉⴼⴰⵇ. ⴰⵇⴰ ⴷⴰ ⵜⵎⵉⵊⵊⴰ ⵏ ⵍⵍⵉⴼ ⵉⵏⵓ, ⵡⴻⵏⵏⵉ ⵉⵙⵙⵇⴰⵔⵇⴱⴻⵏ: ‘ⴰⵔⵣⴻⵎ ⴰⵢⵉ, ⴰ ⵓⵍⵜⵎⴰ, ⵜⴰⵎⴻⴷⴷⵓⴽⴽⴻⵍⵜ ⵉⵏⵓ, ⵜⴰⴷⴱⵉⵔⵜ ⵉⵏⵓ, ⴰ ⴽⵓⵍⵛⵉ ⵉⵏⵓ, ⵎⴰⵖⴰⵔ ⴰⵣⴻⴵⵉⴼ ⵉⵏⵓ ⵉⵛⵛⵓⵔ ⵙ ⵏⵏⴷⴰ, ⵉⵎⵓⵣⴰⵔⴻⵏ ⵉⵏⵓ ⵛⵛⵓⵔⴻⵏ ⵙ ⵜⵓⴷⴷⵉⵎⵉⵏ ⵏ ⴵⵉⵍⴻⵜ!’ 3 ⴰⵇⴰ ⴽⴽⵙⴻⵖ ⴰⵔⵔⵓⴹ ⵉⵏⵓ, ⵎⴰⵎⵎⴻⵛ ⵉ ⵜ ⵖⴰ ⵢⴰⵔⴹⴻⵖ ⵄⴰⵡⴻⴷ? ⵉⴹⴰⵔⴻⵏ ⵙⵙⵉⵔⴷⴻⵖ ⵜⴻⵏ, ⵎⴰ ⴰⴷ ⵜⴻⵏ ⵙⵙⵅⴻⵎⵊⴻⵖ ⵄⴰⵡⴻⴷ? 4 ⵍⵍⵉⴼ ⵉⵏⵓ ⵉⵙⵙⴻⴽⴽ-ⴷⴷ ⴰⴼⵓⵙ ⵏⵏⴻⵙ ⵣⴻⴳ ⵓⵏⵓⵇⵇⵉⴱ ⵏ ⵜⴻⵡⵡⴰⵔⵜ, ⵓⵛⴰ ⵉⵏⵀⴻⵣⵣ ⵡⵓⵍ ⵉⵏⵓ ⵣⵣⴰⵢⴻⵙ. 5 ⵏⴻⵛⵛ ⴱⴻⴷⴷⴻⵖ ⵃⵉⵎⴰ ⴰⴷ ⴰⵔⵣⵎⴻⵖ ⵉ ⵍⵍⵉⴼ ⵉⵏⵓ, ⵉⴼⴰⵙⵙⴻⵏ ⵉⵏⵓ ⵓⴷⵓⵎⴻⵏ ⵙ ⵎⵉⵔⵔⵓ, ⵣⴻⴳ ⵉⴹⴻⵡⴹⴰⵏ ⵉⵏⵓ ⵉⵙⵙⵉⵣⵣⴻⵍ ⵎⵉⵔⵔⵓ ⵅ ⵉⴼⴰⵙⵙⴻⵏ ⵏ ⵣⵣⴻⴽⵔⵓⵏ. 6 ⵏⴻⵛⵛ ⴰⵔⵣⵎⴻⵖ ⵉ ⵍⵍⵉⴼ ⵉⵏⵓ, ⵎⴰⵛⴰ ⵍⵍⵉⴼ ⵉⵏⵓ ⵜⵓⵖⴰ ⵢⵓⵢⵓⵔ, ⵉⵄⴷⵓ. ⵉⴼⴼⴻⵖ ⵍⴻⵄⵎⴰⵔ ⵉⵏⵓ ⵓⵎⵉ ⵜⵓⵖⴰ ⵉⵙⵙⴰⵡⴰⵍ! ⵏⴻⵛⵛ ⴰⵔⵣⵓⵖ ⵅⴰⵙ, ⵎⴰⵛⴰ ⵡⴰⵔ ⵜ ⵓⴼⵉⵖ. ⵏⴻⵛⵛ ⵍⴰⵖⵉⵖ ⴰⵙ, ⵏⴻⵜⵜⴰ ⵡⴰⵔ ⵅⴰⴼⵉ ⴷⴷ-ⵢⴰⵔⵔⵉ. 7 ⵓⴼⵉⵏ ⴰⵢⵉ ⵉⵄⴻⵙⵙⴰⵙⴻⵏ ⵖⴰⵔ ⵡⴻⵏⵏⴻⴹ ⵏⵙⴻⵏ ⴷⵉ ⵜⴻⵏⴷⵉⵏⵜ, ⵏⵉⵜⵏⵉ ⵡⵜⵉⵏ ⴰⵢⵉ, ⵢⴻⵣⵎⴻⵏ ⴰⵢⵉ, ⴰⵇⴻⵏⴷⵓⵔ ⵉⵏⵓ ⴽⴽⵙⴻⵏ ⴰⵢⵉ ⵜ ⵉⵄⴻⵙⵙⴰⵙⴻⵏ ⵏ ⵍⴻⵃⵢⵓⴹ.” ⵉⵣⵍⵉ ⵏ ⵜⴻⵙⵍⵉⵜ ⴰⴽ-ⴷ ⵢⴻⵙⵙⵉⵙ ⵏ ⵓⵔⵛⴰⵍⵉⵎ 8 “ⵏⴻⵛⵛ ⴰⴷ ⴽⴻⵏⵏⵉⵏⵜ ⵙⵙⵊⴰⴵⴰⵖ, ⴰ ⵢⴻⵙⵙⵉⵙ ⵏ ⵓⵔⵛⴰⵍⵉⵎ, ⵎⴰⵍⴰ ⴽⴻⵏⵏⵉⵏⵜ ⵜⵓⴼⵉⵏⵜ ⵍⵍⵉⴼ ⵉⵏⵓ, ⵎⵉⵏ ⴷ ⴰⵙ ⵖⴰ ⵜⵉⵏⵉⵏⵜ? ⴰⵇⴰ ⵜⴻⵙⵙⴻⵃⵍⴻⵛ ⴰⵢⵉ ⵜⴰⵢⵔⵉ." 9 “ⵎⵉⵏ ⵖⴰⵔⴻⵙ ⵖⴰⵔ ⵍⵍⵉⴼ ⵏⵏⴻⵎ ⴽⵜⴰⵔ ⵅ ⵍⵍⵉⴼ ⵏⵏⴻⵖⵏⵉ, ⴰ ⵛⴻⵎ ⵉ ⴷⵉ ⵉⴵⴰ ⵡⴰⵥⵔⵉ ⵇⴰⵄ ⵣⵉ ⵜⴻⵎⵖⴰⵔⵉⵏ? ⵎⵉⵏ ⵖⴰⵔⴻⵙ ⵖⴰⵔ ⵍⵍⵉⴼ ⵏⵏⴻⵎ ⴽⵜⴰⵔ ⵅ ⵉⵏⵏⴻⵖⵏⵉ, ⴰⵇⴰ ⵛⴻⵎ ⴰⵎⵎⵓ ⵉ ⴷ ⴰⵏⴻⵖ ⵜᵉⵙⵙⵊⴰⴵⴰⴷ?" 10 “ⵍⵍⵉⴼ ⵉⵏⵓ ⴷ ⴰⵛⴻⵎⵍⴰⵍ ⵉⵜⵜⵉⵙⵙⵉⵇⴻⵏ ⴷ ⴰⵣⴻⴳⴳⵯⴰⵖ ⴰⵎ ⵉⴷⴰⵎⵎⴻⵏ, ⵉⵜⵜⴱⴰⵏ ⴰⵎ ⵓⴱⴰⵏⴷⵓ ⵙⴻⵏⵏⴻⵊ ⵅ ⵄⴻⵛⵔⴰ ⵏ ⵍⵓⵍⵓⴼ. 11 ⴰⵣⴻⴵⵉⴼ ⵏⵏⴻⵙ ⴷ ⵓⵔⴻⵖ ⵉⵇⵇⵓⵔ ⵉⵚⴼⴰⵏ, ⵉⵎⵓⵣⴰⵔⴻⵏ ⵏ ⵓⵛⵓⵡⵡⴰⴼ ⵏⵏⴻⵙ ⴷ ⵜⵉⵡⵔⵉⵔⵉⵏ ⵉⵜⵜⴻⴳⴳⴻⵏ ⴰⵎ ⵍⴻⵎⵡⴰⵊ, ⴷ ⵉⴱⴰⵔⵛⴰⵏⴻⵏ ⴰⵎ ⵢⵉⴱⴰⵖⵍⵉⵡⴻⵏ. 12 ⵜⵉⵟⵟⴰⵡⵉⵏ ⵏⵏⴻⵙ ⴳⴳⵉⵏⵜ ⴰⵎ ⵜⴻⴷⴱⵉⵔⵉⵏ ⵖⴰⵔ ⵜⵙⴻⴵⵢⴰⵡⵉⵏ ⵏ ⵡⴰⵎⴰⵏ, ⵄⵓⵎⵎⴻⵏⵜ ⴷⴻⴳ ⵓⵖⵉ, ⵇⵇⵉⵎⴻⵏⵜ ⴷⵉ ⵜⵛⵓⵢⴰⵔ ⵏⵙⴻⵏ ⴰⵎ ⵉⵥⵔⴰ ⵉⵖⵍⴰⵏ. 13 ⵉⵎⴻⴳⴳⵉⵣⴻⵏ ⵏⵏⴻⵙ ⴳⴳⵉⵏ ⴰⵎ ⵢⵉⵃⵡⵉⵛⴻⵏ ⵏ ⵍⴻⵄⵟⵓⵔ, ⵛⵛⵓⵔⴻⵏ ⵙ ⵍⴻⵄⵛⵓⴱ ⵉⵜⵜⴼⵓⵃⴻⵏ, ⵉⵢⴻⵏⵛⵉⵛⴻⵏ ⵏⵏⴻⵙ ⴰⵎ ⵜⵍⵉⵍⵍⵉⵛⵉⵏ, ⵜⵜⵓⴷⵓⵎⴻⵏ ⵙ ⵎⵉⵔⵔⵓ ⵉⴼⴻⵙⵢⴻⵏ. 14 ⵉⵖⴰⴵⴻⵏ ⵏⵏⴻⵙ ⴰⵎ ⵢⵉⵇⴻⴹⴱⴰⵏ ⵏ ⵡⵓⵔⴻⵖ, ⵄⴻⵎⵎⴰⵔⴻⵏⵜ ⵙ ⵉⵥⵔⴰ ⵏ ⵜⴻⵅⵔⵉⵙⵓⵍⵉⵜ, ⴰⵄⴻⴷⴷⵉⵙ ⵏⵏⴻⵙ ⵉⴳⴳⴰ ⴰⵎ ⵍⵄⴰⵊ ⵉⵜⵜⵉⵙⵙⵉⵇⴻⵏ, ⵍⴻⵃⵃⴼⴻⵏ ⵜ ⵙ ⵜⵢⴰⵇⵓⵜⵉⵏ ⵏ ⵚⴰⴼⴼⵉⵔ. 15 ⵉⵎⴻⵙⴹⴰⵏ ⵏⵏⴻⵙ ⴷ ⵉⴱⵉⵍⴰⵔⴻⵏ ⵏ ⵍⵎⴰⵔⵎⵓⵔ, ⵅ ⴷⵙⵓⵙⴰ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ. ⵉⴱⴰⵏ-ⴷⴷ ⵏⴻⵜⵜⴰ ⴰⵎ ⵍⵓⴱⵏⴰⵏ, ⵉⵜⵜⵡⴰⴼⴰⵔⵣ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ. 16 ⴰⵏⴻⵖ ⵏⵏⴻⵙ ⵉⵛⵛⵓⵔ ⵙ ⵜⴰⵥⵢⵓⴷⵉ, ⵎⴰⵔⵔⴰ ⵉ ⵖⴰⵔⴻⵙ ⵉⵛⵓⵡⵡⴰⵔ. ⵡⴰ ⴷ ⵍⵍⵉⴼ ⵉⵏⵓ, ⵡⴰ ⴷ ⴰⵎⴻⴷⴷⵓⴽⴽⴻⵍ ⵉⵏⵓ, ⴰ ⴽⴻⵏⵏⵉⵏⵜ ⵢⴻⵙⵙⵉⵙ ⵏ ⵓⵔⵛⴰⵍⵉⵎ!"