Sam 142

1 Tepa va ululae la si rau koe Zihova, koasa mamalaiṉiqu si tepatepa la si rau koa Sa. 2 Tozi beto la nia rau koa Sa sari doduru gua pu lopu qetu ni rau. Tozi beto lani rau koa Sa sari doduru qua tinasuna. 3 Pana malohoro si rau, si gilania Sa gua sapu garo koa rau pude tavetia. Vasina ene gua rau, si vekoa rina qua kana si keke sipata pude va mate au. 4 Totoso liṉana varikali si rau, si loke tie si koa pude toka nau, na lavelave nau, meke loke tie si hite tataru nau. 5 Kei Zihova, tepa va ululae atu si rau pude toka nau, Agoi Zihova mo sa qua lave, Agoi mo si hiva Nigo rau pa doduruna sa qua tinoa hiera. 6 Mu va avosia sa qua tinepatepa, ura na lodu mate si rau pa tinalotaṉa. Mu harupu au koari na qua kana, ura na ṉiṉira hola nau rini si arau. 7 Mu rupaha au pa qua tinasuna, meke kaqu vahesigo rau pa varikorapadi Mua kobi tinoni, sina koa gua koasa Mua lineana koa rau.