2 Korenta 8
WBT1 Ɓaah ci, ɓoo waaɗ ɗu woo baahohi Kooh baahoh Janguucaŋ Maseduwaan.
2 Na ini ɓa nikee ŋ miskiɗ jen, ɓa sumiɗ keeh-keeh. Te na ñaki miskiɗi ɓa ñakee jen, ɓa teeɓohiɗ waaɗ onoh keeh-keeh.
3 Ŋ miniɗa seede, ɓa eɗohiɗ ini ɓa minee eɗoh, ini uupa sah te ɓa tuma na keeñ moɗiɗ.
4 Ɓa kiim kiim ɓoo keeh-keeh ne ɓa min ɓaah ŋ ɓi na hee kaɓɗohe ɓaatɗoh wuu kosiɗ ci nik ŋ Yerusalem.
5 Ŋ waaɗ-waaɗiŋ Kooh, ɓa eɗoh haf ɓa ŋ Heɗi paaɗ, ɓa nammba eɗoh haf ɓa nga ɓoo. Ineem uupiɗ ini ɓoo sekee nga ɓa.
6 Ineem weɗ tah, ɓoo ñaahha Tit ne a ɗiindoh nangɗohiŋ in ci ɗu onoh ŋ ndeem findi a cambohee wa, pangkiŋ ɗu moɗiɗ lool.
7 Findi ɗu riifoh ŋ in ci jen, ŋ kos, na min woo, na inah in ciŋ Kooh, na tokɗuk ŋ in nu nik, na waaɗohi ɓoo yun nga ɗu, ndengɗukohaat ɗaa ŋ ini kaɗ ŋ onohi.
8 Nikɗi haa ne ɗu joya joy tum, waaye mi na woyee ɗu rek findi ɓinooɓi tokɗukoh, ne ŋ hotoot ne waaɗi ɗu waaɗ ɓooɓi, wa waaɗoh keeh-keeh.
9 Ɗu inhiɗ findi Heɗ ɓoo Yeesu Kiristaa baahohoh ɓoo, a yi raakee, a nikka ñakiɗ wuu ɗu, ne ɗu min raak, sagu ñaki a ñak.
10 Wa waas ne ŋ woo ini ŋ liiɓ nga, laam yukma, e ɗu koc nangɗoh kopor ɓaatɗohoha ɓinooɓi, te a ɗu aduka waaɗ tum.
11 Kon ɗiski wa nik, ɗiindohaat ineem. Ɗiindohaata na ini ɗu min tum, findi ɗu waaɗohee wa tum.
12 Laam waaɗ tum nik nga ɗah, Kooh teyɗuk, a na marke ŋ ini fu raak, a marakɗi ŋ ini fu raakɗi.
13 Nikɗi haa ne e ɗu joy deguk miskiɗ ne ɗu eɗfiɗ ɓinooɓi, waaye ɓooɓi jen joy joy hend.
14 Woti, ɗu raakiɗ po ɗu gaacaacɗiɗ kon ɗu miniɗ ɓa ɓaatɗoh ŋ ñakiŋ ɓa ; kim, ɗu nam ñak te wa raak ɓa gaacaacɗiɗ ɗah, ɓa ɓaatɗoh ɗu, jaar ɗu jen ɗu hendiɗ.
15 Wa hun na ini Fiis ci woo an : « Ɓa ɓayee juuk uupɗeeɗi te ɓa ɓayee ƴissuut mitɗeen. »
16 Ɓoo ɓii corkiɗ Kooh ŋ tokɗuki a tum ŋ keeñiŋ Tit wuu ɗu. Tokɗukeem weɗ wi a tum ŋ keeñ ciŋ ɓoo.
17 A teyɗukiɗ hay ɗiskiŋ ɗu findi ɓoo woyohee ɗe wa, wa raak ɗe sah sawriɗ nga keeh-keeh.
18 Ɓoo tuuƴndohiɗ na ɗe ɓaah ɓoo yi fu inah ne Janguuci jen na woye in moɗiɗ nga ɗe sagu pangkiŋ ɗe ŋ Yegɗohiŋ Muci.
19 Te sah a yi Janguuci kooɗ ne a ɓend ɓoo ne ɓoo ɓayee ɓaatɗohi ɗah. Ɓoo heya tume yakɗoha Heɗi, wa nam teeɓoh waaɗi ɓoo waaɗa tum.
20 Ɓoo na tumohe ɗaa ne ali ɓo' raakuu woyaah ŋ findi ɓoo na taambkohe ɓaatɗohi laayiɗi nangɗohu.
21 Ɓoo na waaɗe tum in lakiɗ waas, ŋ fiki Heɗi dong haa, waaye na fiki ɓooɓi.
22 Ɓoo namiɗ tuuƴndoh ŋ ɓi na haye, ɓaah ɓoo yi fu inah ne ɓoo markiskiɗ ɗe waas laayiɗ ŋ findi a tokɗukoh, te waasii a uup nga sawar sagu oolki a ooluk ɗu.
23 Ini kaɗ ŋ Tit, a mi na ɗe na pangke, e ɓoo ɓaah pangki wuu ɗu. Waaye ɓaah ciŋ ɓoo ɓinooɓi, e Janguuci tuuƴ ɓa, e yakiɗ Kiristaani tah ɓa kuruk.
24 Kon teeɓaat ɓa ne ɗu waaɗiɗ ɓa, ɗu tuma ɗah, ɓooɓiŋ Janguuci hey inhe ineem, wa teeɓoh ne wa waas, ɓoo ndamkohee ɗu.