Ɓi Kolos 2
WBT1 Ŋ waaɗiɗ ne ɗu inah hiñohi yakki mi na hiñohe wuu ɓi moosɗi so hotoh jen, findiiɗu na ɓi Lawdise.
2 Mi na hiñohe ne ɗu ɓaat kaañ, ɗu nik yino taamboh ŋ waaɗoh. Ŋ ineem, ɗu riif tem na inhi wooriɗi wi ñaañ keeh-keeh na onohe, ɗu inah ini ɗasɗukiɗiŋ Kooh, maanaam Kiristaani,
3 laam raak-raaki nik ngaŋ liiɓohaaɗ moɗiɗ na inah jen ɗasɗuk nga ɗe.
4 Mi na woye ineem ne ali ɓo' ñaañohuu ɗu na woo ci na kulɓa'kohe keeh.
5 Ali nik ne mi na faan ndo, ŋ nikɗi na ɗu, liiɓiŋ ngo wii nga ɗu, mi yii hot niki ɗu nik moɗoɗ na ndengi ɗu ndeng ngaŋ kosi ɗu kos Kiristaani, te ŋ sumiɗ nga.
6 Ŋ ineem, ɗu teyɗukiɗ Kiristaani Yeesu findi Heɗi, mbaa ɗah, raakaat tumohaaɗ huniɗ na ɗe.
7 Faɗaat Kooh a jimb ɗu baahiɗ, a taɓah kipes kiŋ ɗu nga ɗe, a ɓaat ɗu ndengiɗ ŋ kosi, wa hun na in ci ɗu jangɗu, te ɗu corkiɗee Kooh keeh-keeh.
8 Wortukaat po ali ɓo' kinaat ɗu ñaañoh na liiɓohaaɗ moɗiɗ puloh ŋ Adina, na lee ci raakɗi haf na kose, ci gaƴuk ŋ mbaah ciŋ ɓo' ci na in ci na tiindɗe Adina waaye ŋ Kiristaani haa.
9 Laam, ini nik ŋ Kooh jen gen ŋ faaniŋ Kiristaani ;
10 te ɗu riifiɗ tem na kipes kiŋ Kiristaani, a yi nik ŋ ɗafuk ki'adug nu nik na kikilifa nu nik.
11 Ŋ niki ɗu nik nga ɗe, ɗu nguɗkiɗ sah, nguɗki yaah ɓo' haɓiɗɗi. Nguɗkeem puloh ŋ Kiristaani, weɗ ne a nihis faani na taambɗe waaɗ-waaɗiŋ kiñin ki.
12 Findi ɗu ambsukoh na ɗe, ɗu uumbuusa wa ɗu ɓoktu, ɗu nam hultoh ɗaa na ɗe taamboh ŋ kosi ɗu kos hatiliŋ Kooh, yi hultiɗ ɗe.
13 Ɗu ɓi nikee ɓo' kaaniɗ sagu ɗal ciŋ ɗu na ini ɗu nikeeɗi Yawuut, Kooh ambsohiɗ ɗu na ɗe, a onnda ɗu kipes ŋ ɗaasi a ɗaas ɓoo ɗal ciŋ ɓoo jen.
14 Kayti ɗal ciŋ ɓoo fiisohse, wi atte'ee ɓoo tooñ sagu nakoh ciŋ waasi, a moosiɗa ; a nihsiɗa ŋ daaƴi a daaƴa ŋ kurwaana.
15 A naafiɗ ganaay ciŋ adgoh ci nik ŋ ɗafki na kilifaaci nik nga ; a winnja ɓa ŋ fiki ɓooɓi jen, a saahha ɓa taamboh ŋ kurwaana.
16 Mbaa, ali ɓo' kinaat ɗu atte sagu in ci ɗu na ñame wala ane, wala ini kaɗ ŋ feet ci, wala ŋ in ci na haɓɗasse ne caɓni pul ɗah wala mbehi na iɗsiɗkohse.
17 In ceem jen ca saangniŋ in ci joyee hay, waaye ci joyee hay keeh-keeh, ca in ciŋ Kiristaani.
18 Ɓooɓi na neɓse ŋ ƴissuutiɗ haf ɓa, ɓi na ñaamke malaakaaci, kinaat ɓa faɗ ɓa rokee aafiŋ ɗu ; ɓooɓeem, ɓa liiɓ haa ne ɓa inhiɗ, sagu in ci hayɗoh ɓa haa heeƴ, ɓa hotsiɗkiɗ ŋ ɓarang ɓarang sagu liiɓohaaɗ ciŋ ɓa te ɓa ɓo' dong.
19 Ɓa ŋoɗisɗi ŋ Kiristaani, yi hafi te moona hafi tah po faani jen pesee, ambsukohha taamboh ŋ pok ci na sir ci ndengiɗa, jaar wa hooɗee hooɗi puloh ŋ Kooh.
20 Ɗu kaaniɗ na Kiristaani ŋ ini kaɗ ŋ in ci na tiindɗe Adina, mbaa wa ye tah ɗu pesee po haa ɗu ɓii ŋ Adina, ɗu teyɗukee degu ɓi sangoh, findi cii :
21 « Kina ɓay, kina ƴooh, kina laal... »
22 In ci sangohu ndii jen, ca ñamu rek ɗah, ca na raakisseeɗi njiriñ ! Ca nakoh na jangɗoh ci puloh ŋ ɓo' dong.
23 Wa keeh ne ca mand na liiɓohaaɗ moɗiɗ, findi ɓooɓi na taambɗe waas-Koohi ɓa feroot, wa hun na ruhsiɗ haf fu na torhiɗ haf fu ; waaye in ceem raakɗi ali njiriñ ɗal tum ini neɓ kiñin ciŋ ɗu.