Ɓi Galaat 1
WBT1 Mi yii kañiɗ ɗu, ɗu ɓi Janguuciŋ Galaat, ñam Pool, Apootari ɓo' woosɗi, yi ɓo' tufkiɗɗi, waaye a Yeesu Kiristaa na Kooh Baabi woos so, Kooh yi hultiɗ ɗe. Mi na ɓaah ciŋ ɓoo kosiɗ ci nik na so jen, ɓoo ɓii kañiɗ ɗu.
3 Kooh Baabiŋ ɓoo, baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !
4 Yeesu Kiristaa, a yi eɗoh haf ce wuu bakaaɗ ciŋ ɓoo, ne a puliɗ ɓoo ŋ adinaani baahaaɗiinii, te weɗ ini Kooh Baabiŋ ɓoo waaɗ,
5 Kooh yi yakɗaah po faw ! Amiin !
6 Ŋ feyuuɗ lool ŋ ini ɗu na are eɗ finho Yi ɓeeɗuk ɗu ngaŋ baahohiŋ Kiristaani, po ɗu kee taambɗa "yegɗoh muc" wiiriis.
7 Keeh-keeh, yegɗoh muc wiiriis raakɗi. Raak ɓooɓi na yahrohe liiɓ ciŋ ɗu, ɓa waaɗ ɓoƴsoh Yegɗohiŋ Muci, wi kaɗ ŋ Kiristaani.
8 Waaye ali ɓo' nga ɓoo wala malaaka puloh Eel ci sah woo ɗu yegɗoh muc wiiriis, ɗalohiɗ na wi ɓoo woo ɗu ɗah, a alku'aat !
9 Ɓoo woyeena, te mi yii woyisa : Ɓo' woo ɗu yegɗoh muc ɗalohiɗ na wi ɗu rahas ɗah, a alku'aat !
10 Andi mi na waake ne ɓooɓi neɓu nga so ? Wala mi na waake ne Kooh neɓu nga so ? Andi mi na waake ini neɓ ɓooɓi ? Ŋ waakeen ini neɓ ɓooɓi poyi ɗah, ŋ heeɗi nike ñaamiŋ Kiristaani.
11 Ɓaah ciŋ ngo, mi yii inhiɗ ɗu ne Yegɗohiŋ Muci ŋ yegɗoh, wa liiɓ ɓo' haa,
12 mi ŋ haf fo ŋ rahsohɗi wa ŋ ɓo' te ɓo' jangiɗɗi so wa, waaye Yeesu Kiristaa a yi teeɓ po wa.
13 Ɗu kerhiɗ findi ŋ mandee ɗeɓgaan, wa ŋ nik ŋ waasiŋ Yawuut ci : Ŋ meeɗ meeɗ tolfiɗ ɓi Janguuniŋ Kooh tolfiɗ miskiɗ ne ŋ ɗumba.
14 Ŋ waasiŋ Yawuut ci, ñam saandee ɓo' laayiɗ ŋ gomal ciŋ ngo, ñam uupee ɓa sawar ŋ mbaah ciŋ caac ciŋ ɓoo.
15 Waaye ŋ baahohiŋ Kooh, a waɗkiɗ to wa ŋ nik ŋ rookaŋ yaay ɓoo, a ɓeeɗukka so ne ŋ pangkiɗ ɗe. Wa wa neɓ ɗe,
16 a teeɓiɗ to Kuɓkiŋ ɗe ne ŋ woo ɓi nikɗi Yawuut Yegɗohiŋ Muci ŋ ini kaɗ nga ɗe. Ŋ ineem, ŋ meekisɗi ali ɓo',
17 ŋ kaɗɗi sah Yerusalem ne ŋ marak ɓi koc co nik Apootar, ŋ jaar kaɗ Arabi, ŋ dokukka Damas.
18 Wa degga kiis kaahay, ŋ kaɗta Yerusalem ne ŋ inhoh na Piyeer, ŋ nikka ɗiskaŋ ɗe neeh ndaŋkiyaah na yatuus (15).
19 Waaye ŋ hotɗi ali Apootar wiiriis, ɗal Saak, taambɗoh Heɗi.
20 Ini ŋ fiisiɗ ɗu weem, Kooh yi tiimb mbo inhiɗ ne ŋ leyɗi.
21 Ƴutta ŋ kaɗta kur caŋ Siri na Silisi.
22 Ŋ ini kaɗ ŋ ɓi Janguuciŋ Kiristaani nik ŋ Yudee, ɓa inheeɗi so.
23 Ɓa kerhee ɓooɓi woyee rek ne : « Ƴaari meeɗ ɓoo tolfiɗ, a na yegɗohe kotii Yegɗohiŋ Muci ŋ ini kaɗ ŋ kosi a jeemee yahroh. »
24 Ɓa yakiɗta Kooh ŋ ini kaɗ nga so.