Macce 14
WBT1 Ŋ jamanoonaam, Herod ya adgohee Galile, kerahha ɓooɓa laamtoheeɗa Yeesu,
2 a woosa dag caŋ ɗe ne : « Ƴaareem, e Yahya Ɓoktohi ; a hultiɗu hultiɗu, weɗ tah a raakka hatil haɓɗoha in feyohiɗ ! »
3 Herod yeem a yi taƴɗukee Yahya sagu Herojaad ɓiti Filip ; Filip nikee taambɗoh Herod.
4 Waam, raak Yahya meeɗ woo Herod ne : « Waasiŋ Kooh teyɗohɗi ne fu ɓay ɓiti taambɗoh fu, fu tum ɗe ɓitiɓ. »
5 Ŋ ineem, Herod waaɗta ɗe apɗuk waaye a neƴƴoheen ɓooɓa laam ɓa teyɗukeen Yahya findi woosuuɗ.
6 Waaye wa raakka mbeh Herod yakɗeeɗa mbehi a raakohu, kuɓkiŋ Herojaad ɓitɓi mbeceeɗa ŋ fiki hanheeca, Herod neɓuusa nga ɗe
7 po a gappa ɗe na giñ ne a hey ɗe eɗe in nu a meekis ɗe ɗah.
8 Herojaad, yaay ɓi kuɓka, ɓekka kuɓka po a woosa ne : « Ŋ waaɗ eɗu palaat ndii, na hafiŋ Yahya Ɓoktohi. »
9 Ŋ ineem Herod soossa waaye giña a giñee ŋ fiki hanheeca tahha po, a nakohha ne a eɗsaata,
10 a tuuƴohha ne hafiŋ Yahya kaɗ nguɗsa ŋ kasoona.
11 Hafiŋ Yahya nguɗuusa, ɓayuusa ŋ palaat, kuɓka cafƴa eɗuusaa, a ɓayyaa yaay ɓa.
12 Taalubeeciŋ ɗe kaɗta ɓaya fiɗaafaŋ ɗe, ɓa accaa. Ɓa kaɗta, ɓa woosa Yeesu wa.
13 Wa Yeesu kerah ne Yahya Ɓoktohi apuuɗ, a kurkohha ndaam, a aassa ŋ gaal ne a kaɗ ɗaaya ŋ nduufa ; waaye ɓooɓa yeggaa, ɓa pulla kur ca, ɓa taambiɗta ɗe na kot.
14 Wi a ree po a ruhussa ŋ gaala, a hotta mboolnda findi wa yakoh, ɓa misikka ɗe lool ; a wiriɗta kosaayiɗ ca nikee nga.
15 Wa niina ree, taalubeeci reɓpa nga ɗe, woosa ɗe ne : « Ndii bilaf te Kooh yii hooɓeeɗa ; woya mboolndi ɓa kaɗ ŋ kur ci ne ɓa rom ini ɓa joy ñam. »
16 Yeesu loffa ɓa ne : « Wa etohɗi ɓa kaɗe ; ɗu ɓii, eɗaat ɓa ɓa ñam. »
17 Ɓa woosa ɗe ne : « Ɓoo raak mbuuru yatuus na cuurund kanak dong ndii. »
18 A loffa ɓa ne : « Komaat to ca. »
19 A woosa mboolnda ne ɓa ɓoofaat ŋ kehƴi, ŋ ɗafuk paangfa, a ɓayya mbuuruuca yatuus ca na cuurund ca kanak ca, a taaknukka ŋ Eel ci, a corkiɗta Kooh. Ƴutta, a nguɗsohha ca, a eɗta taalubeeci ca, ɓeem paysohha mboolnda ca.
20 Ɓooɓa jen ñammba po kappa, ɓa ɓayndohha tasiɗ ca, ca nikee pañe ndaŋkiyaah na kanak (12).
21 Ƴaar ca ñamee nga nikeen ŋ ɓak junni-yatuus (5000), ɓaatta nga ɓitiɓ ca na komaakca.
22 Wa mboolnda ñam po ƴutta, Yeesu jaarra tufuk taalubeeciŋ ɗe ne ɓa adug ɗe, ɓa aas ŋ gaala, ɓa kaɗ ɓaka winooraŋ cookma, a yi ŋ haf ce, a woo na mboolnda ne ɓa haadaat.
23 Wa a cootiɗ mboolnda po ƴutta, a rappa ŋ tango a ɗaayya nga ne a kiim Kooh. Wa weka ree raak ɗe nga, kiik ce.
24 Waam raak gaala ŋ ɗooƴ cookma, puuɗsi yurhiɗkohha naa, ginaah ci laɓkeeɗa nga.
25 Ŋ wiisaaɗiina, Yeesu tiindeeɗa ŋ ɗafuk masma, a hayeeɗa ŋ taalubeeci.
26 Wa ɓa hot ɗe tiindeeɗa ŋ ɗafuk cookma, ɓa feyuusa, ɓa woyeeɗa ne : « A husiɗ ! » Ɓa tiitta, ɓa leehkeeɗa.
27 Yeesu arra ɓa woo ne : « Tokaat fit ciŋ ɗu, a ñam ; kinaat neƴƴoh ! »
28 Piyeer loffa ɗe ne : « Kilifaani, nik ne a fu ɗah, woo so ŋ tiind ŋ ɗafuk masmi, ŋ hay nga ɗa ! »
29 Yeesu woosa ɗe ne : « Haya ! » Piyeer ruhussa ŋ gaala, cammba tiind ŋ ɗafuk masma ne a kaɗ ŋ Yeesu.
30 Waaye a hotta findi puuɗsa raakoh hatil, a neƴƴohha, a cammba diig ŋ masma, a leehukka an : « Kilifaani, naaf fo deey ! »
31 Yeesu arra raɗis yaah, ammba ɗe, woosa ɗe ne : « Ƴaari yaf kosaaɗi, wa ye tah fu taastiɗohee ŋ haf fu ? »
32 Ƴutta ɓa rappa ŋ gaala, puuɗsa seemmba.
33 Taalubeeca nikee ŋ gaala ƴekka ŋ fiki Yeesu, ɓa woosa ne : « Wa keeh ne fu Kuɓkiŋ Kooh ! »
34 Wa ɓa reehiɗ ƴakaanduk cookma, ɓa teerra ŋ kur kaŋ Senesaret.
35 Ɓooɓa nikee ŋ ɗiska inhissa Yeesu, ɓa woosaa ŋ kur caŋ ɓak caam jen, a komuusa kosaayiɗ ca jen.
36 Ɓa kiimeeɗa ɗe ne ɓa laal lecmiŋ kulɓaakiŋ ɗe dong, te ɓooɓa laalee wa jen wireen jameet koreet.