Lulanga lwa 53

1 Gwârhi omukulu w’abimbiza. Oku ndwâla. Lwimbo. Lwa Daudi. 2 Omuhwinja anaderhe, erhi: «Nyamuzinda arhahabà!» Bàhabusire, bàjizire eby’okugayîsa, ntâye ojira aminjà. 3 Kurheng’enyanya Nyamuzinda asinzize ababurhwa n’abantu alole erhi abonamwo omuntu w’obwenge amulongereza. 4 Boshi bàherîre haguma, boshi bàsherîre; ntâye ojira aminjà ciru n’omuguma! 5 Ewe! k’abajira amabî barhayengeha, bala bashanshanyula omulala gwâni nka kula balya omugati? Ka barhashenga Nyamubâho? 6 Banîre omushunzi, n’obwo ntâbyo bibayôbohize, bulya Nyamuzinda ashandâza ebivuha bya balya balikugosire; enshonyi zâbabumbire, bulya Nyamuzinda anabakabulîre boshi. 7 Lêro ndi walêrhera Israheli obucire bwarhenga e Siyoni? Hano Nyamuzinda agalula empira z’omulala gwâge Yakôbo âshagaluka, Israheli asîme.