Galatia 2

1 Borimai saudoudoiâhasi murina eai abo ea seuio Ierusalema, maegu Banaba. Tito hinage ea abi ea woeai. 2 Earua ena woeawoea eai ea sasae; egu laulauguguia Murimuriâtataodi boeadi eai bena ea hemasaraha (isi headi wasadi se lai maeguyao, aibom mo ai oigogo) ata ma aitautauâgaibugu, e dobila udoi eai ea aiaitautau. 3 Tito maegu wa, ia Heleni tauna, taiede nige se dudu bena ia se heperitome. 4 Na paana eda tataoyao borabora headi se woeaâeamuyamuidima boeamai eai, se lusorama bena ema iairihai miamiana Keriso boeana eai ai lobai wa, se itasipoi bena se auuioimai. 5 Aridi eai nige begana aie eari, nige maesega, bena evanelia mamohoina ai sogohi enamiu. 6 Na isi headi se awatanuagaedi (edi tausae nige ea nuatui; Eaubada tatao nige i heasisinapaidi) ea ’ne isi wa wasadi se tanuaga, nige saha se leama arigu eai; 7 nige’e, na se itagu evanelia tauânigeâperitome enadi se leamao eau arigu eai, doha evanelia tauâperitome enadi se moseyao Petero arinai 8 (paana ia wa Petero boeana eai i paipaisoa tauâperitome enadi, eau boeagu eai i paipaisoa hinage, Murimuriâtataodi enadi), 9 eo ainauia arigu eai se leama wa se ita, abotai Iamesi eo Petero eo Ioane, isi ekalesia eai du lailaidi ede, se nimaluimai, eau eo Banaba, heoiesega nimatutuna ede se heleleama, bena ai abo Murimuriâtataodi aridi eai ai lau, isi abo tauâperitome aridi eai se lau; 10 ginauri esega mo si ene bena tatao gogogesagesa ai nuanuatuidi, iaede egu laulau meta. 11 Na huia ne Petero ie laoma Anetioka eai, matana eai ea taugudui paana ia ana giru. Paana tatao headi sora nige Iamesi arinai se laoma, ia maena Murimuriâtataodi se aiaigogo; na isi wa se lagema abotai i abihesuarauioi, tauâperitome peledi i matausiedi. 13 Ia maenayao Iudea headi hinage nige aoâmasaraha eai se laulau, i lau e Banaba hinage se hearulaei edi abiâborabora eai. 14 Na eau ea ita edi laulau nige i dudurai doha evanelia ribana mamohoina laulauna, isi gamagaridi matadi eai ea riba dudurai Petero arinai, ea ene, “Ena oa Iudea tauna, u miamia doha Murimuriâtauna, nige doha Iudea tauna, ue saha Murimuriâtataodi u lauhesomdi bena Iudea edi laulau se lauwataidi?" 15 Ai ede se labasimai Iudea tataomai, nige Murimuriâtataodi taulaulau baaea, 16 taiede ai itayao laugagaeo paisoana debana eai taba nige tau esau i dudurai, na Iesu Keriso sunumaina debana eai mo, ai hinage Iesu Keriso ai awamamohoieiyao, bena ema sunuma Iesu Keriso arinai debana eai se heduduraimai, nige laugagaeo paisoana debana eai, paana laugagaeo paisoana debana eai taba nige tau esau i dudurai. 17 Na ena ita ta aiaipate bena Keriso boeana eai ta dudurai, na ita maâbaaeada eai ta laulau, abo ta ’ne Keriso ia baaea ena heaheari, wa? Nige ariariri! Na ginauri wa ea lopahaidio, ena ea hetorouioidi, abo ea hemasarahauioigu ede, eau laugagaeo tauâutusi. 19 Paana eau laugagaeo debana eai ea mateo laugagaeo arinai, bena Eaubada arinai ea mauri. 20 Eau Keriso maegu se hesatauroguo; taiede hinage ea mauri, na eau mo nige’e, Keriso ede ie mauri eau boeagu eai; na mauri wa bulumagu eai ta Eaubada natuna sunumana debana eai ea miamiai, ia i gadosisiegu eo i moselaeuioi eau debagu eai. 21 Eaubada ena ainauia nige ea gudugudui, paana ena taba laugagaeo debana eai aba heduduraida i laoma, abo Keriso ie mate gaibu.