HEMASARAHANA 1

1 Eaubada ena hemasaraha i mosei Iesu Keriso arinai, bena ginauri sora abo se tubu ena heaheari tataodi i heitadi, ena aneru i hetamari, arinai i hemasaraha ena heaheari tauna Ioane arinai. 2 Ia Eaubada ena riba i hemasarahaei, eo Iesu Keriso abaâitalobaina ribana, eo ginauri gamagaridi ie itadi wa. 3 Kausara ia, ribaâperoveta ta tauhasirina, eo tauataiena, eo ginauri se uridi ta tausogohina; paana huiana i hanahanauma ede. 4 Ioane i uriuri ta, Ekalesia bodadi Asia eai, dubu haligigiâlabui enadi: Ainauia bena enamiu, eo loni ia arinai i laoma, ia wauâta ede, eo beabeana eai ia ede, eo maraitomâasubena eai abo ia ede, eo earua haligigiâlabui aridi eai i laoma, isi ede ena terona matana eai se totoro, 5 eo Iesu Keriso arinai i laoma, ia tauriba torotahitahina ede, eo mate eai tautorouio baguna, tanoubu ta edi wasawasa ia tanuagadi ede. Ia taugadosisieda wa, eda baaea eai i iarihaida iabom osinana eai 6 eo i hetoroda ena basileia, ena kohena tataoda, Eaubada, Tamana wa, ia enanayao, namanamarina ia enana eo iabom tanuaga, i lau e ana huia ana tasi. Amen. 7 Hage au ita, eada boeana eai abo i laolaoma, tatao gamagamagari abo se ita, eo isi gamagaridi hinage ia taugorina wa, eo tanoubu ta bodadi gamagaridi abo se doudou ia debana eai. Hedeona. Amen. 8 “Eau Alepa eo Omega, hetuhetubuna eo helahelautomna,” Guiau Eaubada ena riba ina, ia wauâta wa ede, eo huia beabeana eai ede, eo maraitomâasubena abo i laoma ede, Taugigiborina maudoudoina wa. 9 Eau emi tau wa, Ioane, heamamna boeana eai ami sagu esau eau, eo Iesu Keriso basileiana boeana eai hinage, eo taubigana eai eau maemiuyao. Bonabonarua esana Patamosa eai ea mimia, nei eai Eaubada ena riba debana eai se paigu, eo Iesu Keriso ribaribaena debana eai. 10 Guiau ena asubena eai eau Earuana eai, dagelagu eai arina lailai ea ataiei, doha bogigi arinana, 11 i ene, “Eau Alepa eo Omega, bagubagunana eo murimuritaâaririna, saha u ita bena u uri buka eai, eo u hetamari dubu haligigiâlabui aridi eai, isi ede Asia eai: Epeso eai, eo Semurina eai, eo Pegamosa eai, eo Taiatara eai, eo Sadis eai, eo Piladelepia eai, eo Laodisia eai." 12 Na ea sinibui wau arina wa i ribalaoma wa, bena ea ita. Maâsinisinibuigu na lamepa abaâtoredi gold, haligigiâlabui ea itadi, 13 boeadi eai esau doha TauâNatuna, ana lulu i lui i dobi aena eai, eo nuapouna eai ena auduaduari gold. 14 Uruna eo uruna maiawana se posiposi ariri doha mamoe wuiana posiposina, ie posi doha sinou; matana doha oeagi i alaâbalebalelem, 15 aena doha brass se wosa henamanamari, doha oeagi alaalasi eai se heaa, eo arinana daguguna doha goila gamagamagari se dididi dagugudi; 16 nimaâtutuna eai ipora haligigiâlabui i abiabididinidi, awana eai elepaâaiaiunu mata labulabuina, eo matana ana ao doha mahana maâadidirina i sinasina. 17 Huia ne ea ita, maâesega aena eai ea gurisalaoba, doha tau ie mate, abo nimana i hetaru potagu eai, i ene, “Tabu u matausi, eau bagubagunana wa, eo murimuritaâaririna, 18 eo maumaurina wa; ea mamate, na u itagu ta ea mauri i lau e nige nosina, Mate eo Hade kiâna ede eau nimagu eai. 19 Arinai teina ginauridi u itadi ta, u uridi, ginauri se tubuo ede, eo ginauri sora abo se tubu, maraitomâasubena eai. 20 Ipora haligigiâlabui nimatutugu eai ue ita wa, eo lamepa abatorena gold haligigiâlabui wa, aniodi eamuyamuidi ede: ipora haligigiâlabui isi ede aneru, ekalesia dubudi haligigiâlabui anerudi, eo lamepa abatorena haligigiâlabui, isi wau dubu haligigiâlabui ede.