HEMASARAHANA 17

1 Abo aneru haligigiâlabui, bia haligigiâlabui tauabina wa, adi sagu esau i laoma arigu eai, i ribalaoma, i ene, “U laoma, sine laulau baaea saesaena wa, goila gamagamagari i babawatawaidi wa, hekirainona abo ea heitam, 2 ia wa tanoubu ta wasawasadi i enoenoedi, eo tanoubu taumia ena laulau baaea eai doha i henomeauyauredi." 3 Earuagu eai abo i bahelaegu barabara esau eai, to sine wa ea iita, i gerusae suisui buiabuiana potana eai, suisui ta esa udoi udoi Eaubada aba ribaâbaaeaina i monau, uruuruna haligigiâlabui, eo donana saudoudoi. 4 Sine wa lulu buiabuiana eo alaalawana eai se helui, gold eo we’u namanamaridi eo giniuba matamatapoudi arinai se hepasa, nimana eai abaânomnom gold, abiâbaaea udoi udoi i monau, ena laulau biibiina ginaurina. 5 Debaâpogana eai esa eamuyamuina se uri, ribana ede: “Babulonia saesaena, enoenobiri sisinedi sinadi ede, eo tanoubu ena abiâbaaea gamagari sinadi." 6 Sine ta ea ita, hetabu tataodi osinadi eai i nomâeauyaure, eo isi hinage Iesu enanayao wa ia debana eai se unuhematedi. Sine ea iita ea no’o to ea no’o matemate. 7 Na aneru wa i ribalaoma arigu eai i ene, “Paana saha ue no’o? Sine ta heaheasonina eamuyamuina hage ea heribam, eo suisui i gerugerui ta aniona, iaede maâuruuruna haligigiâlabui eo donana saudoudoi. 8 Suisui ue ita wa nabada miana, wauâta nige’e, abotai abo duha lohalohana i dobi nige sigana wa boeana eai i dalasaema abo i lau baaea nige nosina wa arinai. Isi tanoubu eai ta se miamia, isi wa esadi nige se urinonohaidio mauri bukana eai tanoubu ena abatubu eai, isi abo se no’o ariri paana suisui wa abo se ita, paana beabeana eai miana, wauâta nige’e, abotai i uioma. 9 Tau sonoga iabom abo i italobai, heaheasonina ede: uruuruna haligigiâlabui isi ede oeaâtupidi haligigiâlabui potadi eai sine wa i babawa; 10 hinage isi ede wasawasa haligigiâlabui, haligigi se gurio, esau ena huia ina, esau sorana, abo i laoma, abo ena huia begana mo i abi. 11 Na suisui wa, beabeana miana wauâta nige’e, ia i patulau taudi haligigiâlabui adi sagu esau, ia doha hehaligigiâhaionana ede, eo abo i lage baaea nige nosina arinai. 12 Dona saudoudoi ue ita wa, isi ede wasawasa saudoudoi, sora nige edi basileia se abi, se hetorodi tanuaga eo wasawasa, suisui wa maenayao, edi mahana esega sorasorana eai. 13 Isi nuadi esega edi gigibori eo edi awaâtanuaga se mosegabaei suisui wa arinai. 14 Mamoe abo se ialai, na Mamoe abo i saepoidi, paana ia guiau edi Guiau, eo wasawasa edi wasawasa, isi maenayao wa hinage abo se baguna, paana se eogaidi ede, se abiâhileidi, isi tauâtorotahitahi." 15 I ribalaoma arigu eai i ene, “Goila u itadi wa, sine laulau baaeana i babawaâtawaidi wa, isi ede tatao moutuadi, peledi lailaidi, hari basileia eo hari arina. 16 Na donadi saudoudoi u itadi wa, eo suisui wa, isi abotai abo se sinibui sine laulau baaeana wa abo se hewaiunuei; ena gogo abo se girihai, ana lulu se abihaidi, bulumana se ai, eo oeagi alaalasi eai ia abo se gabuâhealahoho. 17 Paana Eaubada nuadi i dudududuidi bena ia ena nuatu se ginauri arinai nuadi se heoiesega eo edi basileia se mosedi suisui arinai i lau e Eaubada ena riba se hemamohoiedi. 18 Na sine ue ita wa, ia ede eanua saesaena wa, tanoubu wasawasadi wa tauâtanutanuagaedi."