Mɛborimɛ Wɛ́ìtì 11

¹ Dootóo ɑ diì dibinni miɛkɛ, dɛ̀ yó mboní kɑ̀ɑ wɛ̃tɛ kɛ́ mù pɛ̀tɛ́mu.

² Pɑ̃ ɑ kpɛrɛ bɛnìtìbɛ̀ bɛ̀yiekɛ̀, bɑ́ bɛ̀ni kɛ yɛ̃́ ɑ í yɛ̃́mɛ̀ tìì nɑɑ yóó dɑ tuɔkɛní.

³ Fɛtɑɑfɛ̀ ɔ̃ɔ̃ kperi dɛ ĩ́nkɛ̀ kɛ́ni kɛtenkɛ̀ nkɛ. Kɛ̀ mutie do kubɑkù cɑ̃̀nku yoo kuyoú mù ɔ̃ nduɔ́ mù do kùù píkù nku.

⁴ Wèè weí kuyɑɑkù ò ɔ̃ɔ̃ í mbuɔtí. Wèè bɔ́ú nyɛwɛtɛ̀ ò mɛ nhɔ̃ɔ̃ í nkɔ̃ṹ.

⁵ A í yɛ̃́ mɛ̀ɛ̀ botí kuyɑɑkù keri kùù cɛ, ɑ í mɛ nyɛ̃́ dɛbirɛ ɔ̃ɔ̃ píítɛ́ mɛ̀ɛ̀ botí dɛ yɔ̃ pɔutì miɛkɛ kɛ́nweí. A í mɛ nyɛ̃́ Kuyie mpĩ́mmɛ̀ ku tɔ̃mmú kunku kùù dɔ̀ɔ̀ri dɛmɔu.

⁶ Kɛ̀ dɛ̀ wentɛ́ ɑ buɔtí ɑ diitì. Kuyuoku bɑ́ mmɛĩ́ ɑ nɔu kɛ yɛ̃́ ɑ í yɛ̃́mɛ̀ dɛ̀ɛ̀ yóó yiénnɛ̀ dɛ̀tɛrɛ̀, yoo kɛ̀ dɛ̀ mɛ mbo yié ndɛdɛ́, ɑ í yɛ̃́.

⁷ A bo nwúómmɛ̀ kuwenniku dɛ̀ wentɛ́ dìì mɔ̀nnì dɛ̀ nɑɑtimu, kɑ̀ɑ fòù dɛɛ̀ wenni.

⁸ Kɛ̀ wèè fòù kɛ yĩ yɛbie mpɛ́u dɛ̀ nhò nɑɑti dɛ kó yɛbie nyɛmɔu miɛkɛ, dɛ yiɛ̀ nnɛ́ nyɛ̃́ yɛwe yɛiyɛ sũmɛ̀, dɛ̀ɛ̀ kpɑɑní dɛ̀ í dò nkɛ́bɑntɛ́.

⁹ Odɑpɑ̀ɑ̀ nfɔ̃́! Dɛ̀ ndɑ nɑɑti, kɑ̀ɑ mmɔkɛ diwɛ̀ì ɑ dɑpɑ̀ntì mɔ̀nnì. Ntũ nhɑ yɛ̀mmɛ̀ dɑ nɑ́ɑ́ ntì, kɛ́ndɔɔri ɑ dɔ́mɛ̀. A nɛ́ nyɛ̃́ kɛ dò nKuyie nyóó dɑ bekɛ́nɛ̀ dɛmɔu dɛ kpɛ́í.

¹⁰ Kɛntɛ́nɛ̀ ɑmɑ́ɑ̀ dɛ̀ɛ̀ bo dɑ tɑnnɛ́ mɛyɛǹcɑɑ̀rìmɛ̀ miɛkɛ nɛ̀ mumɔmmú kɛ yɛ̃́ tidɑpɑ̀ntì nɛ̀ tibíkɛ́mbɛ́ntì dɛ̀ í yóó ɔɔtɛmɛ̀.