Esɑii 46

¹ Tɛbɔɔtenkɑɑnìtɛ̀ bɛ̀ tu tɛ̀ Bɛɛdi tɛ̀ bíimmu, tɛbɔɔtenkɑɑnìtɛ̀ Nɛbo domu, di do tounko sìì tenkɑɑnìi iwũɔ̃ kɛ sì dɛ̀úkùnko, sì nɑɑ́ nyiwũɔ̃ kó yɛtuɔ nyɛ, iwũɔ̃ sì ɔ̀ùnɛ̀mu.

² Sibɔɔtenkɑɑnìi bíimmu, sì wɛ̃nnɛ́mu kɛ do, sì í nɑ kɛ dɛɛtɛ́ simɑ́ɑ̀, bɛ̀ sì tɔmu kɛ kũntinɛ̀ bɛtɔbɛ̀ ciɛ.

³ Kéntɛ́nɛ̀ n tú mù, díndi Sɑkɔbu yɑɑ̀bí, díndi Isidɑyɛɛribɛ bɛ̀ɛ̀ kpɑɑ́, díndi n tɔ bɛ̀ nɛ̀ di yɔ̃bɛ̀ pɔutì miɛkɛ, díndi n te bɛ̀ nɛ̀ bɛ̀ di púómmɛ̀.

⁴ Nɛ̀ di bo kótɛ́mɛ̀ n yó mmɛ ndi dò, nɛ̀ diyùpɛ̀ítì miɛkoo n yó ndi tɔmu, míì pĩ ndɛ kó mutɔ̃mmú kɛ yó mmu pĩ, kɛ yó ndi ceú kɛ di dɛɛrí.

⁵ Di bo nh ɛnnɛnɛ̀ we kɛ̀ tí mmɑ? Di bo ndonnɛnɛ̀ we kɛ̀ ti ndò?

⁶ Bɛnìtìbɛ̀ ɔ̃ɔ̃ yóótɛ́mu bɛ yɑɑ̀yɔ̀rɛ̀ mɛsɔɔ, kɛ́cɔ̃nnɛ́ timɑ́tì pɛ́ítì cìdóò, kɛ́wɑɑ́ nhomɑ́ɑ́tì, kòò bɛ̀ dɔ̀ɔ̀ tɛtenkɑɑnìtɛ̀. Kɛ̀ bɛ̀ nninku tɛ ììkɛ̀ kɛ tɛ̀ bɑ̀ɑ́.

⁷ Kɛ tɛ̀ tɔuti, kɛ tɛ̀ buuti, kɛ̀ bɛ̀ tɛ̀ còńnɛ́ dɛ̀ tɛ̀ ndɛ ncómmú. Kɛ̀ bɛ̀ tɑ tìmɑtì miɛkɛ kɛ tɛ̀ kuɔ́nnɛ̀ tɛ̀ bɑ́ɑ́ cɔ́útɛ́, tɛ̀ bɑ́ɑ́ bɛ̀ dɛɛtɛ́.

⁸ Díndi di ndɛ̀ yɛ̃́, kɛ kpénkùnnɛ dimɑ́ɑ̀, totínɛ̀ di yɛ̀mmɛ̀, díndi bɛ̀ɛ̀ yetírí n kpɛti.

⁹ Dentɛnɛ̀ní tìì dɔ̀ɔ̀ nɛ̀ dimɔ̀nnì, n tú Kuyie nku kutɛkù mɑkù í bo, kɛ̀ dɛ̀ í tú mí nhotɔù mɔù í bo, kɛ n dònnɛ̀.

¹⁰ Míì ɔ̃ɔ̃ nɑ́kɛ́ nɛ̀ dimɔ̀nnì tìì yóó dɔɔ̀, nh ɔ̃ɔ̃ ti nɑ̀kɛ́mu kɛ̀ tì kpɑɑní tì mɛ mbɑ́ɑ́ pɑɑ̀. Kɛ̀ ǹ yĩ́ n yóó dɔɔ̀ tì nh ɔ̃ɔ̃ ti dɔ̀ɔ̀mu.

¹¹ N yùní fɛtúúfɛ̀ nfɛ diyiè yìɛ̀ní kɛ̀ɛ̀ bíɛ́kɛ̀, dihɛì dɛtirì ndi n yunímɛ̀ onìtì wèè yóó dɔɔ̀ n tɑ̃ɑ̃tɛ́ tì, n nɑ̀kɛ́ tì, tiì yóó tuɔ̀kɛní, kɛ̀ n tɑ̃ɑ̃tɛ́ tì n yóó ti n dɔɔ̀.

¹² Kéntɛ́nɛ̀ n tú mù díndi itookperí yɛmbɛ̀, díndi bɛ̀ɛ̀ dɛ̀tɛ́nɛ̀ timɔ́mmɔnti.

¹³ Nh ɑutóomu kɛ bo dɔɔ̀ timɔ́mmɔnti, m bo dɔɔ̀mɛ̀ timɔ́mmɔnti dɛ̀ í kpɑɑ́ kɛ dɛ́tirì, n tɔ̀ɔ́tɛ́mu kɛ bo dɛɛtɛ́ n nìtìbɛ̀, n yóó dɛɛtɛ́mu Siyɔ̃ɔ̃ ɛì, n yóó duɔ́mmu n kó tikpetì Isidɑyɛɛribɛ.