Isɔbu 27

SIM

¹ Kɛ̀ Isɔbuu sɔɔtɛ́ kɛ́mbekù o kpɛti kɛ bɛ́i nkɛ dɔ̀:

² Kuyie mbomu kuù yetɛ kù bo n kónnɛ́mɛ̀, kunku muwɛ̃rímú mumɔu yiɛ̀ kuù m píɛ mmɛyɛǹcɑɑ̀rìmɛ̀.

³ Kɛ̀ n kpɑɑ́ weí, kɛ̀ ku kó muyɑɑ́ nkpɑɑ́ kɛ yiɛ̀ nh ɔ̃nnì.

⁴ N yí kpɑɑ́ kɛ bo nɑ́kɛ́ tiyɛiti mɑtì, tìmɑtì bɑ́ɑ́ yɛ̀nní n nùù tìì tu siyɑ́ɑ̀bìsí kpɛti.

⁵ N yí kpɑɑ́ kɛ bo di duɔ́ nkunɑɑtí, nɛ̀ m bo kúmɛ̀ n yí yóó nɛnni n wetímɛ̀.

⁶ N yóó nnɑ́ɑ́mmu n wetímɛ̀, n yí wɛ̃ti n fɔ̃nkúò. N yɛ̀mmɛ̀ í m bekùnɛ̀ tìmɑtì ĩ́nkɛ̀.

⁷ N dootitɔù dɛ̀ɛ ò dɔ̀ɔ̀ dɛ̀ ɔ̃ɔ̃ dɔɔ̀mɛ̀ bɛyɛibɛ, tìì ɔ̃ɔ̃ tuɔ̀kɛní wèè cɑ̀ɑ̀rɛ̀ tiì tuɔkɛní n dootitɔù.

⁸ Ɔ̃̀nti bo nkpɑɑ́ onitiyɛiwe bɑɑ tì? Kuyie nkèétɛ́ dìì mɔ̀nnì o fòmmu kó fɛyĩɛ̃̀fɛ̀?

⁹ Kɛ̀ mɛyɛǹcɑɑ̀rìmɛ̀ ò tùɔ̀kɛní dìì mɔ̀nnì, kòo kuɔ̀ nkɛ yu Kuyie nkù bo ò kèńtɑ́ɑ̀?

¹⁰ Dɛ̀ bo nhò nɑɑtinɛ̀ Kuyie mmuwɛ̃rímú mumɔu yiɛ̀nɑ̀ɑ̀? Ò bo nkù yu yɛmɔ̀rɛ̀ yɛmɔuɑ̀?

¹¹ N yóó di bɛnkɛmu Kuyie nkó tikpetì mɑ̀mɛ̀, n yí yóó di sɔnnɛ muwɛ̃rímú mumɔu yiɛ̀ ndɔ́ kɛ́dɔɔ̀ tì.

¹² Di mɔ́mmɔmbɛ di dɛ̀ yɑ̀mu, n nɛ́ í yɛ̃́ mùù te kɛ̀ di kpɑɑ́ kɛ nɑ́ɑ́ ndɛtetìrɛ̀ kpɛti.

¹³ Ntɛ Kuyie mbɑ̀ɑnɛ̀ tì oyɛiwe, muwɛ̃rímú mumɔu yiɛ̀ mbɑ̀ɑnɛ̀ tì oyɛiwe tiì tú:

¹⁴ Kòò piɛ́ ibí kɛ̀ ì sũ̀ṹ mudoò muù ɔ̃ɔ̃ ì kònnɛ̀, o yɑɑ̀bí ɔ̃ɔ̃ í ndi kɛ́nsɑ̀nnɛ̀.

¹⁵ Bɛ̀ɛ̀ yentɛ́ yentɛ́ kɛ̀ mutenkṹṹ mbɛ̀ kùɔ, bɛ pobɛ̀ ketɛ́ kɛ bɑ́ɑ́ kɑri bɛ kṹṹ.

¹⁶ Kòò mɔ̀ɔ̀tɛ idíítí kɛ̀ ì sũ̀ṹ mmutɑ̃́ɑ̃́ ndòmmɛ̀ kɛtenkɛ̀, kɛ̀ tiyɑ̀ɑ̀tì còú cóú titɑ̃́tì kɔ̃mɛ.

¹⁷ Wèe dɛ̀ tìkú kɛ́cóú nhosɑ̀ù weè yóó tì dɑ̀ɑ́tí, onìtì wèè wetí weè yóó tiekɛ dɛ kó idíítí.

¹⁸ Ò mɑɑ́ tɛ̀ɛ̀ cĩ́ɛ̃̀tɛ̀ í tú tɛkpetɛ̀, tɛ̀ dònnɛ̀ difii ndi bɛ̀ ɔ̃ɔ̃ dɔɔ̀ dì kɛ́mbɑɑnɛ̀ kupɑku.

¹⁹ Ò yóó kú kɛ tú okpɑ̀ɑ̀tì nwe, bɛ̀ mɛ nyí yóó tì nhò wɛ̃nnɛ́nɛ̀ kɛ́kũnnɛ́ bɑ́ kòò èntɛ ò bɑ́ɑ́ yɑ̀ dɛ̀mɑrɛ̀.

²⁰ Kufɔ̃wɑɑ́ nkuù ò do koò dɑ̀tínnɛ́ mɛniɛ nhɔ̃ɔ̃ dɑ́tínnɛ́mɛ̀ kukó, kufɔ̃wɑɑ́ nkuù ò tùótɛ́ tɛfɔ̀dɔ́ntɛ̀ kɔ̃mɛ kɛyènkɛ̀.

²¹ Kɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkù ò tɔ kɛ́dɛ́tɛ́nɛ̀, kóò uutɛ́ o cónnì

²² Kɛ̀ Kuyie nho tɑ̃ũ ipie mbɑ́ mɛsémmɛ̀ í kù bo, kòo cokù kɛ bo yentɛ́nɛ̀ Kuyie nkó tɛnɔ̀ùtɛ̀.

²³ Kɛ̀ bɛ̀ ò wũ̀ɔ̃ti mudɑɑ́, kɛ wúó nho cĩ́ɛ̃̀tɛ̀ kɛ ti ifontii.