Isɔbu 3

¹ Kɛ̀ Isɔbuu cɔ̃ɔ̃ o pɛitɛ́yiè,

² kɛ́bɛ́i nkɛ dɔ̀:

³ Bɛ̀ m pɛitɛ́ dìì yiè, dɛ kó diyiè dìi feti, nɛ̀ kɛyènkɛ̀ kɛ̀ɛ̀ yĩ bɛ̀ cɔ̀útɛ́ dɛnitidɑbirɛ pɔutì kɛ̀ɛ feti!

⁴ Dɛ kó diyiè ntú dibiìnnì kpɛri, Kuyie nhɑ borɛ̀ kɛĩ́nkɛ̀, ɑ bɑ́ ndɑkɛ dɛ kó diyiè kpɛti, ɑ bɑ́ɑ́ míítɛ́ di ĩ́nkɛ̀ ɑ wenniku!

⁵ Kudɔnkùu dì dɑ̀tínnɛ́ ku kó dibiìnnì, yɛwɛtisùɔ̀ mbo di ĩ́nkɛ̀ kɛ̀ kupɑ̃̀kù ndì dɑ̀ɑ́tí kɛ̀ kufɔ̃wɑɑ́ ndì bo!

⁶ Dɛ kó kɛyènkɛ̀ kupɑ̃̀kù diɛkùu kɛ̀ dɑ̀tínnɛ́, bɛ̀ bɑ́ɑ́ kɑɑ ndɛ kó kɛyènkɛ̀ dibenni kó yɛwe miɛkɛ, dɛ kó kɛyènkɛ̀ bɑ́ nkɔkɛ́ bɛtɑ̃̀ɑ̃̀bɛ̀ kó yɛwe miɛkɛ!

⁷ Dɛ kó kɛyènkɛ̀ɛ nɑɑ́ ntɛhɑ̃ũntɛ, bɛ̀ bɑ́ɑ́ keè diwɛ̀ì kó tɛyíìtɛ̀ dɛ kó kɛyènkɛ̀!

⁸ Dɛ kó kɛyènkɛ̀ bɛ̀ɛ kɛ̀ fietí bɛnitinɔ̀mbɛ̀ kɛ̀ bɛ̀ɛ kɛ̀ bɔntɛ́ kusĩ̀nkù! Bɛ̀ɛ kɛ̀ fietí bɛwɑɑ̀dɑ̀ɑ̀bɛ̀, kɛ̀ bɛ̀ɛ kɛ̀ mɑɑ́nko!

⁹ Siwɑ̃̀ɑ̃ sìì ɔ̃ɔ̃ yɛ̀nní diúríkɛ̀pɑ̀nnì sìi sɔutɛ, kɛ̀ kɛ̀ mbɑɑ kuwenniku kɛ́mɔ́ntɛ́, kɛ̀ bɑ́ɑ́ yɑ̀ diyiè yɛ̀tìní dɛ̀!

¹⁰ Kɛ yɛ̃́ dɛ kó kɛyènkɛ̀ í kpetínnɛ́mɛ̀ n yɔ̃ pɔutì, kɛ̀ í ǹ fũ̀ũnnɛ̀ mɛsémmɛ̀ diɛmɛ̀!

¹¹ Bɑ nte kɛ̀ n yí ku n yɔ̃ pɔutì miɛkɛ? Bɑ nte kɛ̀ nyí ku n yɛ̀nní dìì mɔ̀nnì?

¹² Bɑ nte kɛ̀ bɛ̀ n ceé n yɛtìní dìì mɔ̀nnì? Dɛ̀ dòmmɛ kɛ̀ bɛ̀ n yɑ̃ɑ̃́ ndi miɛ̀?

¹³ Nɛ̀ yíe n nɑ nduɔ́mu bɛ́u, nɛ̀ miɛ n do duɔ́mu kɛ ompu.

¹⁴ Kɛ nɑ nwɛ̃ńnɛ̀ bɛkpɑ̀ɑ̀tìbɛ̀ nɛ̀ bɛ̀ɛ̀ bɑkɛ́ kutenkù, bɛ̀ɛ̀ mɑɑ̀ sikpɑ̀ɑ̀tìcɛ̃́ĩ kɛ̀ sì nɑɑ́ nyɛdobuò.

¹⁵ N nɑ mbonɛ̀ sikpɑ̀ɑ̀tìbìí nsi, sìì do mɔkɛ mɛsɔɔ, sìì do piɛku timɑ́tì pɛ́ítì si cɛ̃́ĩ.

¹⁶ Yoo bɛ̀ pɑ̃̀nkɛ nɑ nni ncùù kɛ̀ m bɑ́ mbo, n nɑ nkɛ nsɔroo ibí ìì í yɑ̀ diyiè ì kɔ̃mɛ.

¹⁷ Dɛ bíɛ́kɛ̀ bɛyɛibɛ í kɛ̀ dɔ̀ɔ̀ri bɛ tɔ̃mmú, bɛ̀ɛ̀ wɛ̃rímú dèè bɛ̀ ɔ̃ɔ̃ kɛ́ nhom̀pɛ̀.

¹⁸ Tikpetíntì kɛ nhompu, bɛ̀ tɛ̃́nkɛ í kɛ̀ yo wèè bɛ̀ bɑ̀ɑ o kó fɛpíɛ̀fɛ̀.

¹⁹ Dɛ bíɛ́kɛ̀ bɛ̀ í bɑɑ̀tì bɛ̀ɛ̀ tu bɛdiɛbɛ̀ nɛ̀ bɛ̀ɛ̀ tu bɛsɑ́m̀pɔ́bɛ̀, tidɑɑtì yɛmbɛ̀ tɛ̃́nkɛ í tì bɑkɛ́.

²⁰ Bɑ nte kɛ̀ Kuyie nhɔ̃ɔ̃ dennɛní wèè yó nfɛ̃́ũ̀rì? Bɑ nte kɛ̀ Kuyie nhɔ̃ɔ̃ duɔ́ mmufòmmu wèè yo nyo mmɛsémmɛ̀?

²¹ Wèè ɔ̃ mbɑɑ mukṹṹ mbɑ́ mù í tuɔ̀kùní, wèè ɔ̃ nyɑ́ɑ́ mmukṹṹ mbɛ̀ yɑ̀ɑ́mmɛ̀ tikpɑ̀tì.

²² Kòò bo nsɔ̃́ nhò kɛ̀ bo diwɛ̀ì bo ò kùɔ, kòò do mpɛ̀tɛ́ kufɔ̃ti dɛ̀ nɑ nhò nɑɑti,

²³ wèè í wúó nhò kèrí dɛ̀ kɛ̀ Kuyie nhò peri tipíìtì timɔu

²⁴ Mí nkó mudiì nɛ́ tú fɛkṹũ̀fɛ̀, kɛ̀ n nɔnniɛti pũɔ̃̀ mmɛniɛ ntɛ̃mɛ̀.

²⁵ N cokù tì tiì n tùɔ̀kùní, n dé tì tiì nɛ́ m bonɛ̀.

²⁶ Kɑri só í bo, mɛom̀pùmɛ̀ í bo, diwɛ̀ì í bo, mɛhɑ́ɑ́rìmɛ̀ mɑ́ɑ̀ mɛɛ̀ nɛ́ m bonɛ̀.