Isɔbu 7

¹ Onìtì kó mufòmmu dònnɛ̀ kuhɑ̃ɑ̃pɔ̀nkù kɔ̃mu mmu kɛtenkɛ̀ ĩ́nkɛ̀, kɛ dònnɛ̀ wèè pĩ mmutɔ̃nyonkumu.

² Kɛ do nkudɑɑkù ɔ̃ nyeḿmɛ̀ Kuyie kɛ yɑ́ɑ́ mmɛdɛ́ɛ̀, otɔ̃ntì ɔ̃ mbɑɑ mɛ̀ɛ̀ botí tiyeti.

³ Mí nkpɛrɛ n yɑu dɛ̀ bɛtɑ̃̀ɑ̃̀bɛ̀ bɛmɔu dɛɛ̀ tu mɛyɛǹcɑɑ̀rìmɛ̀, m bɑɑ nɛ́ wentí kɛ wuommu nɛ̀ kuyonku dɛyènnɛ̀ dɛmɔu.

⁴ Nh ɔ̃ nyóó duɔ́ kɛ tú dɛ̀ɛ cɑ̃rikɛ kɛ́wentɛ́mu kɛ̀ ǹ duɔ́ dɛ̀ nni nkɔɔ́nnɛ̀ kɛ̀ dɛ̀ yɑ̀ɑ wentɛ́nko.

⁵ Yɛbiɛ̀ yɛɛ̀ tɑ n kɔ̃̀ntì kɛ̀ ǹ dɑ̀ɑ́tí yɛmɔnkpɛ̃rɛ̀, kɛ puòtì kɛ̀ mɛmɔ́tímɛ̀ yìɛ̀.

⁶ N we firì kɛ pɛ̃ɛ̃tɛ́mu tɛyɑɑ̀dùɔ̀dɑbɛɛtɛ̀, yɛ̀ pɛ̃nkɛ́mu n tɛ̃́nkɛ í bɑɑ mùmɑmù.

⁷ Kuyie nhɑ yɛ̃́mu kɛ dò n fòmmu tú kuyɑɑkù nku, n yí kpɑɑ́ kɛ bo yɑ̀ mɛtuɔ̀ mmɑmɛ̀.

⁸ Fɔ̃́ nwèè nɔ̀nfɛ̀ bo n yĩ́nkɛ̀ ɑ tɛ̃́nkɛ í yó n yɑ̀, ɑ bo nyóó wéntɛ́ kɛtenkɛ̀ kɛ bɑ́ n yɑ̀.

⁹ Diwɛtirì ɔ̃ɔ̃ yɛntɛ́mɛ̀ kɛ́deè, wèè tɑ kudɔnkù o kpɛrɛ mɛ ndò, ò í wɛ̃tiní.

¹⁰ Ò tɛ̃́nkɛ í wɛ̃tiní o cĩ́ɛ̃̀tɛ̀, o cĩ́ɛ̃̀tɛ̀ tɛ̃́nkɛ bɑ́ɑ́ ò yɑ̀ bìtì.

¹¹ Dɛɛ̀ te kɛ̀ n yí yóó yóu m bo nnɑ́ɑ́mmɛ̀ m bo mɛyɛǹcɑɑ̀rìmɛ̀ miɛkɛ nkɛ, kɛ yó nnɑ́ɑ́, n yó nsɑ́útínɛ̀mu n kó mɛsémmɛ̀ n yo mmɛ̀.

¹² N túmu dɑ̀mɛ́ɛ̀rɑ̀ɑ̀? Yɑ́ɑ̀ n túmu dɑ̀mɛ́ɛ̀rì kó musĩ̀mmù? kɑ̀ɑ wɑɑ́ mbɛbɑ̀rìbɛ̀ kɛ m bɑnnɛ̀?

¹³ Nh ɔ̃ nyóó duɔ́ kɛ́tú m bo om̀pɛ̀mu, kɛ̀ n dɔ́ùu yɑɑtɛ n sɑ́útìi.

¹⁴ Dɛ mɔ̀nnì kɑ̀ɑ nɛ́ n duɔnní tidɔùntì tìì nh ɑ̃ɑ̃̀ kufɔ̃wɑɑ́, Mɛbɛnkùmɛ̀ mɛɛ̀ donnìnko n kɔ̃m̀bùɔ̀tì.

¹⁵ Kuyie nkɑ̀ɑ pɑ̃̀nkɛ do n yĩɛ̃o dɛ̀ nni ntɔ̃ũ, kɛ̀ n do ku dɛ̀ ntɔ̃ũnɛ̀ tikɔ̃́ṹtì tikɔ̃́ṹtì tii.

¹⁶ N cĩtirimu n yí yó nfòù kɛ́mɔntɛ n yóu, kɛ yɛ̃́ n fòmmu dònnɛ̀mɛ̀ kuyɑɑkù nku.

¹⁷ Onìtì tu we kɛ dò nhɑ́ ndɑkɛ o kpɛ́í? Kɑ̀ɑ yɛ̀mmɛ̀ mbo o ĩ́nkɛ̀?

¹⁸ Kɑ̀ɑ ò sèú yɛkṹnwerɛ̀ yɛmɔu, koò yɑ̀ú yɛmɔ̀rɛ̀ yɛmɔu.

¹⁹ Dɛ̀ yó nkɑ̃́ɑ̃́kɛ́ dɛ kɑ̀ɑ yóu ɑ bo nni ntɑ̃mɛ̀ fɛnɔ̀nfɛ̀? A bɑ́ n yóu kɛ̀ m mɑɑ́ n nɔ́ntɔ̃ũtɑ̀ɑ̀?

²⁰ Bɑ́ kɛ̀ n cɑ̀ɑ̀rɛ̀mu dɛ̀ bo dɑ dɔɔ̀ bɑ fɔ̃́ nwèè pɑkɛ́ bɛnìtìbɛ̀? Dɛ̀ dòmmɛ kɑ̀ɑ yɛ̃ĩti timɔu duò n yĩ́nkɛ̀? Bɑ nte kɑ̀ɑ nh ɔ̀unɛ̀?

²¹ Bɑ nte kɑ̀ɑ bɑ́ɑ́ minnɛ́ kɛ́ n cĩ́ɛ̃́ n yɛi? N yóó tɑ kɛtenkɛ̀ nkɛ kɑ̀ɑ n wɑmmú kɛ́mɔ́ntɛ́.