Yɛsɑ̃ɑ̃ 11

¹ Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀. Kuyie mborɛ̀ n dɛ nsɔri, di bo yĩ́mɛ kɛ dɔ̀ nní ncokù yɛtɑ̃rɛ̀ miɛkɛ tɛnɔ̀tɛ̀ kɔ̃mɛ?

² Bɛyɛibɛ fĩ mbɛ tɑ̃nnɛ̀ ndɛ, bɛ̀ sɛ̀unko bɛ pie nyi, kɛ sɔri dibiìnnì miɛkɛ kɛ bo tɑ̃ wèè yɛ̀mmɛ̀ wenni.

³ Kɛ̀ dihɛì cɑ̀ɑ̀rɛ̀, onitisɑ̀ù bo dɔɔ̀ bɑ?

⁴ Kuyie mbo ku cɛ̃sɑ̀ɑ̀tɛ̀ miɛkɛ nkɛ, ku kpɑ̀ɑ̀tìkɑ̀rì bo kɛĩ́nkɛ̀ nkɛ, kù wùómmu bɛnìtìbɛ̀ bɛmɔu, kɛ yɛ̃́ bɛ yɛ̀mmɛ̀ miɛkɛ dòmmɛ̀.

⁵ Kuyie nyɛ̃́mu osɑ̀ɑ̀wè nɛ̀ oyɛiwe bɛ yɛ̀mmɛ̀, kù í dɔ́ oyonkuwe.

⁶ Kuyie nyóó cṹũnní yɛhɑ̃ɑ̃kũɔ̃ nyɛ nɛ̀ mɛhɑ̃ɑ̃kpɛ̀rìmɛ̀ bɛnitiyɛibɛ ĩ́nkɛ̀, bɛ kó tiyeti dɛ ntú.

⁷ Ti Yiɛ̀ nKuyie ntu timɔ́mmɔnti yiɛ̀ nwe, kɛ dɔ́ wèè dɔ̀ɔ̀ri timɔ́mmɔnti, bɛ̀ɛ̀ pĩ ntimɔ́mmɔnti bɛɛ̀ yóó kù yɑ̀.