Yɛsɑ̃ɑ̃ 137

¹ Ti do kɑri Bɑbidɔnni kó kukó nnùù ndi, ti do dɛ nkɑri kɛ́dentɛní Siyɔ̃ɔ̃ ɛì kpɛ́í kɛ́nkuɔ̀.

² Ti do nùńnɛ́ núnnɛ́ ti kó tikùtìdùùtì kukó nkó titieti nti.

³ Bɛ̀ɛ̀ ti pĩ̀ḿmúní bɛmbɛ bɛ̀ɛ̀ ti fɛ̃́ũnko bɛ̀ dɛ nti békú kɛ tú ti bɛ̀ dèntɛ̀ diwɛ̀ì kó fɛyɛ̀nfɛ̀, Siyɔ̃ɔ̃ ɛì kó fɛyɛ̀nfɛ̀.

⁴ Ti nɛ́ bo yĩ́mɛ kɛ́dentɛ̀ ti Yiɛ̀ nKuyie nkó fɛyɛ̀nfɛ̀ bɛtɔbɛ̀ ciɛ.

⁵ Sedisɑdɛmmu kɛ̀ n dɑ yɛ̃̀, n nɔ̀ùtɛ̀ youtɛɛ fɑ̃ũ.

⁶ N nɔ́ndɛnfɛ̀ɛ dɑri, kɛ̀ nsɑ̀ kɛ̀ n dɑ yɛ̃̀. Fɛ̀ɛ dɑri kɛ̀ nsɑ̀ kɛ̀ dɛ̀ í n nɑɑtinɛ̀ fɔ̃́ nSedisɑdɛmmu kɛ pɛ̃ɛ̃tɛ́ dɛsɔnnɛ dɛmɔu.

⁷ N Yiɛ̀ nKuyie nhɑ bɑ́ɑ́ yɛ̃̀ nhEdɔmmu ɛì kɔbɛ do dɔ̀ɔ̀ dɛ̀, bɛ̀ pɔ̀ntɛ dìì yiè Sedisɑdɛmmu bɛ̀ do pĩɛ̃kù kɛ tú: Pɔntɛnɛ̀ we kɛ́dɛ́ítɛ́ pɑ́íí nɛ̀ dipũũo.

⁸ Bɛ̀ɛ̀ yóó pɔntɛ Bɑbidɔnni ɛì kɔbɛ, kunɑɑtí mbɛ̀ bonɛ̀. Bɛɛ̀ yóó di fɔ́ɔ́ mmɛyɛi ndì ti dɔ̀ɔ̀ mɛ̀.

⁹ Dɛ̀ nnɑɑti bɛ̀ɛ̀ bo pĩ́mmú Bɑbidɔnni ɛì kó ibíbɛ́nní kɛ ì fɑ̃̀ṹtɛ́ fɑ̃́ṹtɛ́ dipèrì ĩ́nkɛ̀!