Yɛsɑ̃ɑ̃ 20

¹ Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.

² Kɑ̀ɑ bo mɛyɛǹcɑɑ̀rìmɛ̀ miɛkɛ ti Yiɛ̀ nKuyie ndɑ teennɛ̀, kunku Kuyie nSɑkɔbu do tũ nkù ndɑ kɑ̃nkɛ́.

³ Kù mbo ku cĩ́ɛ̃̀tɛ̀ Sedisɑdɛmmu kɛ dɑ teennɛ̀, kù mboní Siyɔ̃ɔ̃ tɑ̃rì kɛ dɑ cúɔ́.

⁴ Kù bɑ́ɑ́ yɛ̃̀ nhɑ pɑ̃rɛ̀ kpɛ́í, kùu cɔutɛ́ iwũɔ̃ ɑ kù feu ì kɛ tuɔ̀.

⁵ Kù dɑ duɔ́ nhɑ yɛ̀mmɛ̀ dɔ́ dɛ̀ dɛmɔu, kɛ́tũnnɛ ɑ dɔ́ kɛ́dɔɔ̀ tì timɔu.

⁶ Kɛ̀ ti nyíúnɛ̀ diwɛ̀ì kù dɑ teennɛ̀mɛ̀ kɑ̀ɑ nɑ, kɛ̀ ti còńnnɛ́ mɛnɑkùmɛ̀ kó mɛcɑnnimɛ̀ nɛ̀ ti Yiɛ̀ nKuyie nkó diyètìrì. Ti Yiɛ̀ nKuyie ndɔɔ̀ ɑ kù mɔɔ dɛ̀ dɛmɔu.

⁷ N yɛ̃́mu kɛ dò nti Yiɛ̀ nKuyie ndɛɛrí okpɑ̀ɑ̀tì kù tɑ̃ɑ̃tɛ́ wè, kɛ boní ku cĩ́ɛ̃̀tɛ̀ kɛĩ́nkɛ̀ koò teenní, koò dɛɛrínɛ̀ ku wɛ̃rímú diɛmù.

⁸ Bɛ̀mɑbɛ̀ tɑ̃́ bɛ kpɑ̀rìsɛ̃ĩ́ nsi, kɛ̀ bɛtɔbɛ̀ tɑ̃́ bɛ sɛ̃ĩ́. Tínti mɛ nyu ti Yiɛ̀ nKuyie nyètìrì ndi.

⁹ Kɛ̀ bɛ̀ bótìrì kɛ duò, kɛ̀ tínti biɛ cómmú teii, ti í nɑmpú.

¹⁰ Kuyie nteennɛ̀ okpɑ̀ɑ̀tì, kɛ̀ tì dɑ yu ɑ́ keè.