Yɛsɑ̃ɑ̃ 4

¹ Dɑfiti yɛ̀nfɛ̀ bɛ̀ dìè nfɛ̀ nkɛ biennɛ̀ tibómbonti.

² Fɔ̃́ nKuyie nfɔ̃́ɔ̃̀ n kòḿmú, n kuɔ̀nnɛ̀ fɔ̃́ nwe, n teennɛ̀! N yɛ̀mmɛ̀ do cɑ̀ɑ̀rɛ̀ kɛ̀ fɔ̃́ɔ̃̀ n dɛɛtɛ́, n kuɔ́ mmɛsémmɛ̀ kɛ́kéntɛ́ m bɑ́ɑmmìi.

³ Díndi bɛnìtìbɛ̀, dɛ̀ yó nkɑ̃́ɑ̃́kɛ́ dɛ kɛ̀ di yóu di bo ncɑɑ̀rimɛ̀ n yètìrì? Dɛ̀ yó nkɑ̃́ɑ̃́kɛ́ dɛ kɛ̀ di yóu di bo ndɔ́mɛ̀ dɛtetìrɛ̀ kpɛrɛ kɛ wɑnti siyɑ́ɑ̀bìsí?

⁴ Bɑntɛ́nɛ̀ Kuyie nkuù n dɔ̀ɔ̀mɛ̀ mɛsɑ̀ɑ̀, kɛ̀ n kù yu kù n tee.

⁵ Kɛ̀ di miɛkɛ pɛikɛ di bɑ́ɑ́ dɔɔ̀ mɛyɛi, totínɛ̀ kɛyènkɛ̀ di yɛ̀mmɛ̀ di duɔ́ dɛ̀, kɛ́bónkùnnɛ di miɛkɛ.

⁶ Fíénɛ̀ Kuyie nyiwũɔ̃ kù dɔ́ ì, kɛ́ kù duɔ́ ndimɑ́ɑ̀.

⁷ Bɛsṹkùbɛ̀ nɑ̀ɑ́mmu kɛ tú: We mbo ti duɔ́ ndiwɛ̀ì? Ti Yiɛ̀ nKuyie ntí míítɛ́ ɑ wenniku.

⁸ A nɛ́ n duɔ́ ndìì wɛ̀ì pɛ̃ɛ̃tɛ́mu tidiitì nɛ̀ mɛnɑɑ̀ ndɛ̀ ɔ̃ mpíɛ́kɛ́ kɛ̀ bɛ̀ mɔ̀kɛ dì.

⁹ Nh ɔ̃ɔ̃ duɔ́ kɛ́yɛ̃̀ nkɛ́duɔ́ nɛ̀ diwɛ̀ì ndi, kɛ yɛ̃́ n Yiɛ̀ Kuyie nfɔ̃́ɔ̃̀ n kɑ̃nkɛ́mɛ̀.