Yɛsɑ̃ɑ̃ 41

¹ Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.

² Dɛ̀ nnɑɑti wèè dɑ̀kɛ bɛcĩ̀rìbɛ̀ kpɛ́í, kɛ̀ mɛhɑ́ɑ́rìmɛ̀ ò tùɔ̀kɛní Kuyie nhɔ̃ɔ̃ ò dènnɛmu.

³ Ti Yiɛ̀ nKuyie nhɔ̃ nhò kɑ̃nkɛ́mu kòo ńfòù, kɛ́di kunɑɑtí kɛtenkɛ̀ miɛkɛ, kù ɔ̃ɔ̃ í nyóu kòo dootitɔbɛ̀ɛ ò nɑ.

⁴ Kòò mɔ nkɛ duɔ́ Kuyie nhɔ̃ nhò bɑ̀ɑ̀mu, kɛ yɑ́úkùnko o kɔ̃̀ntì o muɔndɔ́ù ĩ́nkɛ̀.

⁵ Mí nhɔ̃ɔ̃ yĩ́: N Yiɛ̀ nKuyie n kuɔ́ mmɛsémmɛ̀ kɛ́ m miɛkùnnɛ n dɑ yetɛ́nɛ̀mu.

⁶ N dootitɔbɛ̀ nɑ̀ɑ́mmu n kpɛ́í nkɛ tú: Ò yóó kú ɔ̃̀mmɔ̀nnì? O yètìrì yóó kpɑ́nnɛ́ ɔ̃mmɔ̀nnì?

⁷ Bɛ miɛkɛ kòò mɔù kɔ̀tɛní kɛ n yɑ̀, ò nni nwɑ́tìrì, kɛ́tɔ siyɑ́ɑ̀bìsí kɛ́yɛ̀nnɛ̀ kɛ́pitɛ́.

⁸ N dootitɔbɛ̀ ɔ̃ɔ̃ tíímmu kɛ́nwɛ́ú n kpɛ́í, bɛ̀ nɑ́ɑntɛ n kó mɛyɛi mmɛ.

⁹ Bɛ̀ tu dɛ̀ɛ ǹ tùɔ̀kɛní dɛ̀ í tú dɛsɑ̀ɑ̀rɛ̀, bɛ̀ tu n domu kɛ tɛ̃́nkɛ í yóó ítɛ́.

¹⁰ Kɛ̀ n nɛ́po mɔ́mmuɔ n tɑ̃́ wè, nɛ̀ wè ti wɛ̃ nkɛ yo, weè kòńtɛ́ kɛ n cuùtì.

¹¹ N Yiɛ̀ nKuyie n kuɔ́ mmɛsémmɛ̀, n yíi nkɛ̀ m bɛ̀ fɔ̀ɔ́ mbɛ̀ n dɔ̀ɔ̀ dɛ̀.

¹² N yóó bɑntɛ́ ɑ n kómmúmɛ̀, n dootitɔbɛ̀ n yĩɛ̃kɛ dìì mɔ̀nnì ndi.

¹³ A yó nni ntɔ n yíé mmɛ̀ɛ̀ kpɛ́í nkɛ ɑ kuɔ́, kɛ̀ nni mbo ɑ borɛ̀ sɑ̃́ɑ̃̀.

¹⁴ N Yiɛ̀ nKuyie nyIsidɑyɛɛribɛ dɔú nkù, ɑ yètìrì ńdɛu kɛ̀ tí ndɑ sɑ̃ntí sɑ̃́ɑ̃̀ fɔ̃́ nnɛ̀ mutɔ̃mmú ɑ pĩ́ mmù, kɛ yó mmù pĩ nsɑ̃́ɑ̃̀, kɛ̀ dɛ̀ mmɛ ndò. Ami.