Yɛsɑ̃ɑ̃ 48

¹ Fɛyɛ̀nfɛ̀ Kodee bí kó didèntĩ̀nnì dìè nfɛ̀.

² Ti Yiɛ̀ nKuyie ndɛumu, Kuyie nkuù dò mbɛ̀ nkù sɑ̃ntí ku ɛì, ku tɑ̃sɑ̀ɑ̀rì ĩ́nkɛ̀.

³ Siyɔ̃ɔ̃ tɑ̃rì kubɑkù yoú bíɛ́kɛ̀ okpɑ̀ɑ̀tì diɛwè ɛì. Di wennimu kɛ̀ dɛ̀ nɑɑti kutenkù kumɔu di kpɛ́í

⁴ Kuyie mbomu ku kpɑ̀ɑ̀tìcĩ́ɛ̃̀tɛ̀ miɛkɛ Siyɔ̃ɔ̃, Kuyie nkuù tu ti kó tɛcɛ̃kpetɛ̀.

⁵ Bɛkpɑ̀ɑ̀tìbɛ̀ bɛɛ̀ wɛ̃nnɛ́ kɛ dɑ̀kɛ, bɛ̀ bɑ̀ɑ́tímu kɛ bo kpɑnnɛ̀ Siyɔ̃ɔ̃.

⁶ Kɛ yɑ̀ Siyɔ̃ɔ̃ kɛ̀ dɛ̀ bɛ̀ pĩ nkufɔ̃wɑɑ́, kɛ̀ bɛ̀ yɔ̀tɛ kɛ cokɛ́.

⁷ Kɛ̀ bɛ kɔ̃̀ntì ɑɑ́ dɛndɛ bɑ̀mbɑ̀, nkupɛitɛ́yonku ɔ̃ɔ̃ pĩ́ nhonitipòkù kòò nkpeutímɛ̀.

⁸ Kɛ dò ndiyiè yìɛ̀ní kɛ̀ɛ̀ bíɛ́kɛ̀ kó kuyɑɑkù kùù pùɔ̀ Tɑdisisi kóo bɑ̀tóòbɛ̀ diɛbɛ̀.

⁹ Ti kèè dɛ̀ ti dɛ nyɑ̀. Kuyie Mpɑkɛdɑɑ ɛì, Kuyie nhɛì, kuù dì kpénkùnnɛ sɑ̃́ɑ̃̀.

¹⁰ Kuyie nti wɛ̃̀tɛ kɛ yɑumu ɑ sɑ̀ɑ̀ nhɑ cĩ́ɛ̃̀tɛ̀ miɛkɛ.

¹¹ Kuyie nhɑ yètìrì pitɛ́mɛ̀ kutenkù, ɑ sɑ̃nni tùɔ̀kɛmu itemmɑ̀nkɛ, kɑ̀ɑ bekù kɛ dɛ̀ sìɛ́.

¹² Siyɔ̃ɔ̃ tɑ̃rì kɔbɛ, nyɑ̃nkunɛ̀! Kɛ̀ dɛ̀ nnɑɑti Sudɑɑ ɛkɛ̀ kɔbɛ Kuyie mbeéntì kpɛ́í.

¹³ Fitɛ́nɛ̀ Siyɔ̃ɔ̃ ɛì kɑɑnnɛ̀ o dèrɛ̀ mɑ̀mɛ̀.

¹⁴ Kɛ wéntɛ́ o duotí kɛ́yɑ̀ o cɛ̃kperí, kɛ́nɑ kɛ́nɑ́kɛ́ di yɑɑ̀bí,

¹⁵ kɛ dɔ̀: Kuyie nkuù ti te kɛ yó nti ni nɛ̀ ti kṹṹnko.