Yɛsɑ̃ɑ̃ 56

¹ Bɛ̀dèmbɛ̀ kóo kótì dìèmmɛ̀ fɛyɛ̀nfɛ̀ Fidisitɛ̃ɛ̃bɛ do pĩ nDɑfiti Kɑti kó dihɛì kòo dentɛ̀ fɛ̀. Bɛ̀ fɛ̀ dìènnɛ̀ mɛ̀ɛ̀ tɑmmɛ̀ dònnɛ̀ dikpɛtinɔ́nkperi kó didɑbònnì ndi, dìì yìɛ̀ní dɛdɛ́tirɛ̀.

² Áú! Kuyie n kuɔ́ mmɛsémmɛ̀, bɛ̀ m bɛ̀tìmu, kɛ n dimmù kɛ n dokùnɛ̀ yɛwe yɛmɔu.

³ N kpɑntídɛ̀ntɔbɛ̀ m bɛ̀tì yɛwe yɛmɔu ndi, bɛ̀ sũmu bɛ̀ɛ̀ n dimmù kɛ n dokùnɛ̀ tɛfentɛ̀.

⁴ Kufɔ̃wɑɑ́ nhɔ̃ɔ̃ m pĩ́, kɛ̀ n duɔ́ fɔ̃́ nwe mmɑ́ɑ̀.

⁵ N sɑ̃ntímu Kuyie nku nɑ́ɑǹtì kpɛ́í, n ku nduɔ́ mmɑ́ɑ̀ n yí yĩɛ̃̀kù dɛ̀mɑrɛ̀, bɛnìtìbɛ̀ bo nɑ kɛ́ n dɔɔ̀ bɑ?

⁶ Yɛwe yɛmɔu bɛ nɑ́ɑǹtì ǹ kɔɔ́nnɛ̀mu, bɛ̀ n wɑntinɛ̀ mɛyɛi mmɛ.

⁷ Bɛ̀ dɑ̀kiimu kɛ m pɑkíí, bɛ̀ tũ n nɑɑ̀cɛ̀i nsi kɛ dɔ́ kɛ́ n kuɔ.

⁸ Bɛ̀ bo dɔ̀ɔ̀ mɛyɛi mmiɛ nkɛ́nɑ kɛ dɑ yentɛ́nɑ̀ɑ̀? Kuyie, mbɔ mbɛ nɛ̀ kɛmiɛkɛ.

⁹ A yɛ̃́mu nh ɑrì mɛ̀ɛ̀ botí, ceé n nɔnniɛti ɑ dɔukù miɛkɛ, ɑ ti wɑ̃̀rimu ɑ pɑ́tíri miɛkɛ.

¹⁰ Kɛ̀ n dɑ yu n dootitɔbɛ̀ ɔ̃ɔ̃ cokɛ́mu, Kuyie, n yɛ̃́mu ɑ n kómmúmɛ̀.

¹¹ Kuyie n dɑ sɑ̃ntímu ɑ bɛ́i ntì kpɛ́í, n Yiɛ̀ nKuyie n dɑ sɑ̃ntímu ɑ nɑ́ɑǹtì kpɛ́í.

¹² N dɑ duɔ́ mmɑ́ɑ̀ ndi n yí yĩɛ̃̀kù tìmɑtì, bɛnìtìbɛ̀ bo nɑ kɛ́ n dɔɔ̀ bɑ?

¹³ Kuyie ndò nkɛ́dɔɔ̀mu n yɛ̃ n yóó dɑ dɔ̀ɔ̀ tì, n yóó dɑ fíé disɑ̃nni kó iwũɔ̃ nyi.

¹⁴ Fɔ̃́ɔ̃̀ n dɛɛtɛ́ nɛ̀ mukṹṹ, fɔ̃́ɔ̃̀ n teennɛ̀ kɛ̀ n nɑɑ̀cɛ̀i í bètɛ́, kɛ̀ dɛ̀ bo yie nkɛ̀ nni nkérí ɑ ììkɛ̀, kɛ wúó mmɛnɑ́ɑ̀.