Yɛsɑ̃ɑ̃ 6

¹ Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ kubómbonku iwɛ̃ĩ ini kɔku.

² Kuyie nhɑ bɑ́ m potɛ́ nɛ̀ kɛmiɛkɛ, ɑ bɑ́ n tiénnɛ̀ kumiɛpíɛ́.

³ N Yiɛ̀ nKuyie, n kuɔ́ mmɛsémmɛ̀, n cĩ̀tɛmu, n Yiɛ̀ nKuyie, m miɛkùnnɛ n kṹɔ̃̀ í pĩ́ nyɛtɔbɛ̀.

⁴ N yí yɛ̃́ m bo tìì miɛkɛ. N Yiɛ̀ nKuyie dɛ̀ yó nkɑ̃́ɑ̃́kɛ́ dɛ kɑ̀ɑ n teennɛ̀?

⁵ Áú n Yiɛ̀ nKuyie, bónkùnnɛ ɑ miɛkɛ kɛ́ n dɛɛtɛ́! N coo nhɑ sɑ̀ɑ̀ nkpɛ́í.

⁶ Bɛcíríbɛ̀ dɑ yɛ̃̀mmu, we mbo dɑ sɑ̃ntɛ kudɔnkù?

⁷ N kuɔ̀mmu kɛ cĩtiroo, bɑ́ kɛ̀ɛ̀ yènkɛ̀ nh ɔ̃ nkuɔ̀mmu kɛ̀ n dɔ́ùu búútɛ́, n dɔ́ù diì sɑ̃̀ɑ̃̀kɛnɛ̀ tinɔnniɛti.

⁸ Mɛsémmɛ̀ mɛɛ̀ te kɛ̀ n nuɔ ncĩ̀tɛ, n dùɔ̀ntɔbɛ̀ bɛɛ̀ sũ kɛ̀ n nuɔ nhɔ̀u.

⁹ Fũtɛnɛ̀ m borɛ̀, díndi bɛ̀ɛ̀ dɔ̀ɔ̀ri mɛyɛi, ti Yiɛ̀ nKuyie nkèèmu n dɑbònnì.

¹⁰ Ti Yiɛ̀ nKuyie nkèèmu n sɑ́útìi, kɛ cɔutɛ́ m bɑ́ɑmmìi.

¹¹ N dootitɔbɛ̀ kufɔ̃wɑɑ́ nkuù bɛ̀ pĩ nkɛ̀ bɛ̀ di ifɛi, kɛ̀ bɛ kɔ̃̀ntì ɑu, kɛ̀ bɛ̀ cokù mɛcɑ̃ɑ̃ nnɛ̀ ifɛi kɛ wɛ̃ti.