Acts 18

1 Hitahun haratu, Paul mo malue Athens mo sivo Corinth. 2 Ale mo tapala peresi na Jew matea hijana Aquila mara Pontus matea sei mo pa tai Italy purongo peresi narouna Priscilla, matan Claudius, supe matan Rome, mo retileu vara Jew tari la malue Rome, 3 ale matan Paul, enia nona voko mo sohera la lo vai na tent, ale mo lo toho peresira mo lo voko peresira. 4 Ale na Sabbath hatehateahi, Paul mo lo retivujavujangi isana Jew peresi na mara Greek na nora ima lotu ale mo lo vaihitea vara la levosahia vara Iesu enia hare. 5 Silas enia Timothy lara la tai Macedonia la pala, Paul mo tau vevuhi na nona rani mata retivujavujangi na reti non God, ale mo lo vereulia isana Jew tarea vara Iesu enia KrÌisto atu la lo kilau matana. 6 Pani Jew lara la rÌohu hinia, ale la verelejlejia. Paul mo vai na tovongi matea mo vujangi na nona rÌohu hinira hin haratu mo sarÌsarÌhi narÌihi na tangotango na nona ruru ale mara, “RÌaemim i pa toho na patumim, mo sopo te noku hinau hinia! Mo tapulo nake, a pa vano isana tamlohi rÌorÌoha!" 7 Moiso, Paul mo malue hin nora ima lotu atu mo vano mo unu na ima matea mo lo toho na pahisan ima lotu atu, enia iman Titius Justus, tamlohi rÌorÌoha matea pani enia mo lo lotu God. 8 Pani Crispus, tamlohi aulu mata ima lotu atu, enia peresi na vao imana sohena la rasu Moli. Mara Corinth tinapua hai sei la rongo hinau atu, la rasua, ale la lavi na paptijo sohera. 9 Ale Moli mo vujangi Paul na hinau matea sohena mavuho matea hin vutepongi atu, mo verea isana mara, “O sopo matahu, o retireti, o sopo puni na jingom, 10 matan enau na lo toho peresiho, ale tea i sopo erÌi tikeli na epem vara i komoho, matan noku tamlohi hin taon tavera nike la marÌivi." 11 Matan haratu, Paul mo lo toho atu mata tauni matea vitu mo limarave, mo lo vujangi na reti non God isara. 12 Ale hin rani atu Gallio mo lo aulu hin Achaia, Jew la pulutahi jara matea la vai na vao tavera matea, ale la turuleji hin Paul, la taurilatia la vaia mo turu na naho jara aria vara la aria 13 lara, “Tamlohi akerihi mo lo verea isana tamlohi vara la lotu God na malele matea mo sopo usuri na posposi sei leu non Moses mo lo verea." 14 Paul mo tatamahu vara i pa retireti pani Gallio mo verea isan la Jew atu mara, “Vara hinau akerihi enia mata tope na leu matea, teni matan te varÌen sasati, i pa tataholo vara a tapurongo isamim Jew matana, 15 pani matan enia mata nomim retireti peresi na hija tamlohi peresi na nomim leu, kamim purongo ha vai tataholoia. A pa sopo ari na hinau sohena." 16 Ale mo vai na nona tamlohi la sohai narÌihira na nona jara aria. 17 Ale vao atu la taurilati Sosthenes, tamlohi aulu mata ima lotu nona Jew, ale la tapulo tamajia na naho jara aria atu purongo, pani Gallio mo sopo kilaura hinia. 18 Paul mo mele toho Corinth mata rani matuvana moiso natu mo vere enrÌa vuho isana vorai peresi na vevorai kalesia atu. Ale mo vele na boti matea peresi Priscilla enia Aquila matan vara la vano Syria. Paul mo hiri narÌihi na vuluna hin rani atu la pa lo toho Cenchreae mata vujangia vara mo vai vevuhi na nona retitauhi. 19 Na rani la pala Ephesus, Paul mo tinarÌihi Priscilla enia Aquila la pa lo toho atu. Ale enia mo sahe mo unu na ima lotu nona Jew, ale mo retivujavujangi isara. 20 Mara Ephesus lara la usia vara i toho peravu isara, mo verea isara mara mo vono, 21 pani mo vere enrÌa vuho isara ale mara, “Vara na masalon God, a pa mele mai isamim.” Moiso la mele vele hin boti atu, la malue Ephesus. 22 Ale lara la hoso Caesarea, Paul mo sahe Jerusalem vara i sile na retioloolo isana vao kalesia ea tiroma, moiso mo pa sahe Antioch matan Syria. 23 Mo lo toho atu mata makomo rani, moiso mo mele malue mo sahe mo rÌalihi na jara matan Galatia enia Phrygia vara i vai na tamlohi usuri hin la jara atu la mele rÌilangi. 24 Hin pongi atu Jew matea hijana Apollos mara Alexandria mo pala Ephesus. Ale enia tamlohi sorasora rÌuhu matea mo levosahi mamahuni na Retitapu. 25 Mo lavi na nona levosahi matan Moli moiso, ale maurina mo lo vujangi na nona avulahi na nona retireti peresi na vujangi tataholo rÌuhu na hinahina vararÌuhu hin Moli, pani nona levosahi mo tikeli na paptijo non John purongo. 26 Mo tapulo na nona retireti na lolo ima lotu nona Jew mo sopo te matahu hinia. Pani Priscilla enia Aquila lara la rongoa, la tovi rÌorÌohia vano hasena, ale la vere tataholoi na malelen God isana. 27 Hitahu, Apollos mara mo opoia vara i sivo Achaia, vorai kalesia peresi na vevorai kalesia la retituetuenia vara i vaia. Ale la uli na leta matea isana vorai kalesia Achaia vara la lavia. Mara mo pala isan la haratu la rasua atu, mo tuenira mo tavera usuri na rÌomrÌuhu non Moli, 28 matan mo vilijovjovi vevuhi na rÌomrÌomi nona Jew na naho tamlohi. Ale mo vujangira usuri na Retitapu vara KrÌisto atu enia Iesu.