Matthew 25

1 “Hin pongi atu, mauri atu God mo aulu hinia i pa sohen harÌai maevo mo sangavulu sei la lavi na nora lamu potele la vano vara la tapai na tamlohi i pa lahi. 2 Mo lima hinira la rongorongo vono, ale mo lima la lelevosahi. 3 Matan la haratu la rongorongo vono lara la lavi na nora lamu potele, la sopo lavi te wel matara, 4 pani la haratu la lelevosahi la lavi na potele wel peresi na nora lamu potele. 5 Ale tamlohi vara i pa lahi mo sopo mai vila, ale la harÌai maevo tari atu la tapulo peka, ale la juruvi. 6 Pani na livuha vutepongi la rongo na leo matea mo ulo mara, ‘Tamlohi i pa lahi nahai. Ha mai ha tapaia.’ 7 Ale la harÌai maevo atu la kilau, ale la tai narÌihi na korukoru pingo ruru na nora lamu potele vara lamu la mele memera i rÌuhu. 8 Pani la haratu la rongorongo vono, la verea isan la haratu la lelevosahi lara, ‘Ha sile te nomim wel makomona isamam matan nomam lamu potele la lo tapulo mate.’ 9 Pani la haratu la lelevosahi la rÌaramira lara, ‘Wel mo sopo tataholo hinirÌa mo isoiso. Ha vano na stoa ha voli te nomim!’ 10 Ale la pa lo vano vara la voli tea, tamlohi vara i pa lahi mo pala, ale la haratu la lo tatamahu la usuria la vano na hanhani lahi, ale la pelatihoro na matarua. 11 Mo sopo tuai la harÌai maevo tinapua atu la pala lara, ‘Tamlohi tavera! Tamlohi tavera, o roi isamam!’ 12 Pani mo rÌaramira mara, ‘VararÌuhu na verea isamim, na sopo levosahi kamim.’" 13 Iesu mo mele verea mara, “Matan hinau atu ha tatamahu, matan ka sopo levosahia vara sava rani teni aoa Natun Tamlohi i pa mele mai hinia." 14 Mo mele verea mara, “I pa sohena tamlohi matea mo vano na nona hahau matea. Mo tovi na nona slev, ale mo tau na nona hinahinau na limara. 15 Isan matea, mo silea na selen mo lima. Selen matea hinira, mo tataholo mata voli tamlohi matea mata voko mata rani i tari vahatea (1,000). Ale isan matea mo sile na selen mo rua, ale isan matea mo sile na selen matea. Mo silea isara mo tataholo na nora erÌia, moiso mo malue mo vano na nona hahau. 16 Haratu mo lo sile na selen mo lima isana tiroma, mo vano vahatea mo voko peresia, ale mo mele tikeli na selen mo lima tinapua. 17 Haratu mo lo lavi na selen mo rua mo sohena mo mele tikeli na selen mo rua tinapua. 18 Pani haratu sei mo lo lavi na selen matea, mo vano mo heli na koko matea na lepa mo tavuni jarohi mania atu non nona tamlohi tavera. 19 Rani matuvana la vano moiso, ale tamlohi tavera non la slev atu mo mele hilu vara i levosahia vara la vai na sava hin la mania atu. 20 Ale haratu mo lo lavi na selen mo lima mo juha mai isana, mo lavi na selen mo lima tinapua hin la haratu mo lo lavira tiroma mo verea mara, ‘Tamlohi tavera, ko sileau na selen mo lima; ale na mele vai na selen mo lima tinapua.’ 21 Ale nona tamlohi tavera mo verea isana mara, ‘Ko vai na voko rÌuhu. Ko rÌomturu rÌilangi na nom makomo hinau, ale nake a pa tauho o aulu na hinau mo marÌivi. O unu na avulahi tavera non nom tamlohi tavera.’ 22 Ale haratu mo lo lavi na selen mo rua mo juha mai isana, mo lavi na selen mo rua tinapua hin la haratu mo lo lavira tiroma mo verea mara, ‘Tamlohi tavera, ko sileau na selen mo rua; ale na mele vai na selen mo rua tinapua.’ 23 Ale nona tamlohi tavera mo verea isana mara, ‘Ko vai na voko rÌuhu. Ko rÌomturu rÌilangi na nom makomo hinau, ale nake a pa tauho o aulu na hinau mo marÌivi. O unu na avulahi tavera non nom tamlohi tavera.’ 24 Ale haratu mo lo lavi na selen matea mo juha mai isana mo verea mara, ‘Tamlohi tavera, na levosahia vara engko tamlohi rÌilangi matea, ko lo lavi na vua pahai engko ko sopo lavoa. Ko lo takonahi na wit na jara engko ko sopo haporÌahi tea ea, 25 ale na matahu, na vano na jarohi na nom mania na lepa. Nahai, o mele lavi na sava enia nom.’ 26 Pani nona tamlohi tavera mo rÌaramia mara, ‘Engko tamlohi sasati, ko slev maloko vari. Ko rÌomi vara enau tamlohi rÌilangi matea, ale na lo lavi na vua pahai na sopo lavoa, ale na lo takonahi na wit na jara na sopo haporÌahi tea ea? 27 Vara mo sohena, i pa mele rÌuhu jea vara o lo tau na mania isana tamlohi bank matan vara a mele pala a pa erÌi lavi na noku mania peresi haratu makomona bank i pa mele silea aulu na noku mania.’ 28 Ale mo verea isan te nona slev tinapua mara, ‘Ha lavi narÌihi selen atu isana, ha silea isan haratu mo lavi na selen mo sangavulu, 29 matan isan la haratu la lavi te hinau, la pa mele silera hin te hinau, ale i pa masurere isana. Pani isan haratu mo lekoleko, sava enia nona tiroma i pa lavi narÌihia. 30 Ale ha pulahi slev atu mo sopo rÌuhu hin te hinau hatea i vano na jara rÌorÌoha. Hin jara atu la pa tangtangi, ale la pa ngarÌngarÌori na hurÌura mata hajhaji ea.’ 31 Na rani vara Natun Tamlohi i mai na nona sasarami peresi na angelo tari, hin rani atu natu i pa sakele na nona jara sakele mata suiha nona Supe. 32 Mara jara tinatinapua na varama la pa turu na nahona moiso i pa asera hatehateahi sohena tavui sipsip matea mo lo ase na pulana sipsip na nani. 33 Ale i pa tau na sipsip na matuana, ale nani na marauna. 34 Ale i pa verea isan la haratu na matuana vara, ‘Ha mai, kamim sei Tamaku mo lerÌuhu hin kamim! Ha lavi mauri atu God mo aulu hinia sei mo tau mamahunia matamim tuai tiroma moiso mo pa vai na varama. 35 Matan na marohati ka sileau na hanhani, na marÌohu ka sileau na inu, enau na vinano matea ka toviau na imamim, 36 mo sopo te noku ruru ka sileau na ruru, na rojo ka mai ka rohiau, na lo toho na ima rÌilangi, ale ka mai ka hiteau.’ 37 Moiso la tamlohi tataholo atu la pa rÌaramia vara, ‘Moli, nangisa kama hiteho ko marohati, ale kama vahaniho, teni ko marÌohu, ale kama sileho na wai? 38 Ale nangisa natu, kama pa hiteho ko vinano, ale kama toviho na imamam, teni ko malamala, ale kama ruruho? 39 Ale nangisa natu, kama hiteho ko rojo teni ko lo toho na ima rÌilangi, ale kama rohiho?’ 40 Ale Supe i pa rÌaramira, vara ‘VararÌuhu na verea isamim, na rani ko vaia te hinau mo rÌuhu isan te voraiku teni te vevorai rihirihi hatea, ko lo vaia isaku.’ 41 Ale i pa verea isan la haratu na marauna vara, ‘Ha malue na nahoku, kamim ka lo toho na ruhuruhu lesati, ha unu na hapu matan tui tui atu na tatamahunia matan Tiapolo peresi na nona angelo sati, 42 matan na marohati, pani ka sopo sileau hin te hanhani, na marÌohu, pani ka sopo sileau hin te wai, 43 enau na vinano matea, pani ka sopo toviau na imamim, enau na malamala, pani ka sopo ruruau, na rojo, ale ka sopo mai vara ha rohiau, ale na lo toho na ima rÌilangi, pani ka sopo mai isaku.’ 44 Ale enira sohena la pa rÌaramia vara, ‘Moli, nangisa natu, kama hiteho ko marohati, teni ko marÌohu, teni ko vinano matea, teni ko malamala, teni ko rojo teni ko lo toho na ima rÌilangi, ale kama sopo tueniho?’ 45 Ale i pa rÌaramira vara, ‘VararÌuhu na verea isamim, matan ka sopo vai te hinau rÌuhu isan te voraiku rihirihi hatea ka sopo vaia isaku.’ 46 Ale la haratu, la pa vano la unu na talai matan tui tui, pani la haratu la tataholo la pa unu na mauri tui.’” Dan 12.2