Zelemi 1

1 Sɛʋɛi nii ɠa Yilikiya ná-doun zunui Zelemi laawooiti ta ná-kɛɛwotiiti suɠulazu. Zelemi ɠɛni ga zalaɠa ɠula wolodai zu loin ta Anatɔte taa wolai zu, Ɓɛnzamɛn yooi zu. 2 Ɠɔoɠɔ GALAGI ɓɔɛni pɔ, Zoziase ná-masadai ma ɠona puugɔ maazu zaʋasiɛi (13) ma, Amon ná-doun zunui, Zuda yooi zu masagi. 3 É ɠɛni ɠana nɔ, Zoziase ná-doun zunui Yeɠoyakime ná-masadai ma ziɛgi zu, Zuda masagi, eyɛsu Sedesiyase ná-masadai ma ɠona puugɔ maazu ɠilagi (11) ɠaaɓelazuʋɛ, Zoziase ná-doun zunui, Zuda masagi, eyɛsu ma alugi lɔɔlusiɛi ma, ti liini ga Zeluzalɛme nuɓusɛiti duɔlai zu. 4 Ɠɔoɠɔ GALAGI ɓɔɛni pɔ̀, é ɠɛ mà: 5 «Aisa gè ʋa è ɓɛtɛ è-lee ɠoozu, gè ɠɛni è ɠwɛɛ, aisa è ʋa zɔlɔɔ, gè è zeɠeni ga nɔ̀nɔ, gè yeelo è ʋa ga dàawooi wo nui ziiti ma.» 6 Gè gooɠaaʋoteni, gè ɠɛ ma: «Ee, Màliɠii Ɠɔoɠɔ GALAGI! Gè la zooni ɓɔɛzu kɛlɛzu ɲɛgɛlɛin, mazɔlɔɔ zunu loungo nɔ ɠa ga ze.» 7 Kɛlɛ Ɠɔoɠɔ GALAGI gòoɠaaʋoteni, é ɠɛ mà: «Mina ɠɛ mà: ‹Nà ga zunu loungo nɔ.› È maanɛɛʋɛ è li naati kpein pɔ bɛ, niiti gè è leʋesu ti ma, è naa wo ti ma, nii gè è levezu ma. 8 Mina lua ti ʋa, mazɔlɔɔ nà è ʋa, gè è ɠizo,» Ɠɔoɠɔ GALAGI wooi ɠana. 9 Naa ʋolu, Ɠɔoɠɔ GALAGI yeemaaleni, é vɔɔɠu dàaʋɛ ʋa, é ɠɛ mà: «Wɛlɛ, gè dàawooiti pua è-la. 10 Wɛlɛ, za, gè keela wooi vea è ya, é ʋilɛ ziiti ba ta masadaiti, è ti lɔɔɠula, è ti ʋu ya, è ti ɠoloɠolo, è ti ɠaaʋala ba, kɛlɛ ɓalaa, è ti lo ʋolu, è ti zin ʋolu.» 11 Ɠɔoɠɔ GALAGI ɓɔɛni pɔ̀, é ɠɛ mà: «Zelemi, leeni ɠa è kaazu?» Gè gooɠaaʋoteni, gè ɠɛ ma: «Amande gului ma ɓekegi ɠa gè kaazu.» 12 Ɠɔoɠɔ GALAGI ɠɛni mà: «È kaaʋɛ ga pagɔ, mazɔlɔɔ nà wɛlɛzu gòoi ma nii gè bogai, gè pilɛsu.» 13 Ɠɔoɠɔ GALAGI niima wooiti boni mà, ná zeizu velesiɛi, é ɠɛ mà: «Leeni ɠa è kaazu mɔnɔ?» Gè gooɠaaʋoteni, gè ɠɛ ma: «Diɠii ɠa gè kaazu, é ɗa nɛ, maalaagɛ ga pɔ̀ pelei, é ɗa zeɠe ga lɛkpɛmaʋɛ nu ɠɔʋɛzu ʋelei.» 14 Ɠɔoɠɔ GALAGI ɠɛni mà: «Lɛkpɛmaʋɛ nu ɠɔʋɛzu ʋelei ɠa maanɔɠɔi zeɠezu ná, é ʋa é lɔ zooi nii zu, nuɓusɛiti kpein unga. 15 Mazɔlɔɔ nà ʋaazu bolodaiti kpein tolisu, niiti ti lɛkpɛmaʋɛ nu ɠɔʋɛzu ʋelei ma masadaiti su,» Ɠɔoɠɔ GALAGI wooi ɠana. «Ta ʋa, ti ɠilagilagi ti ta-masagiti seizuʋɛ ɓɛtɛ nu lɛɛzuʋɛ Zeluzalɛme siɠidaʋɛti, ta ná-siɠigiti ma, ta Zuda laa wolaiti kpein su. 16 Nà nà-tukpɔi ɠaaleʋe zooi nii zu nuɓusɛiti daalɔɠɔma, faa ɲɔi kpein faa zu ti kɛɛni, tɔɔzei ti ɠɛlɛni bà, nii a kɛ ti ɗa zalaɠai ɠula gala kiligiti bɛ, ta ti ɗa nɔkɔ gala kiligiti bu, niiti ti ti ɓɛtɛni ɓɔɠɔ ʋɛ. 17 «Zelemi, ɗɔun wuzeɠe, è zaamaɠili, ɗa naa kpein bo ti ma, nii gè è levezu ma. Mina ɓali ti ɠaazu ga dualuagi, nà ʋa è zuɓali ti ɠaazu. 18 Wɛlɛ, é zo za ma, nà gaaɓaai veezu è ʋɛ, eɠɛ taa wolai siɠigi ma, eɠɛ kɔlu lɔkpalai, eɠɛ kɔlu ɓɔi siɠigi zooi pɛ gaazu: Zuda masagiti gaazu, ná-kundiɠi wolaiti gaazu, ná-zalaɠa ɠula nuiti gaazu, ta ná-nuɓusɛiti kpein. 19 Ta kɔɔi ʋɛɛ è ʋa, kɛlɛ ti la pilɛ sɔlɔɔga è ma, mazɔlɔɔ nà è ʋa ga gè è unmɔɔ,» Ɠɔoɠɔ GALAGI wooi ɠana.