Zɔɓe 23
PBT1 Zɔɓe gooɠaaʋoteni, é ɠɛ ma: 2 «Za mɔnɔ nà-kpaazaɠa wooi ɠa ziiɠaawanai wuzeɠezu, nà ɠaaɓaazu gè nà-kpee wooi zuzo. 3 Ni nà la zoo gè kwɛɛ, ʋɛ nà GALA ka ná, nà la li, gè zeeli seizuʋɛ. 4 Nà la nà-gaamai lɛɛ la, gè dàaʋɛ laave ga goozuɠulagi. 5 Nà la ná-goozuɠulagiti kwɛɛ, nà la kwɛɛ naazu nii é wɔinni é bo mà. 6 Toɠa kpɔɛi ʋɛɛ bà, ga suvikɛi kpein ɓaa? Ɓa, naa la ɠɛa! Kɛlɛ tɔun ka dama ga ze. 7 Toɠa kwɛɛ ga zunu ʋe sɔlegai é woozuɠulasu tɔun bɛ, naazu, nà-tukpɔɠaaleʋe nui ɠa dɛɛ ga nà ga sɔbalala nu eyɛsu ɠɔ. 8 Kɛlɛ nà liina folo ɠulazu ʋelei, é la miná. Ni nà liina folo liizu ʋelei, gè la kaazu ná. 9 Ni nà gaiziɛna lɛkpɛmaʋɛ nu ɠɔʋɛzuʋɛ, gè la zooga pɛtɛsu. Toɠa lɔɔɠuzu lɛkpɛmaʋɛ nu yeezazuʋɛ ɓaa? Gè la dɛ zooʋini ma pɛ! 10 Anɛɛ naa ʋe, pelei nii gè ziɛzu la, é naa ɠwɛɛ. Siɛgi zu é dɔ̀ɔzu la ʋoluɠulai zu, nà ɠula su ga ɲàdegai eɠɛ zanugi. 11 Mazɔlɔɔ gè ziɛni siɛnɔpɛ su ga kɔɠɔ ʋogi. Gè ziɛni ga ná-pelei nɔ, gè la zeɠeni ba pɛ. 12 Gè la ɠɛlɛni ɠolozu ná-deveiti bɛ. Gè zìima vaiti zɛni ná, gè ɠolo daawooi ʋɛ. 13 Kɛlɛ tɔun, siɛgi zu a devena la, ɓɛ ɠa a seɠe ma? Nii kpein wɔinɗai la, toɠa ɗa naa ɠɛ. 14 Ungo, devei é boga é ʋilɛ nɔ̀un ba, toɠa naa laazeeli, ta taɠiligaani ti kisu. 15 Naa ɠa é ba, dàavegɛ ga dualuagi tɔun gaazu. Nà ɠɛna ɠigaiziɛ su, nà ɗa nɔ wola lua. 16 GALA ge ìɲɔteʋea, Zɛbɛi-Pɛ-Maliɠii dàavegɛ ga dualuagi. 17 Mazɔlɔɔ kuai laade, é ʋa dɔ̀ maaɠɛkpɔgi zu, ɓaa kpidii nii pɛai ma.»