Tɛnɛ Faalaaliiti 27

1 Mina ɠɔmazei ga nii a ɠɛ lina, mazɔlɔɔ è la naa ɠwɛɛ, nii é ɠɛɛzu za. 2 È-laaʋɛ mina è maamusɛ, nu ɠiligiti zɛ ná, ti kɛ. Nu ɠiligi naa ɠɛ, ɗa ɓɔɠɔi è-laaʋɛ mina kɛ. 3 Kɔtui wuiʋɛ, ɲaɠaegi wuɲɛgi wui, kɛlɛ ziiɠaawanai ɠimalala nui buzeɠezu, naa wuiʋɛ ti felegɔ pɛ ba. 4 Ziiɠaawanai ɲɔuʋɛ, ziiɠulagi ɠeɠaaɓa, kɛlɛ ɓɛ ɠa a lo toloi luɠɔ? 5 Fizɔgɛ è zelii lo nui ma kɛlɛi zu, è ʋa maaɠɛ kpɔ bɔɔla vai ma. 6 Nu wɔɔlai ná-zelilomai, ɠa ná-wooɠɛɠiladai lɛɛzu, nu zili nui è nɛɛnɛ vai, naa ɠa ga yaava vaa nɔ. 7 Ziɠo nui ɠa ɗa ɠɛlɛ kɔin gulɔi ʋa, pulu nui ɠa ɗa ani wanai ɠa ga ɲɛmigɛ. 8 Siɛziɛ nui maa ɠa ɠoozana seizuʋɛ ʋa, kɛɛʋɛ eɠɛ wɔnii maaɠoozaai ná-daɠagi ʋa. 9 Gulɔi ta gulɔ maku nɛɛnɛgi, ta ɗa nu yiiɠaanɛ, bɔɔla vai ná-gaanɛɛi ɠa ɗa koozunɛɛi ve nu ya, é leʋe ɗa ɓɔɠɔ ɛnɛkɛgi ʋa. 10 Mina ɓeteʋe è-wɔɔlaiti ba, ta è-ɠɛɛ bɔɔlaiti. Ni ɗa ɠɛna faaɓaagi zu, mina ɓizɛ, è ʋa li è-ɠɛɛloin ʋɔ bɛ, mazɔlɔɔ siɛ mɔinmɔin su, è-zeiɲɔɠɔi maaɓuɠaai è ʋa, naa vizɔgɛ é leʋe è-ɠɛɛloin ʋa, maaɠoozaai è ʋa. 11 Ziɛ ga ɠimalai dòun zunu, zìimaʋɛ laa ɠa ve ga koozunɛɛi, nà zoo gè naati gooɠaaʋote, niiti ti vaazu mà. 12 Ɠima nui ɠa ɗa maanɔɠɔi ɠa é ʋaazu, é lɛkpɛ tuɠɔ, kɛlɛ nui é la dɛ faa mɔinmɔin kwɛɛ, naa ɠa ɗa ziɛ ná ɠobaʋɛ, é ma ɓɔlɔi zɔlɔɔ. 13 Ni nui ta a ɓɔɠɔ ɠɛna ga zeelaga è ʋɔ bɛ, é ʋilɛ nui ta ná-kuye vaa ʋa, nii è la kwɛɛ, ná-seɠei zeɠe ga kpɔunmai, nui naa ná-faa zu, nii è la kwɛɛ. 14 Ni nui ta a tuya loona seiɲɔɠɔi ʋɛ, é wooɠula la sobuzobui, toɠa leve bɛ ga foovooi. 15 Kpɔɛleʋe anzanui ɠɛɛʋɛ eɠɛ ziɛi, é ʋilɛsu peinpein, maa la leʋezu tonai ʋa voloi. 16 Ɗa wɔinna ga è gaaɓɛ, kɛɛʋɛ eɠɛ ɗa ɠɛ fiilɛi zosu ga yeei, ɓaa è gulɔi ʋu yeaʋɛ ga è makɛ. 17 Kɔlui ɠa ɗa kɔlui ɠaali, nui ɠigi ɠaazu ɠa ɗa zeɠe ma, seiɲɔɠɔi ná-siɛpolui ʋɔ. 18 Zɔi é wɛlɛzu kooleɠoole gului ma, toɠa ma waai ta mi, zɔi é maliɠii makɛsu, toɠa lɛbiya zɔlɔɔ. 19 Ʋelei nu ɓɔɠɔ ɠaazuʋɛ ɠaazu la ziɛi wu, ʋele ɠana nu ɠigi a ɗa è-ʋaaɠulabai lɛɛ la. 20 Gɔvɛalaazu ta undaaʋili zeɠezaɠai ti zulaa la vega, zekana é la, nuɓusɛi yiimai laa la zeelia pɛ. 21 Wali ɠaei ta zanugi, ti ɠaa ɠa ɗa wuun ga abui, ma nɔɠɔi ʋa ɠula ba, kɛlɛ nui lukpɔi ɠaa ɠa leʋezu, é zoloo daaseigi ma. 22 Anɛɛ ni ɗa ɠimalala nui ziɠazu kodai zu ga etei, eɠɛʋelei nu a ɗa kpazii ziɠa la, è la zooga è ʋa ná-titigi ɠula ba. 23 Ɗa-loganiiti gilagilagi ɠɛʋelei ɠwɛɛ ga pagɔ, ɠaaɓa gola ɗa-logani ɓulugiti ma. 24 Mazɔlɔɔ kpɛtɛi la zeeyɛga ma eyɛsu ɠɔ, masa bɔɔlɔgi la yɛga nu unba yeenɔpɛ. 25 Siɛgi zu è tufa vɔɔi leʋezu la, tufa wundui ɠa ɗa wuzeɠe, gizeiti ma lufaiti gaa ɠa lɛ ba, 26 ɗa-ʋaalagiti maaleɠaiti ta ɠɛ ga è maaɠili zɔɔlaiti, boliiti ta ɠɛ ga ɗa-ɓalagi ɠeya aniiti, 27 boliiti ta-ɲiimiɗɛi maanɛɛʋɛ, é kula ɠɛ ga è-laamianigi, wa ɗa-ʋɛlɛyeɠei, ta ɗa-wotiɠɛ anzanuiti maavaiti.