Guyeiti 103

1 Davide ná-guyei. Nà-nuɓusɛlai pɛ ge Ɠɔoɠɔ GALAGI maamusɛ! Kɛ̀ʋelei pɛ ge daasei ɲadegai mama! 2 Nà-nuɓusɛlai pɛ ge Ɠɔoɠɔ GALAGI maamusɛ, gè la yeemaa ná-faanɛɛi gila kpalaa ma. 3 Mazɔlɔɔ tɔ ɠa é nà-faaɠaaza golaiti kpein suvaayɛsu, tɔ ɠa é nà-seeɓɛiti kpein kɛdɛsu, 4 é kìzoga kabayeɠei ma, é ná-wooɠɛɠiladai ta ná-maawɔinɠai ɠɛ ùnba ga bɔɔlɔgi, 5 toɠa nà-eteai laave ga undaanɛɛiti kpein, é nìinɛ eɠɛ koɠɛi. 6 Ɠɔoɠɔ GALAGI ɠa ɗa faaɠaaza faiti sala, é sɔle fai ɠɛ naati bɛ, niiti nuiti ti ti nimizazu. 7 É ná-peleiti dɛɛni ga Moize, é ná-faa wolaiti dɛɛni ga Izilayɛle nuɓusɛiti. 8 Ɠɔoɠɔ GALAGI ɠa é zaalai veezu, é ɠɛ ga maawɔinɠaa ƓALAGI, zii la ɠula fala, kpɛtɛai wooɠɛɠiladai zu. 9 É la ɗa ga zelii loga yeenɔpɛ, é la ɗa ga faawana makɛga ziimaʋɛ eyɛsu ɠɔ. 10 É la de zosu ga da-ɠotoiti kɛʋele, é la de zalazu ga da-vaaɠaaza golaiti kɛʋele. 11 Ʋele geeɠɔlɔgi maaɠooza la zooi ʋa, é zɛlɛni maazu, zekana ná-wooɠɛɠiladai wɔɔlɔai la naati bɛ, niiti ti luazu ba. 12 Ʋelei folo ɠulazu maaɠoozaai la folo liizuʋɛ ʋa, pele ɠana é da-lɔ koloɠologiti maaɠoozazu la de ʋa. 13 Ʋelei doun kɛɛɠɛi ná-dointi nɛai la bɛ, Ɠɔoɠɔ GALAGI naati nɛɛʋɛ ʋɛ ɠana nɔ, niiti ti luazu ba. 14 Mazɔlɔɔ é kwɛɛ, nii de ɓɛtɛai la, ki ka su ga da ga fufiligi. 15 Nui! Ná-eteai ʋokɔɠɔgɛ tufai ma, nii é ʋuazu dɔɓɔi zu. 16 Siɛgi zu fiilɛi ʋuuzu la ma, é ɲɛɛlɛa, adaʋɛ é ɠɛni ná, miná la mɔ faa ɠwɛɛ ná-fai zu. 17 Kɛlɛ Ɠɔoɠɔ GALAGI ná-wooɠɛɠiladai la valiboga ɠɔoɠɔ, naati bɛ, niiti ti luazu ba, ná-telebodai ɠa ná, naati ti-lounlointi bɛ. 18 Toɠa ga naati tɔnɔ, niiti ti ziɛzu ga ná-minazeɠe gooiti, ti ɠizɛ ná-deveiti su, ti ziɛ ga tiye. 19 Ɠɔoɠɔ GALAGI ná-masa kpɔkpɔgi ɠa zeini geeɠɔlɔgi zu, toɠa masadai ɠɛɛzu anii pɛ unda. 20 À Ɠɔoɠɔ GALAGI mama, wɔi wo ga ná-geezuɠeelaiti, wɔi wo zulogai zobogi zu, wo ɠolozu daawooi ʋɛ, nii é bosu wo ɗa kɛ! 21 À Ɠɔoɠɔ GALAGI mama, wɔi wo ga geezu ɠɔɔɓɔgi, wɔi wo ná-botii ma, wo ziima vaiti kɛɛzu! 22 À Ɠɔoɠɔ GALAGI mama, ná-kpɛtɛaniiti kpein, ʋɛ kpein nɔ é masadai ɠɛɛzu ná! Nà-nuɓusɛlai pɛ ge Ɠɔoɠɔ GALAGI maamusɛ!