Guyeiti 12

1 Guye loo ɠundiɠii nɔnɔi ʋe. É looni ga kɔnigi, nii galu lɔsaʋai ga. Davide ná-guyei. 2 Ee, Ɠɔoɠɔ GALAGI, kpɔbai ɠɛ! Wooɠɛɠila nu nɔpɛ ge la mɔ nuɓusɛiti saama, nu la mɔ laa nu nɔpɛ da. 3 Ɛsɛ ka seiɲɔɠɔi yaavazu, ti ɗa ɓɔɛ ɓɔɠɔ ʋɔ ga yaava lakɔlɔgiti, ta wooveledai ti-yiimaʋɛti. 4 Ɠɔoɠɔ GALAGI yaava lakɔlɔgiti ma zuwu ɠaaleʋe, ta naama nɛgi nii é waso kpɔɛiti bosu. 5 É naati ma zuwu ɠaaleʋe, niiti ti ɠɛɛzu ma: «Ade-nɛgi ɠa é ga ada-zobogi é zɛbɛi veezu ade ʋɛ. Ade-lakɔlɔgiti ka ti ɓɔsu ade ʋa. Ɓɛ ɠa a zei ade unda?» 6 Kɛlɛ Ɠɔoɠɔ GALAGI ɠɛ ma: «Bala nuiti maaʋele ma ti ti maanɔɠɔzu, ta maawɔin nuiti ti liizu ga kpalagi woga, nà ga wuzeɠe gè ti maalobo, gè kizogi ve naati zea, niiti ti ti ʋɛlɛʋilisu.» 7 Ɠɔoɠɔ GALAGI laawooiti ta ga wooiti ti ɲadegai, ti ɠɛɛʋɛ eɠɛ walii puai aniɲakai zu, é zei abui ɠa, é ɲade ná zeizu ɠɛ lɔfela. 8 Ɠɔoɠɔ GALAGI, ɗa ɓaazu è-laawooi maazu, ɗa gi makɛ, è gi ɠizo naama nui ɠilagilagi ma. 9 Faa ɲɔu ɠɛ nuiti ta leʋesu mini-o-mini, faa zuɠoloɠologi ɠa masadai ɠɛɛzu nuɓusɛiti saama.