Guyeiti 137

1 Gi ɠɛni zeini Ɓaɓilɔne ziɛ wolaiti daaʋɛ, gi ɠɛni wɔlɔzu, gi ɗa ɠigaiziɛ Siyɔn zu. 2 Gi gá-ɠɔnigiti sɛlɛni ziɛlaʋɛ wulu wolaiti ba. 3 Niiti ti vɔnini gi ma, ti li ga giye, naati ti ɠɛni gi guyeiti toona, gi zili nuiti ti ɠɛ gi ɠoozunɛ, ti ɠɛ ma: «À Siyɔn wuyei tanigaa loo gi ʋɛ!» 4 Gá la zoo ɠale gi Ɠɔoɠɔ GALAGI ná-guyei ta loo zooi naa zu, gi ná ga wɛɛin? 5 Ni nà yeemana è ma, Zeluzalɛme, zɛbɛi ɠula zèezai ʋa! 6 Nɛ̀gi ɠata dàa ɠoozuʋɛ ʋa, ni gè la mɔ ɠisiɛzu è zu, Zeluzalɛme, ni gè la è ɠɛɛni ga nà-koozunɛɛi ma un golai. 7 Ɠɔoɠɔ GALAGI, ɠizɛ naa zu, nii Edɔme nuiti ti kɛɛni Zeluzalɛme zo foloi, ti ɠɛni ɠɛɛzu ma: «À taa wolai zuvoo, à suvoo, eyɛsu é zeeli ma wuulaagiti ma!» 8 Ee, Ɓaɓilɔne, ɗa ʋaazu ɠoloɠolosu! Undaanɛ nu ɠa ga naati, niiti ti naa zalazu è ma, nii è kɛɛni ga giye! 9 Undaanɛ nu ɠa ga naati, niiti ta è-lointi so, ti ti lɛɛvɛ fasai ma!