Guyeiti 143
PBT1 Davide ná-guyei. Ee, Ɠɔoɠɔ GALAGI, woilo nà-maanɛɛnɛ wooi ma, woilo nà-fali wooiti ma. Gòoɠaaʋote deɠɛmu ɗa-wooɠɛɠiladai zu ta ɗa-lelebodai. 2 Nà ga ɗa-wotiɠɛ nui, mina tùkpɔɠaaleʋea, mazɔlɔɔ fulu nu ɠila kpalaa ge la leleboni è ɠaazu. 3 Sìli nui ɠa pòlu, é la ɓɔlɔzu, é dà zooi ma, ga é ɠɔɠɔlo mà, é sèi kpidii zu ga naati kɛʋele niiti ti zaai kaite. 4 Zɛ̀nvui ɲiikpiga kòozu, zìi ɠa loɠazu ga duai. 5 Nà ɠisiɛzu siɛgiti su ti leʋegai, gè ɠisiɛ naati kpein su, niiti è ti ɠɛɛni, gè ɠida è-yeei ná-botii ɠɛ ʋeleiti bu. 6 Gè zèeiti maalega è ma, nà ɓɔɠɔ ɠaazu è ɠakala, eɠɛ zooi fɔai. Lo! 7 Ee, Ɠɔoɠɔ GALAGI, ʋa fala, è gòoɠaaʋote! Zɛ̀nvui zeelia ɠwɛgi ma. Mina ʋoluave bà, gè ʋa ɠɛ ga naati kɛʋele, niiti ti ti-zaa ɠizei lɛɛzu niina. 8 Geelaa ɠa laona nɔ feya, ɗa-wooɠɛɠiladai lɛ ga ze, mazɔlɔɔ ɗa ɠa dàai è la. Pelei lɛ ga ze, nii maanɛai gè ziɛ la, mazɔlɔɔ gè ɠaaʋotega è ma. 9 Ee, Ɠɔoɠɔ GALAGI, ùnmɔɔ, è kùla sìli nuiti zea, nà lɔɔɠuzu è ɠobaʋɛ. 10 Kàla ga è-yiimai ɠɛɛ vai, mazɔlɔɔ ɗa ɠa è ga nà-GALAGI. Ɗa-Yɛnvu ʋagɔi lo tùɠɔ zooi zu, ʋɛ faaɓa la ná. 11 Ee, Ɠɔoɠɔ GALAGI, zɛ̀nvui makɛ, è-laaseigi wɔɔlɔ vai zu, Ɗa-lelebodai maaʋele ma, ùnmɔɔ, è kùla kidaaʋiligi zu. 12 Ɗa-wooɠɛɠiladai ʋɔ, sìli nuiti daaɠulu. È naati undaaʋili, niiti ti wɔ̀inzeɠezu, mazɔlɔɔ nà ga ɗa-wotiɠɛ nui.