Guyeiti 2

1 Leeni vaa zu zii ɠiligiti ti ɠɛɛzu unga wuulee? Leeni vaa zu ziiti pɛ ti kisiɛ ɲakaiti bosu? 2 Zou masagiti ta kɔɔi ɓɛtɛzu, kundiɠiiti ti ɗa yaavai ɓɛtɛ Ɠɔoɠɔ GALAGI laalɔɠɔma, ta ná-zunui nii é gulɔ ɲadegai ziaai ma. 3 Ti ɠɛ ma: «Ade galui vie ɓɔɠɔ ma, nii de ɠiliai la, de ta-yɔlɔɠɔiti pili ya, maaɠooza de ʋa!» 4 Kɛlɛ Maliɠii GALA ka zeini ná-masa kpɔkpɔgi ɠa, geeɠɔlɔgi zu, é ɗa ɲɛɛi wo, é ɗa ɲɛɛɠula ti zu. 5 Toɠa ɓɔɛzu ti ʋɔ, ná-ziiɠaawanai zu, é ti maalua ná-ziiɠulagi zu, é ɠɛ ma: 6 «Nà ɠa gè nà-masagi zeiɗai Siyɔn, nà-gize ɲadegai ma, gè gulɔ ɲadegai ziɛ ma.» 7 Nà devei naa lɛ adaʋɛ pɛ, nii Ɠɔoɠɔ GALAGI boni. É ɠɛni mà: «Ɗa ga dòun zunui, za, gè è ɠɛa ga dòin. 8 Zii ɠiligiti fali mà, nà ti ve è ya ga ɗɔnɔ, ɗa zooi zɔlɔɔ ga ɗɔnɔ, é li zou ɓela ga, 9 ɗa ti maaɠolo ga kɔlu lukpɔi, ɗa ti wolowolo eɠɛ pɔlɔ liɠii.» 10 Niizu, masagiti à kidafaawui ɠɛ! À ɠigi zɔlɔɔ, wɔi wo zeini eteai unda. 11 À Ɠɔoɠɔ GALAGI lɛbi dualuagi zu, à ɠoozunɛ, wo zasu ɗa ɓali gaazu. 12 À ɓɔɠɔ unmaayei GALA doun zunui ʋɛ, nii a kɛ é mina yiiɠaawana, wo undaa a ʋa ʋili, wɔi kpein wo ziɛzu ga pelei naa. Mazɔlɔɔ ná-ziiɠaawanai zuvilɛʋɛ. Undaanɛ nu ɠa ga naati kpein, niiti ti ʋoluzeizu ba, ti lɔɔɠu pɔ bɛ.