Guyeiti 21

1 Guye loo ɠundiɠii nɔnɔi ʋe. Davide ná-guyei. 2 Ee, Ɠɔoɠɔ GALAGI, masagi ɠa ɠoozunɛɛzu è-zɛbɛi zu. Ɗa-zobo sɔlɔɔ fai ɠa gola laavesu ga koozunɛɛi. 3 È ziima anii veeni zea, è la ɠɛni ɠɛlɛni, è ʋa ɓe naa veezu zea, nii é ɠɛni falizu è ma. Lo! 4 È ʋaani bɛ ga tuya ʋagɔiti. È masa bɔɔlɔgi lɔ unba nii é ga zanu kitei. 5 É zɛnvui valini è ma, è feeni zea, è sii suɠooza, eyɛsu ɠɔ. 6 Ná-lɛbiyai wɔɔlɔa, tɔɔzei ɗa-zobogi ʋɔ, nii è feeni zea, è maayikia, é ɗa volo. 7 È kɛɛʋɛ ga tuya ɗɛungi eyɛsu ɠɔ, è daavegɛ ga koozunɛɛi è ɠaazu. 8 Masagi ɠa ɓɔɠɔ ɠalivaazu Ɠɔoɠɔ GALAGI ma, nii é Anii-Pɛ-Unda, naa ná-wooɠɛɠiladai ʋɔ, é la ɲiikpiga eyɛsu pɛ. 9 Ɗa yeeʋɛɛ è zili nuiti kpein ma, è-yeezai ɠa zeeli è wɔinzeɠe nuiti kpein ma. 10 Ɗa ti ɠɛ ga abuzulugi, siɛgi zu è ɠulazu la kɛlɛma. Ɠɔoɠɔ GALAGI ɠa ti maaɓɔle ná-ziiɠaawanai zu, abui ɠa ti ɠala. 11 Ɗa ti-mavofodai undaaʋili, é ɠula eteai zu, ti-ma zuwu ɠula fulu nuiti saama. 12 Ta faa ɲɔi ɓɛtɛzu è laalɔɠɔma, ti kisiɛ ɲɔiti bo, kɛlɛ ti la zobo sɔlɔɔga. 13 Mazɔlɔɔ ɗa ti ɓɛ, ti ʋoluazo, ɗa ɗa-mɛɛin ʋili ti ma. 14 Wuzeɠe, Ɠɔoɠɔ GALAGI, ga è-zɛbɛi! Gɔun gá, gá pɔ gi guyei loo, gi ɗa-ʋilɛ sɔlɔɔdai maamusɛ.