Guyeiti 25

1 Davide ná-guyei. Ɠɔoɠɔ GALAGI, è ʋɔ pelei ɠa gè ɠaaʋotesu ná. 2 Nà-GALAGI, ɗa ɠa gè ɠalivaai è ma, mina va bu gè ʋa lɔ unfegi zu, sìli nuiti ti ʋa ɗa ɠoozunɛ nà-faa zu. 3 Nii kpein kitogai è ʋa, tanɔpɛ ge la lɔa unfegi zu. Kɛlɛ niiti ti yaavai ɠɛɛzu fuun, naati ta unfe. 4 Ɠɔoɠɔ GALAGI ɗa-ʋeleiti dɛɛ ga ze! Kàla ga ɗa-ʋeleiti. 5 Lo tùɠɔ gè ziɛ ga ɗa-ɠaamai, è kàla. Mazɔlɔɔ ɗa ɠa è ga nà-kizo GALAGI, ɗa ɠa kìtogai è ʋa folo-o-folo. 6 Ɠɔoɠɔ GALAGI, ɠizɛ ɗa-maawɔinɠai zu, ta ɗa-wooɠɛɠiladai, mazɔlɔɔ ta ɠɛʋele ma eyɛsu ɠɔ! 7 Mina ɠizɛ nà-doungo ziɛgi ma ɠotoiti su, ɓaa nà-tɔ koloɠologiti ti leʋegai, ɠizɛ sù ɗa-wooɠɛɠiladai maaʋele ma, tɔɔzei, ee, Ɠɔoɠɔ GALAGI, è ʋagɛ! 8 Ɠɔoɠɔ GALAGI ʋagɛ, é zɔle, naa ɠa é ba, é pelei lɛɛzu la ga kotoba nuiti, ga ti ziɛ la. 9 Toɠa ɗa ɓɔɠɔmaayei nuiti pilɛ telebo pelei ʋa, toɠa ɗa ɓɔɠɔmaayei nuiti kala ga ná-pelei. 10 Ɠɔoɠɔ GALAGI ná-peleiti ta ga nuɓɔɠɔlai, ta wooɠɛɠiladai, naati bɛ, niiti ti ga wooɠɛɠila nu, ná-minazeɠegiti su, ta ná-deveiti. 11 Ɠɔoɠɔ GALAGI, nà-faaɠaaza golaiti suvaayɛ è-laaseigi ná-lɛbiyai ʋɛ, mazɔlɔɔ ti wola wɔɔlɔʋɛ. 12 Nui nii é luazu Ɠɔoɠɔ GALAGI ʋa, Ɠɔoɠɔ GALAGI ɠa pelei lɛ ga naa, nii maanɛai é yiimazeɠe la. 13 Toɠa zɛnvui wo undaanɛɛi zu, mavofodai zooi zɔlɔɔ ga nɔnɔ. 14 Ɠɔoɠɔ GALAGI ɠa ɗa koozu vaiti dɛɛ ga naati, niiti ti luazu ba. É ti ɠala ga ná-minazeɠegi. 15 Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ tɔ ɠa é kɔ̀ɠɔi ɠulazu tumɔi zu. 16 Ɠaaʋote mà, è kulafiliba vaanɛɛi ɠɛ bɛ̀, mazɔlɔɔ nà ɠila be, màawɔinʋɛ. 17 Ziizoolɛi zìi laavega, kìzo nà-ziiɓɔlɔ vaiti ma. 18 Nà-maanɔɠɔi ʋɛtɛ, ta nà-kpɔlɔi, nà-kotoiti kpein suvaayɛ bɛ̀. 19 Wɛlɛ ʋelei sìli nuiti mɔinɗai la, ta wɔinzeɠema wolai, ti wɔ̀inzeɠezu la. 20 Zɛ̀nvui makɛ, è ùnmɔɔ! Gè mina lɔ unfegi zu, tɔɔzei nà lɔɔɠuzu è ʋɔ bɛ. 21 Telebodaiti ta sɔledai ta màkɛ, mazɔlɔɔ kìtogɛ è ʋa! 22 Ee, GALA, Izilayɛle ɠula ná-kidaaʋili faiti pɛ su!