Guyeiti 28

1 Davide ná-guyei. Ɠɔoɠɔ GALAGI, ɗa ɠa gè wooɠulazu è ma. Nà-fasai, mina woizuɓɔlɔ tùɠɔ. Ni ɗa laaɠuluna, nà ɠɛ ga naati kɛʋele, niiti ti yeizu kabai zu. 2 Woilo nà-maanɛɛnɛ wooiti ma, siɛgi zu gè wooɠulazu la è ma, siɛgi zu gè zèeiti tɛɛzu la è-zeizu ɲadegai ʋɔ pelei, è zeini ná! 3 Mina faa ɲɔu ɠɛ nuiti ta-vaa ɲɔu ɠasɔi ta la ùnma, faa ɲɔu ɠɛ nui naati, ti ziilɛi kpɔɛi wosu ti-zeiɲɔɠɔi ma, kɛlɛ faa ɲɔi ti-yiimaʋɛ, ga yaavai. 4 Ti zala, eɠɛʋelei ta-ɠɛɛwotiiti ti la, eɠɛʋelei ta-yaava ɠɛɛwotiiti ti la. Ti zala é zoloo ti-yeei ná-kɛɛwotii ma. Nii soloogai ti ma, naa la ti unma. 5 Mazɔlɔɔ ti la Ɠɔoɠɔ GALAGI ná-kɛɛwotiiti deveni, anɛɛ zeei ná-kɛɛwotiiti. Ɠɔoɠɔ GALAGI ti ɠoloɠolo! Ti mina mɔ wuzeɠe eyɛsu pɛ! 6 Mamagi ɠa Ɠɔoɠɔ GALAGI ʋɛ! Mazɔlɔɔ toɠa woilosu nà-maanɛɛnɛ wooiti ma. 7 Ɠɔoɠɔ GALAGI ɠa é ga sùvikɛi ta nà-kɔɔɠɔ zɛpɛgi. Gè ɠalivaaʋɛ ma, toɠa ɓɔsu bà. Zìimaʋɛ laavegɛ ga koozunɛɛi. Nà maamusɛzu ga nà-guye wooiti. 8 Ɠɔoɠɔ GALAGI ɠa é ga ná-nuiti kpein suvikɛi, tɔ ɠa é ga siɠigi, ʋɛ masagi nii é gulɔ ɲadegai ziaai ma, naa a ɗa unmɔɔgi zɔlɔɔ ná. 9 Ɠɔoɠɔ GALAGI, ɗa-nuɓusɛiti kizo, è tuya loo ti ʋɛ, ta ga ɗɔnɔiti! Ɠɛ ga ti makɛ nui, è yeezei ti wu, eyɛsu ɠɔ!