Guyeiti 40
PBT1 Guye loo ɠundiɠii nɔnɔi ʋe. Davide ná-guyei. 2 Gè ɠitoni Ɠɔoɠɔ GALAGI ʋa, é ungi maayeini pɔ̀ pelei, é woilo nà-maanɛɛnɛ wooi ma. 3 É mɛ̀ɛnni, é kùla zeɠezaɠa ɲɔi zu, palaʋalai ɓomaʋɛ. É kɔ̀ɠɔiti to fasai ma, é kɔ̀ɠɔiti topele ɓɛtɛ. 4 É guye niinɛ lɔ dà, da-ƓALAGI maamusɛ vai ma, ma mɔinmɔin ka pɛtɛ, ti lua tɔun ba, ta ɠaliva Ɠɔoɠɔ GALAGI ma. 5 Undaanɛ nu ɠa ga naama nui, nii é ɠitosu Ɠɔoɠɔ GALAGI ʋa, é la ɠaaʋotesu waso nuiti ma, niiti ti zɛɛ wo maaɓɔgi zu! 6 Ɠɔoɠɔ GALAGI, ná-GALAGI, è ɗa-vaa ʋagɔiti ta è ɠisu vaiti mɔinʋɛ su gi letegi, è-ʋokɔɠɔma la ná, nà pɔ gè naa wo, gè zeze la, ti wola mɔinʋɛ gola, ti ɠaa la luga. 7 È la zalaɠai ʋɔ, ɓaa vebɛanii, è gòiyeɠeiti daalaogɛ, è la gala zalaɠai maaɠaazaɠaboni, ɓaa koto gba zalaɠai. 8 Gè ɠɛni ma naazu: «Wɛlɛ, gè ʋa ga sɛʋɛi nii kɛai nà-faa zu, 9 zìima vai ɠa ga gè è-yiimai ɠɛ, nà-GALAGI! Ɗa-lɔgi ɠa zìimaʋɛ.» 10 Nà unmɔɔ fai ma woo niinɛ ʋagɔi laazeelizu maaɓɔ golai zu, wɛlɛ, gè la laaɠulusu, Ɠɔoɠɔ GALAGI, è naa zuɠwɛɛ! 11 Gè la unmɔɔ fai zulɔɔɠua zìimaʋɛ, nii è kɛai bɛ̀. Nà zezezu ga ɗa-wooɠɛɠiladai ma vai, ta ɗa-ɠizo fai, gè la ɗa-nuɓɔɠɔlai lɔɔɠua, ta ɗa-ɠaamai maaɓɔ golai zu. 12 Ɗa, Ɠɔoɠɔ GALAGI, è la ɠɛlɛa, è ʋa ɓe ɗa-maawɔinɠai veezu bɛ̀. Ɗa-wooɠɛɠiladai ta ɗa-ɠaamai, ta màkɛ eyɛsu ɠɔ. 13 Maanɔɠɔ mɔinmɔin ka màaɠoolii zu, nà-faaɠaaza golaiti ti pilɛ sɔlɔɔga mà, gè la zooga gè ʋa wozaɠa. Ti mɔinʋɛ, ti leʋe nɔ̀undeɠai ʋa, sùvikɛi ɠulaa sù. 14 Ee, Ɠɔoɠɔ GALAGI, soma è ùnmɔɔ! Ɠɔoɠɔ GALAGI, suvilɛ, è ɓɔ bà! 15 Ti pɛ ti unfe ʋɔɔma, ti wooi zupu, tɛiti ti pɔ ti zɛ̀nvui ɠula zèa! Ti li ga ʋoluʋelei, ti unfe, tɛiti kpein ti wɔinɗai ga màanɔɠɔ! 16 Ti laavɔ ta-unfegi ma ɠasɔi wu, niiti ti ɲɛɛɠulazu nɔ̀un su! 17 Niiti dɔin ti è ɠaiziɛzu, ti ɠaazuɠalakala, ti ɠoozunɛ è ʋɔ, niiti ɗa-ɠizo fai nɛai ti ʋɛ, ti ɠɛ ma yeenɔpɛ: «Lɛbiyai ɠa Ɠɔoɠɔ GALAGI ʋɛ!» 18 Nɔ̀un nà, màanɔɠɔʋɛ, gè ɠɛ ga bala nu, kɛlɛ Màliɠii ɠa ɠisiɛzu sù. Ɗa ga nà-kpɔba nui, ta ùnmɔɔ nui, nà-GALAGI, mina nɛkɛ!