Guyeiti 42
PBT1 Guye loo ɠundiɠii nɔnɔi ʋe. Kolé mavofodaiti ta-ɠidafaawui. 2 Ʋelei kpɔɔle wɔin a ɠɛna dopai ma, a ɗa ziɛi ɠaiziɛ la, nii é yeizu, ʋele ɠana zìi è magalasu da, ee, GALA! 3 GALA wɔin ɠa zìi ma, eɠɛ kpɔɔle wɔin, zɛnvu su ƓALAGI. Siɛgi ɓɛgele ɠa nà lii la, gè ɠula kɛlɛma, gè lo GALA gaazu ná-pɛlɛi wu? 4 Gàazuɗɛiti ti ɠɛa ga kɔ̀nɔgi, folo ʋɛɛ kpidi ʋa, siɛgi zu ti ɠɛɛzu mà la yeenɔpɛ: «Mini ɠa ɗa-ƓALAGI ná?» 5 Anɛɛ naa ʋe, nii gè ɠisiɛzu su, zìi ɗa ɓali kòozu: Gè ɠɛni bɛbɛi luɠɔ, gi ɗa li GALA pɛlɛi ʋɔ pelei, koozunɛ wolai zu, ta faanɛɛ wuuɠwɛɛgai, nuɓusɛi kpein bɛ, niiti ti ɠɛni fɛtii zu. 6 Leeni vaa zu, zìi, è ɲiikpisu, è ɗa kpalagi wo kòozu? Ɠito GALA ba, mazɔlɔɔ nà maamusɛzu ʋolu dɛ, toɠa ga nà-kizogi ta nà-GALAGI. 7 Zìi ɠa ɓalizu nà-faa zu, naa ɠa é ba, nà ɠisiɛzu è zu, Zuludɛn yooi zu, gè su, Ɠɛɛlɛmɔn gizei, ta Miseyaal gizei ʋɔ bɛ. 8 Ziɛ zulugi ɠa ɗa taɠili toli, ɗa-ɠɔtuɗɛiti gooiti ma. Ɗa-veinfeingiti ta ɗa-ɗɛ lakpatakpagiti ti yeini nɔ̀un ma. 9 Foloi, Ɠɔoɠɔ GALAGI ɠa ná-wooɠɛɠiladai ɠɛɛzu bɛ̀, kpidii, ná-guyei ɠa ɗa ʋilɛ pòlu. Nà nà-maanɛɛnɛ wooi laazeelizu GALAGI ma, nii é ga zɛ̀nvui. 10 Nà ɗa ɠɛ GALA ma, nii é ga nà-fasai: «Lee vaa zu è yeemaai mà? Lee vaa zu kɛni gè ziɛ gaazuɠilii zu, sìli nuiti ta-wɔinzeɠemai zu?» 11 Wɛlɛ, gè ɠoloɠologa ɲɛgɛlɛin ga ta-ʋoomugiti, siɛgi zu wɔ̀inzeɠe nuiti ti ɓaaɠulazu mà la. Ta ɠɛna ɠɛa mà yeenɔpɛ: «Mini ɠa ɗa-ƓALAGI ná?» 12 Leeni vaa zu, zìi, è ɲiikpisu, è ɗa kpalagi wo kòozu? Ɠito GALA ba, mazɔlɔɔ nà maamusɛzu ʋolu dɛ, toɠa ga nà-kizogi, ta nà-GALAGI.