Guyeiti 66

1 Guye loo ɠundiɠii nɔnɔi ʋe. Guyei. À wooɠula GALA ma ga koozunɛɛi, wo kpein, wɔi wo zeini eteai zu! 2 À daaseigi ná-lɛbiyai maamusɛ! À lɛbiyai ve bɛ ga wa-maamusɛiti! 3 À ɠɛ GALA ma: «Ɗa-ɠɛɛwotiiti maayikiʋɛ! Ɗa-zobogi nii ɓela ge la ba, naa maaʋele ma, è zili nuiti ta nɔkɔ è wu. 4 Eteai pɛ ka nɔkɔ è wu, ti guyei loo è lɛbi vai ma, ga ti ɗa-lɛbiyai maamusɛ.» Lo! 5 À ʋa wo GALA ná-kɛɛwotiiti pɛtɛ! Ti maayikiʋɛ niiti é ti ɠɛɛzu nuɓusɛiti saama. 6 É kpoloɗɛi valiboni, é kɛ ga zou vɔɔi, ti ziɛ wolai ɓudɛni ɠɔɠɔa, kpaaɠɔ la maazu. Miná ɠa gi ɠoozunɛɛni ná ga tɔun maaʋele. 7 Toɠa masadai ɠɛɛzu eyɛsu ɠɔ ná-zɛbɛi ʋɔ, gaazuʋɛ ɠa wɛlɛzu ziiti ma, kololala nuiti ti mina mɔ wuzeɠe pɛ. 8 Nuɓusɛiti, à gá-ƓALAGI mama, à wooɠula ga maamusɛ vai! 9 Gá vulua tɔun saalai zu, é gi makɛ, gi mina loo. 10 Ee, GALA, è gi ʋoluɠulani! È gi ʋoluɠulani, eɠɛʋelei ta ɗa walii ʋoluɠula la. 11 Gi ɠɛni è ya tumɔi zu, è ɗa ʋa ga giye, è kasɔ wuigi laani gi-ɓokpozuʋɛ, 12 è zobogi veeni gi zili nui ʋɛ, é zei gi unda, gi leʋeni abui zu ta ziɛi, kɛlɛ è gi ɠulani ti zu, è kulagaanɛɛzui ve gi ya. 13 Nà liizu ɗa-ʋɛlɛi wu ga gala zalaɠaiti, nà nà-minazeɠegiti daazeeli è ʋɛ, 14 niiti dàkɔlɔgiti ti ti woni, dàaʋɛ boni nà-kidaaʋiligiti su. 15 Nà gala zalaɠaiti kula è ʋɛ, ti wulɔai, baala sinɛ wolaiti ta ti ɠala luului. Nà nikɛ zinɛiti kula ga zalaɠai, é ɓɔ boliiti ba. Lo! 16 À ʋa wo woilo, wɔiti kpein wo luazu GALA ba, nà naa wosu wo ma, nii é kɛa nɔ̀un bɛ. 17 Gè wooɠulani ma, ná-maamusɛi ɠɛni dàaʋɛ nɛ̀gi ma. 18 Ni gè ɠɛni faa ɲɔi makɛni zìimaʋɛ, Màliɠii la ɠɛni woiloga gòo ma. 19 Kɛlɛ wɛlɛ, GALA ge woiloni gòoi ma, é woiloni nà-maanɛɛnɛ wooi ma. 20 Mamagi ɠa GALA bɛ, mazɔlɔɔ é la ɠɛlɛni nà-maanɛɛnɛ wooi ʋa, é la ná-wooɠɛɠiladai maaɠoozani bà!