Guyeiti 95

1 Ade li, de guyei loo Ɠɔoɠɔ GALAGI ʋɛ! Ade wooɠula ga koozunɛɛi ade ɠizo fasai ʋɛ. 2 Ade li, de lo gaazu, de mama, de dɛbi ga guyeiti. 3 Mazɔlɔɔ Ɠɔoɠɔ GALAGI, ɠa ga GALAGI bɔɔlɔai, toɠa ga masa golai, nii é zeini galagiti unga. 4 Eteai ma yeɠe ɓomaʋɛ pɛ ka zoni zea, gizeiti sokpaiti ta ga nɔnɔ. 5 Kpoloɗɛi ɠa ga nɔnɔ, tɔ ɠa é kpɛtɛa, zooi ɓalaagi, zeei ɠa é kpɛtɛni. 6 À ʋa, ade nɔkɔ bu, ade maayei tɔun bɛ, ade ʋilɛ ɲiibiɠa Ɠɔoɠɔ GALAGI ʋɛ, nii é ade ɓɛtɛa. 7 Mazɔlɔɔ tɔ ɠa ga da-ƓALAGI, da ga ná-baalagiti é ti ɠɔnɔkulazu, baala kpulugi nii é losu tuɠɔ. Ni wa gooi mɛnina za, 8 à mina wo-ɠigiti kpa, eɠɛʋelei é ɠɛɛni la Meliɓa, eɠɛʋelei naama voloi é ɠɛɛni Masa, teʋebai zu, 9 ʋɛ wo-mɛmɛwolani ti tɛ̀ɛni ga ná, ti sùɠɔɠɔ, anɛɛ ni ti nà-kɛɛwotiiti kaani. 10 Kona ʋuunaanigɔ (40) laawu, niima yamanii wɔinzeɠeni mà, eyɛsu gè ɠɛ ma: «Nuɓusɛa ʋe, ti ɠakagɛ ti-yiimaʋɛ, ti la nà-peleiti kwɛɛ.» 11 Naa ɠa é kɛɛni, nà-ziiɠaawanai zu, gè ɠonani ga: «Ti la lɔa nà-dooɠogi zu!»