Kulakɛlɛmai 1

1 Sɛʋɛi nii zu vai ɠa ga kulakɛlɛmai nii Yesu Kilista sɔlɔɔni, nii GALA ge feeni zea ga é dɛɛ ga ná-botiɠɛ nuiti, fai niiti ti ʋaazu ɠɛɛzu fala. Kilista ná-geezuɠeelai leʋeni, é ti lɛ ga ná-botiɠɛ nui Zan. 2 Zan ɠɛni ga zeelei, ga é GALA daawooi ta Yesu Kilista ná-zeele wooi ta nii kpein é kaani, é naati daazeeli. 3 Undaanɛ nu ɠa ga naama nui, zɔi é niima zɛʋɛi zu ɠulakɛlɛma ɓɔɛiti kalasu, ta naati ti woilosu ma, naa ʋɛɛ niiti ti ziɛzu ga niiti ti zɛʋɛai su! Mazɔlɔɔ su vaiti kɛ yeei maaɓuɠaa. 4 Nɛ̀i gè ga Zan, nà niima zɛʋɛi leʋesu Azi yooi zu Egilisi lɔfelaiti ma. Zaalai la wo ma, ziilɛigi ve wo ʋɛ, naa ya, nii é ná, nii é ɠɛni ná, nii é ʋaazu, é ve wo ya, zɛnvu lɔfelaiti zea, ti ná-masa kpɔkpɔgi ɠakalaʋɛ, 5 é ve wo ʋɛ, Yesu Kilista ya, nii é ga wooɠɛɠila zeelei ta Doun Zunu mɔungi, é wuzeɠeni, é ɠula saai ya, etea masagiti ta-ɠundiɠii. Tɔ ɠa é ade nɛa ʋɛ, é de unmɔɔni, é de ɠula da-ɠotoiti su ga ma ɲamai, 6 é de ɠɛ ga ná-masadai zu nuiti, zalaɠa ɠula nuiti Kɛɛɠɛ GALA ná-botii zu. Deɠɛmu, lɛbiyai ta zobogi ta ga nɔnɔ eyɛsu ɠɔ! Amina! 7 Wɛlɛ, toɠa yɛsu tonaɓiingi zaama, é ʋa! Ɛsɛ pɛ ka ka, anɛɛ zɔiti ti bɔɔni. Etea nuɓusɛi pɛ ka wɔlɔ ná-faa zu. Ungo, zekana a ɠɛ la! Amina! 8 Maliɠii GALA ge ɠɛ ma: «Nà ga Alefa ta Womega,» zɔi é ná, é ɠɛni ná, é ʋaazu, Zɛbɛi-Pɛ-Maliɠii. 9 Nɔ̀un nà Zan, nà ga wo-ɠɛɛloin, nà nɔ̀nɔ zɔlɔɔsu wo zaama kidaaʋili fai zu, ta GALA ná-masadai zu, ta ziilɔɔi zu, ada-ɠilibalai zu da Kilista, nuiti ti liini ga ze ziɛ zaama yooi zu, daa ga Patemɔse, tɔɔzei GALA daawooi ʋa gè daazeelini, ta Yesu ná-zeele wooi nii gè boni. 10 Maliɠii ná-dooɠo foloi, GALA Zɛnvui yeini mà, gè woo wolai ta mɛnini pòluʋelei, eɠɛ puʋu fɛɛ wooi, 11 é ɗa ɠɛ ma: «Niiti è ti ɠaazu, ti zɛʋɛ sɛʋɛi zu, è teʋe Egilisii lɔfelai niiti ma: Efɛze, ta Simiiline, ta Pɛɛlegame, naa ʋɛɛ Tiyatiil, ta Saalede ʋa, é ʋɛɛ Filadɛlɛfi, ta Laodisé ʋa.» 12 Gè latini, gè ɠɛ gè wooi naa ɠwɛɛ, é ɠɛni ɓɔɛzu pɔ̀. Tàtigai ma, gè fitina zei ani lɔfelaiti kaani, ti ga zanugi. 13 Gè nui ta ɠaani loni zanu fitina zei aniiti saamaʋɛ, eɠɛ nu ná-doun zunui, maaɠilini ga kwɛpele seɠezuɠoozagi, zanu saamaɠiligi ɓesagai kakai wu. 14 Nɔungi ta nɔundeɠaiti ti ɠoleni eɠɛ baala deɠa ɠolegi, ti ɠole eɠɛ kobe kolegi, gaazuɠɛzɛiti ti volozu eɠɛ abuzogi, 15 kɔɠɔiti ti ɠɛni eɠɛ kɔlu ɓɔigi, kpɔiɗai abuzulugi zu, gooi ɠɛni eɠɛ ziɛ wolai zulu gooi. 16 É somideɠa lɔfelaiti soni yeezai ya, gaavele boɠa zɔkpɔ ɠaaligi, naa ɠɛni ɠulazu daaʋɛ, gaazuʋɛ ɠɛni volozu eɠɛ foloi, siɛgi zu é toozu la ga zɛbɛi pɛ. 17 Siɛgi zu gè kaani la, gè looni kɔɠɔi wu, eɠɛ nà za. É yeezai ʋɛɛni mà, é ɠɛ mà: «Mina lua pa! Nà ɠa gè ga ma mɔungi ta ma ɠaaɓelagi, 18 nii é vulua. Gè zaani, kɛlɛ wɛlɛ, nà vulua eyɛsu ɠɔ, nà ɠa saai ma ɓaɠuiti ti zèa ta gɔvɛalaazu ɓaɠui. 19 Naa ɠa é ba, naa zɛʋɛ, niiti è ti ɠaa: niizu vaiti, ta niiti ti ʋaazu ɠɛɛzu naa ʋolu. 20 Wɛlɛ, somideɠa lɔfelaiti è ti ɠaazu, ti zoni zèezai ɠa, ta zanu fitina zei ani lɔfelaiti, dɔɔɠuzu vai naa ʋoluʋɛ ɠa é ga nii: Somideɠa lɔfelaiti ta ga Egilisi lɔfelaiti ta-ɠeezuɠeelaiti, zanu fitina zei ani lɔfelaiti ta ga Egilisi lɔfelaiti.