1 Sama'ila 27

1 Reve Da̱wuda yuwan majiyan o okolo a̱ yi, «Urana u ro n ta̱ kuwa̱ o ukere wa Shawulu. Ili i na i la’aa numu a na ma yuwan a̱yi ɗa n suma a̱ tyo e iɗa ya aza a Filistiya. Shawulu ta lyawa izami i va̱ uba̱ta̱ suru a̱tsuma̱ a pasu vi iɗa ya Isra’ila, waru n ta la’a o ukere wa̱ yi.» 2 Ɗaɗa Da̱wuda na ali o uvon a̱ yi ukpakuta̱li (600) a na a̱ ri oɓolo na̱ a̱yi a̱ ka̱ra̱i, a̱vu a̱ tyo mavada uba̱ta̱ wa Akish ulobo wa Mawok, mogono ma Gat. 3 A̱vu Da̱wuda na ali o uvon a̱ yi a̱ da̱nu a̱tsuma̱ a Gat oɓolo na̱ Akish. Za suru da̱na̱ ta̱ oɓolo nu u’wa wa̱ yi, waru Da̱wuda da̱na̱ ta̱ oɓolo na̱ a̱ma̱ci e re a̱ yi Ahinowam za va Yezireyel na̱ Abigel za va Kame, ma̱runa̱ ma Nabal. 4 Agba ana a dammai Shawulu Da̱wuda suma ta̱ a̱ tyo Gat, u da̱shi zami yi shi. 5 Uranu u ro reve Da̱wuda damma Akish, «Na̱ n tsura̱ isa’ani e esu a̱ wu, lyawa vu ca mu uba̱ta̱ u ro a̱tsuma̱ a̱ mulyuci vi iɗa’a, adama n da̱nu ɗe. Adama a̱ nye a ɗa aagbashi a̱ wu a̱ da̱nu a̱ lyuci tsugono oɓolo na̱ vu?» 6 Ne ɗa o urana u ndolo Akish ca niyi Ziklag, a̱yi ɗa i zuwai Ziklag wo o’woi za vu ngono ma Yahuda hali na ana’an. 7 Da̱wuda da̱nu ta̱ e iɗa ya Filistiya aa’wan a̱ ta̱ na̱ woto na̱shi. 8 A̱tsuma̱ a rana vu nde ma̱ a̱ yi a̱tsuma̱ a Ziklag, Da̱wuda tsu u ta̱ ta̱ na ali o uvon a̱ yi adama a̱ riya̱a̱ aza a Geshura nu uvon, na aza a Girzi na aza a Amaleka. Ɗe nu ufaru ama a nda a ɗa a fara da̱nuyi e iɗa’a, diga upasu wa̱ Shur, hali a cina Masar. 9 Mantsa ma na suru Da̱wuda riya̱a̱ nle nu uvon, u tsu lyawa vali ko ka wuma shi, amma u tsu pura̱ ta̱ mgbele ni inan, na̱ nloli, na arakumi, ni itana yu otosu. Reve u ka̱mba̱ ya Akish. 10 Na̱ Akish ece yi, «Te ɗa vu ‘ya̱wa̱i uvon ana’an?» Da̱wuda tsu damma yi ta̱, «Uba̱ta̱ wa Nege wu upasu wa Yahuda,» ko, «Uba̱ta̱ wa Nege wu upasu wa aza a Yerameyel,» ko, «Uba̱ta̱ wa Nege wu upasu wa̱ a̱za̱ a̱ Keni.» 11 Da̱wuda tsu lyawa vali ko ka wuma shi, adama a na she ta̱wa̱ a̱ ‘ya̱wa̱ nu dammu a̱tsuma̱ a Gat a damma, «Apa ili i na Da̱wuda yuwain» wan. A̱yi ɗa ili i na u yuwusain mantsa ma na u da̱na̱i nden e iɗa ya aza a Filistiya suru. 12 A̱vu Akish lyawaa Da̱wuda okolo, a̱vu u damma aciya̱yi, «Wo o’wo ta̱ ili yi idaba lon uba̱ta̱ wa ama a̱ yi, aza a Isra’ila, adama wo o’wo aagbashi a̱ va̱ hali hali.»