Mbouŋ to Yes Israela 3

1 O Yoova, you koiagŋa katindi. Ival tiina kat timundig tighaze tiwaghamun ghou. 2 Yes tisavsaav payou tighaze: “Maaron ipul muri pani wa. Irau iuuli muul maau." 3 Eemoghon Yoova, yom unum sigeu payou ve upoon ghou. You tinig iza pasa, yom ugham izag inim tiina, ve upalot ghou le nalib pa koiagŋa. 4 You nataŋ roran Yoova toman aliŋag tiina naghaze iuul ghou. Ve ye ineep izi lolooz toni patabuaŋ, ve ilooŋ ghou. 5 Tovenen you nazi nagheen le lolog imaagh. Pasa, Yoova tau to mata pa ghenooŋ tiou le namundig muul. Mbo 4:8 6 Ighaze koiagŋa ndiŋndiŋ ndiŋndiŋ saaŋgul (10,000) tiluvut ghou pa tigham malmal payou, you irau namatughez padi maau. Mbo 23:4, 27:3 7 O Yoova, rikia moghon umundig ve uul ghou! Urab koiagŋa azedi le livodi ipolpol. Ve urab matin tapiridi le isob kat. 8 Yoova, yom moghon to irau ugham mulin ghou. Ughur poia tiom iza to tamtoghon tiom tisob, leso tinidi iza ve tineep pooi. Mbo 62:7+; Syg 7:10