LUKA 24

1 Ege ditimedelu abele gerger sabath ge, uiaba bakeuare abele ao ge, bane ge, uiaba ais abele lu debe laglag emetu derser, uader kosker uiabi kemem. 2 Ege uiaba erdali abele baker aolam emetu diski. 3 Ege uiaba barot muige, uiaba nole erdali Iesu ra gem. 4 Ege uiaba operem abele lu: dasmer, neis le ekuei uiaba opem, am zoromzorom uali: 5 Ege uiaba au geum, a uiaba op esorgiru sepem, ege uiaba detager, kega, Nalu uaba deraimer? E emetu eded akaid, nole uiabi kemem eud le giz, 6 E nole abele uteb, E ko ekuei: uaba dikiapor abara mer abele kerker ge uaba okakis emeri Galilaia ge, 7 E detager, kega, Abkoreb Le la Uerem ikuar uit le la tag, a satauro, a neisi netate gerger ko eded akaid. 8 A uiaba dikiapor abara mer. 9 Ege uiaba ko akomed abele aolam, a uiaba etomeret gaire lu uiabim eleuen le, a pako le uridili. 10 Maria Magadalena, a Ioana, a Maria Iakobo ra apu, pako uiaba uridili, uiaba etomeret abele lu uiabim aposetelo giz. 11 A ui ge abele mer dikiaporare, kega, No mer pe deke; abelelam nole oatur kak. 12 Ege Peteru ge ekueilu, E au koreder aoem; E esorgiru, E erdar no uali gaire eskeder; A E akomelu tabara metaem, a damer abele lu. 13 Dasmer, neisi le uiaba bakeamulei abele gerger ge nerute utebem, nei Emau, ditimed Emau bakedida Ierusalema sikiste setatio. 14 Ege uiaba mer atager abele gaire lu uridili ikeli. 15 Ege uiaba mer atager, a deraimer, epe Iesu maike uiabi dog, a uiaba okakis bakeamu. 16 A uiaba pone darasam, abelelam uiaba nole abi erdali. 17 Ege E uiabi daratager, kega, Nalu mer pe ua batagreiei, pe ua dekase, a uaba pone mokakalam okasosok? 18 Nerute le uiaba, nei Kaleopa, E abi detager, kega, Nako mama emeri Ierusalema, mama nole umer kak peirdi gaire lu osemeda? 19 E uiabi daratager, kega, Nalu lu? A uiaba detaut, kega, Abele lu Iesu Nazareta le, E perofeta, E au saserim gaire lu ikeli, pako abara mer Ade ra opem, pako abele ged uridili: 20 Zogozogo le giz, pako meriba tarim le, uiaba ikuar bodomalam eumilu, a uiaba abi satauroem. 21 Keriba dikiapor E uerkab Isaraela. A gaire lu uridili, abele gerger thri gerger, abele lu ikeli. 22 Keriba au damreda, uader kosker keribielam, uiaba bakeam banege a aoem; 23 Uiaba nole erdali abara gem, a uiaba bakeamu abele merkem, kega, Keriba erdali angela giz ui keribim detomereta, E emetu ko eded akaida. 24 Uader keribielam, uiaba bakeamu aoem, uiaba erdali mokakalam kosker detaut: a uiaba nole abi erdali. 25 Ege E uiabi daratagerare, kega, Le paim, a peper nerkep, nole oituli gaire lu uridili gaire perofeta giz etomereti! 26 Abkoreb Keriso kekiam au asias gaire lu mokakalam, a keubu abara zorom tabarki. 27 Epe E uiabi etomereti gaire lu, emetu detali abielam jauali uridili, E ditimeda Mose bakedida perofeta uridili. 28 Ege maike abele uteb ge uiaba bakeamu: epe E mokakalam no bakeamu. 29 Ege uiaba saserim detaut, kega, Debele ma keribim emeri peike: abelelam gerger ise maike kikem. Epe E barot, a uiaba emeri. 30 Ege E eidi eroli okakis uiabim, epe areto erpei, a esoao, a itur, a uiabi naisuerare. 31 Epe uiaba pone bakaelei, a abi dasmerei; E uiabielam badimiriklu. 32 Epe uiaba mer atager, kega, Nako meriba nerkep mokakalam ur muige, abuar ge meribi detager gab ge, E meribi detomelu abele jauali? 33 Ui ge ekueilei abele haua ge, akomelei Ierusalemaem, a nardarare eleuen le, uiaba etamiare okakis uader uiabi kemem, 34 Ui ge uiabi daratagerare, kega, Ageakar, Opole ko eded akaida, E etomereti Simonaem. 35 Able neis lede detauti paretkak taba kaimegizem nalu akaidari gabge, a wi azigmadariei Ople nali nade e able areto itrida. 36 Nade e wiabi detagerda tabara memegle, bazigmarti Ople epedali iabidoge. “Mapodan wabim,” e etkarti. 37 Iaba geum barukda ableglam wi dikepwarda e namar dali. 38 E no etkarlu iabim, “Naluglam wa geumge bakeli? Naluglam able adud idoni taba wabi akepwarge? 39 “Dasmer kara tag a teter, a wa umele kakanali. Wa kara gem itutrare waiakai wa umele ka nole namar nali. Kara gem a kara lid; namar nolekar. 40 Ege tabara tag a teter natometare tabara memegle. 41 Au serer barukda, wi nalu waikaidarda, abi nautmerda, “Wa asreda gair lu arwem able utebge?" 42 Wi abi wib lar ikwarda, e irwi iabi opem. 43 Ege E narpeilu, a nareg uiabi opem. 44 Ege iabi etkarlu kega, “Able orwaiorwai lu peike kaka detauti wabim ka iaka nawer iabidoge; gair lu dautarer ga Gelar Mosera, ge daurarer peropetara a pako Samge, otaba agekar obai." 45 E iaba idoni bauskilu wige Zogoziawali dimirwartare. 46 E wabim etkarlu, “Able mir bautarda: Able Mesaiade asiasi digi, ege ekiamda eudlam neis a netat gergerge. 47 “Lu ma abra mir ais etomeret meriba wit mir waditaut Ierusalamage a gair le pe uridli able gesepge. 48 “Wa dasmeri able mir e barkak mir dike." 49 Dasmer, kaka uabim namarida nerute le, kara Aba uabi uadetomertare: debele uaba emeri abele uteb, nei Ierusalema, iaueakai uaba nagri adigir kotor ge. 50 Ege E uiabi ais sor ge, bakedida Bethania: ege tabara tag nagaisilu, E uerkab uiabim. 51 Ege E uiabim uerkab, E uiabi dikaer, E bakeamu kotorem. 52 Ui ge abim esorgiru; a bakomeret Ierusalemaem, a uiaba au sererege: 53 Uiaba ner kak bakeamu zogo meta, uiaba Ade despered. Amen.