ಮಾರ್ಕ 1

¹ ದೇವ್‌ನೊ ಛಿಯ್ಯೊ ಹುಯಿರ‍್ಹೋತೆ, ಯೇಸು ಕ್ರಿಸ್ತನಿ ಬಾರೇಮ, ಅಛ್ಛಿ ಸಮಾಚಾರ್‌ನಿ ಶುರುವಾತ್.

² ಪ್ರವಾದಿ ಯೆಶಾಯನ ದಪ್ತರ್‌ಮ ಲೀಖೈರ‍್ಹೂತೆ ತಿಮ್, “ಹಂದೇಕ್‌, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್, ಯೋ ತಾರಿ ವಾಟ್ನ ಬರೋಬರ್‌ ಕರ್ಶೆ.

³ ಏಕ್‌ ಜ಼ಣೊ ಉಜ್ಜಾ಼ಡಿ ಝ಼ಗೋಮ , “ಪ್ರಭುನಿ ವಾಟ್ನ ಖ್ಹವಾರೊ, ಇನಿ ವಾಟ್ನ ಖ್ಹೂದು ಕರೊ” ಕರಿ ಚಿಕ್ರುಕರಾಸ್.

⁴ ಅಮ್ ಕರಿ ಪ್ರವಾದಿ ಹುಯಿರ‍್ಹೊಥೋತೆ ಯೆಶಾಯನ ಪುಸ್ತಕ್‌ಮ ಲೀಖೈರ‍್ಹೂಸ್ತೆ ಇಮ್ಮಸ್, ಯೋಹಾನ ಉಜ್ಜಾ಼ಡಿ ಝ಼ಗೋಮ ದೆಖೈನ್, ಅದ್ಮಿ ಖ್ಹಾರಾನ, “ತುಮೆ ಪಾಪ್ ಕರಾನು ಮ್ಹೇಲಿನ್ ದೇವ್ ಭಣಿ ಫರೊ ಅಜು಼ ಬ್ಯಾಪ್ತಿಸ್ಮ ಲೇವೊ, ತದೆ ದೇವ್ ತುಮಾರು ಪಾಪ್ನ ಮಾಪ್‌ ಕರ್ಶೆ” ಕರಿ ಬೋಲ್ತೊಹುಯಿನ್ ಬ್ಯಾಪ್ತಿಸ್ಮ ದೆವ್‍ಕರ್‌ತೋಥೊ.

⁵ ತದೆ ಯೂದಾಯ ತಬರ್‌ಖ ಭಣೀಥು ಅಜು಼ ಯೆರೂಸಲೇಮ್‍ ಖ್ಹಯೇರ್‌ಥು ಘಣು ಅದ್ಮಿ ಯೋಹಾನಕನ ಜೈ಼ನ್, ಇವ್ಣ-ಇವ್ಣ ಪಾಪ್ನ ಕಬೂಲಿಲೀನ್‌, ಇನ ಹಾತೇಖ್ಹು ಯೊರ್ದನ್‌ ನದ್ದಿಮ ಬ್ಯಾಪ್ತಿಸ್ಮ ಕರೈಲೆವ್‌ಕರ್ತುಥು.

⁶ ಯೋಹಾನ ಊಟ್ನ ಕೇಖ್ಹ್‌ಥಿ ಬಣಾಯುಹುಯು ಲುಂಗ್ಡು ಪೇರ‍್ಹೀರಾಕ್ತೊಥೊ, ಕಂಬರ್‌ನ ಚಾ಼ಂಬ್ಡಾನು ಕಂಬರ್‌ಪಟೊ ಭಾಂದಿರಾಕ್‌ತೋಥೊ ಅಜು಼ ಚಿಡ್ಡೋಬಿ ಜ಼ಂಗಳ್ನಿ ಶೇತ್‌ ಇನು ಖಾಣು ಹುಯಿರ‍್ಹುಥು.

⁷ ಯೋಹಾನನೆ ಅದ್ಮಿಖ್ಹಾರನ, “ಮಾರೇಥಿಬಿ ಶಕತ್‌ವಾಳೊ ಮಾರ ಪೀಠೆ ವಳ್ಯಾವಸ್; ಮೇ ಝು಼ಕಿನ್‌ ಇನಿ ಖೋಖ್ಹ್‌ಡಾನಿ ಡೋರಿ ಛೋ಼ಡಾನಾಬಿ ಲ್ಹಾಯೇಕ್‍ಕೊಯ್ನಿ ಕರಿ ಬೋಲಿವತಾಳ್ಯೊ.

⁸ ಮೇ ತುಮೂನ ಪಾಣಿಥಿ ಬ್ಯಾಪ್ತಿಸ್ಮ ದೆವಾಡುಸ್; ಕತೋಬಿ ಯೋತೊ ತುಮೂನ ಪವಿತ್ರಾತ್ಮಥಿಬಿ ಬ್ಯಾಪ್ತಿಸ್ಮ ದೆವಾಡ್‌ಶೆ” ಕರಿ ಬೋಲಿವತಾಳ್ಯೊ.

⁹ ಏಕ್‌ ದನ್ನೆ ಯೇಸು ಗಲಿಲಾಯ ತಬರ್‌ಖಾನು ನಜ಼ರೇತ್ ಕರಿ ಗಾಮ್‌ಥು ಐನ್, ಯೊರ್ದನ್‌ ನದ್ದಿಮ ಯೋಹಾನಥಿ ಬ್ಯಾಪ್ತಿಸ್ಮ ಕರೈಲಿದೊ.

¹⁰ ಯೇಸು ಬ್ಯಾಪ್ತಿಸ್ಮ ಲೀನ್, ಪಾಣಿಮಾಥೊ ಭಾರ್‌ ನಿಕಳ್‌ತಾಸ್ನ, ಸೊರ್ಗ ನಿಕ್ಳಿನ್, ದೇವ್‌ನು ಆತ್ಮ ಪರ‍್ಯಾವಾನಿಘೋಣಿ ಇನಾಪರ್ ಉತ್ರಿನ್‌ ಆಯೂತೆ ದೇಖ್ಯೊ.

¹¹ ತದೆ ಪರಲೋಕ್‌ ಮಾಥು “ತೂ ಮಾರೊ ಪ್ಯಾರ್‌ನೊ ಛಿಯ್ಯೊ, ತಾರೇಥಿ ಮೇ ಘಣು ಖ್ಹುಶಿ ಛೂ಼” ಕರಿ ಏಕ್‌ ಅವಾಜ಼್ ಖ್ಹಮಜ್‌ಪಡ್ಯು.

¹² ತದ್‌ನು-ತದ್ದೇಸ್ ಯೇಸುನ ಪವಿತ್ರಾತ್ಮನೆ ಉಜ್ಜಾ಼ಡಿ ಝ಼ಗೋಮ ಚ಼ಲಾಯೊ.

¹³ ಹಿಜ್ಜಾ಼ ಯೇಸು ಚಾ಼ಳಿಖ್ಹ್ ರೋಜ಼್ ಥೊ, ಜ಼ಂಗ್‌ಳಿ ಜಿನಾವರ್‌ಬಿ ಹಿಜ್ಜಾ಼ ಥೂ. ತದೆ ಶೈತಾನ್‌ಥಿ ಯೇಸು ಶೋದನೆಮ ಪಡ್ಯೊ. ಅಜು಼ ದೇವ್ ದೂತರ್ ಖ್ಹಾರುಐನ್ ಇನಿ ಸೇವಾ-ಚಾ಼ಕ್ರಿ ಕರ‍್ಯು.

¹⁴ ಯೋಹಾ‍ನನ ಜೇಲ್‌ಮ ಕೋಂಡಿನ್‌ ಘಾಲಿದೆವಾನ ಬಾದ್‌ಮ ಯೇಸು ಗಲಿಲಾಯ ತಬರ್‌ಖಾನ ಆಯಿನ್ ದೇವ್ನಿ ಸುವಾರ್ತೆನ ಅಮ್ ಬೋಲಿ ಒತಾಳ್ಯೊಕಿ,

¹⁵ “ದನ್‌ಖ್ಹಾರ ಭರೈಗ, ದೇವ್ನಿ ರಾಜ್ಯ ಖನ್ನೆ ಐಗು! ತುಮಾರು ಪಾಪ್ನ ಖ್ಹಾರು ಮ್ಹೇಲಿನ್ ದೇವ್‌ಭಣಿ ಫರಿನ್, ದೇವ್ನಿ ಅಛ್ಛಿ ಸಮಾಚಾರ‍್ನ ನಂಬೊ!” ಕರಿ ಬೋಲ್ಯೊ.

¹⁶ ಏಕ್‌ ದನ್ನೆ ಯೇಸು ಗಲಿಲಾಯ ದರ‍್ಯಾವ್ನ ಕನಾರೆಕರಿ ವಳ್ಯೊಜಾ಼ತೊಥೊ. ತದೆ ಜಾ಼ಳು ನಾಖುಕರ್ತಥಾತೆ ಸೀಮೋನ್‌ ಅಜು಼ ಇನೊ ನ್ಹಾನೊ ಭೈ ಅಂದ್ರೆಯನ ದೇಖ್ಯೊ. ಅವ್ಣೆ ಮಾಛ಼್ಲ ಖ್ಹಾವಾಳ ಹುಯಿರ‍್ಹಾಥ.

¹⁷ ಯೇಸುನೆ ಇವ್ಣುನ, “ಮಾರ ಕೇಡೆ ಆವೊ, ಮೇ ತುಮೂನ ಮಾಛ಼್ಲ ಖ್ಹಾವಾಳಾನಿತರ ಕಾಹೆ ಅದ್ಮಿನ ಖ್ಹಾವಾಳಾನಿತರ ಬಣವುಸ್. ಕರಿ ಬೋಲ್ಯೊ.

¹⁸ ಅಮ್ ಬೋಲ್ತಾಸ್‌ನ ಇವ್ಣೆ ಇವ್ಣು ಜಾ಼ಳುಖ್ಹಾರು ಮ್ಹೆಂದಿನ್ ಯೇಸುನ ಕೇಡೆ ಗಯ.

¹⁹ ಯೇಸು ಬಿಜು಼ ಜ಼ರ ಖ್ಹಾಮ್ಣೆ ಜೈ಼ನ್, ಜೆಬೆದಾಯನೊ ಛಿಯ್ಯೊ ಯಾಕೋಬನಾಬಿ ಅಜು಼ ಇನೊ ನ್ಹಾನೊ ಭೈ ಯೋಹಾನ್ನ ದೇಖ್ಯೊ. ಇವ್ಣೆ ಡೋಣ್‌ಮ ಜಾ಼ಳಾನ ಬರೋಬರ್ ಕರುಕರ್ತಥ.

²⁰ ದೇಕ್‍ತಾಸ್, ಇವ್ಣುನಾಬಿ ಬುಲಾಯೊ; ಬುಲಾವ್‍ತಾಸ್‍ನ ಇವ್ಣೆ ಇವ್ಣೊ ಬಾ ಜೆಬೆದಾಯನ ಕೂಲಿಆಳ್‍ನ ಜೋ಼ಡೆ ಡೋಣ್‌ಮ ಮ್ಹೆಂದಿನ್ ಯೇಸುನ ಕೇಡೆ ಗಯ.

²¹ ಬಾದ್‌ಮ ಯೇಸುಬಿ ಇನು ಶಿಷ್ಯರ್‌ ಕಪೆರ್ನೌಮ್ ಕರಿ ಗಾಮ್‌ನ ಗಯ, ಹಿಜ್ಜಾ಼ ಸಬ್ಬತ್‌ ದನ್ನೆ ಯೇಸು ಸಬೆ ಭರಾವಾನು ಮಂದಿರ್‌ಮ ಜೈ಼ನ್ ವಚನ್ ಬೋಲಿದೆವಾನಿಕ್‍ಳ್ಯೊ.

²² ಅದ್ಮಿಖ್ಹಾರು ಯೇಸುನಿ ಭೋದನ್ನ ಖ್ಹಮ್‌ಜಿನ್‌, ಘಣು ಆಶ್ಚರ್ಯಖಾದು. ಶನಕತೊ ಯೋ ಮೋಶೆನಿ ವಚನ್‍ ಶಿಕಾಡವಾಳ ಶಾಸ್ತ್ರಿಯೇನಿ ಘೋಣಿ ಕಾಹೆತೆ, ಅದಿಕಾರ್ ರ‍್ಹವಾಳಾನಿತರ ವಾಕ್ಯ ಬೋಲ್ತೊಥೊ.

²³ ತದೆ ಯೋ ಸಬೆ ಭರಾವಾನು ಮಂದಿರ್‌ಮ ಭೂತ್‌ ಧರಿರಾಖ್ಯುಥೂತೆ ಏಕ್‌ ಅದ್ಮಿ ಆಯು.

²⁴ ಯೋ ಚಿಕ್ರಿನ್, “ನಜ಼ರೇತ್‌ನೊ ಯೇಸು, ಹಮಾರೇಥಿ ತುನ ಶಾತ್‌ ಛಾ಼? ಹಮೂನ ಬರ್ಬಾತ್ ಕರಾನ ಆಯೊಕಿ ಶು? ತು ಕೋಣ್ ಕರಿ ಮನ ಮಾಲುಮ್; ತೂ ದೇವ್‌ನೊ ಪವಿತ್ರ್‌ ಛಿಯ್ಯೊ ಹುಯಿರ‍್ಹೋಸ್” ಕರಿ ಬೋಲ್ಯು.

²⁵ ಯೇಸುನೆ ಯೋ ಭೂತ್‌ನ ಗುರ್‌ಕೈನ್, “ಖ್ಹೊಪ್‌ರ‍್ಹೆ, ಅನ ಮ್ಹೆಂದಿನ್ ಭಾರ್‌ನಿಕಳ್‌” ಕರಿ ಬೋಲ್ಯೊ.

²⁶ ತದೆ ಯೋ ಭೂತ್‍ನೆ ಯೋ ಅದ್ಮಿನ ಧಡಾಶಮರೈನ್, ಜೋ಼ರೇಖ್ಹು ಚಿಕ್ರಿನ್ ಭಾರ್‌ ನಿಕ್ಳಿಗಯು.

²⁷ ಅನ ದೇಖಿನ್‌ ಅದ್ಮಿಖ್ಹಾರು ಆಶ್ಚರ್ಯಖೈನ್, “ಆ ಶಾತ್ ನವಿ ತರ‍್ಹಾಥಿ ಬೋಲಿ ದೇಯಿತೆ? ಯೇಸು ಅದಿಕಾರ್‌ಥಿ ಭೂತ್‌ಅಖ್ಖಾನಬಿ ಹುಕುಮ್‌ ದೇಸ್‌ನಿ, ಭೂತ್‌ ಖ್ಹಾರುಬಿ ಇನಿ ವಾತ್ ಖ್ಹಮ್‌ಜಾ಼ಸ್‌ನಿ!” ಕರಿ ಏಕ್‌ಥಿ ಏಕ್‌ ಬೋಲಿಲಿದು.

²⁸ ಜ಼ಲ್ದೀಸ್‍ಮ ಯೇಸುನಿ ಬಾರೇಮನಿ ಖಬರ್ ಗಲಿಲಾಯ ತಬರ್‌ಖಾನು ಖ್ಹಾರಿ ಬಾಜು಼ಮ ಫೈಲಿಗಯು.

²⁹ ಬಾದ್‌ಮ ಇವ್ಣೆ ಸಬಾಮಂದಿರ್‌ಥ ನಿಕ್ಳಿನ್‌ ಯಾಕೋಬಬಿ ಯೋಹಾನ್ನ ಜೋ಼ಡೆ ಸೀಮೋನ್‍ಬಿ ಅಂದ್ರೆಯನ ಘರ್‌ಕನ ಗಯ.

³⁰ ಹಿಜ್ಜಾ಼ ಸೀಮೋನನಿ ಖ್ಹಾಖ್ಹು ತಾವ್ ಐನ್ ಖ್ಹುತೀಥಿ, ಒಗ್ಗಿಸ್‌ಮ ಇವ್ಣೆ ಇನಿ ಬಾರೇಮ ಯೇಸುನ ಬೋಲ್ಯು.

³¹ ಯೇಸು ಸೀಮೋನನಿ ಖ್ಹಾಖ್ಹುನ ಖನ್ನೆ ಜೈ಼ನ್, ಇನೊ ಹಾತ್ ಧರೀನ್ ಉಠಾಡ್‌ತಾಖ್ಹತರ್‌, ಇನೊ ತಾವ್ ಉತ್ರಿಗಯೊ. ತದೆ ಯೋ ಉಠೀನ್ ಇವ್ಣಿ ಸೇವಾ-ಚಾ಼ಕ್ರಿ ಕರಿ.

³² ದನ್ ಡುಬಾನ ಬಾದ್‌ಮ ಖ್ಹಾಂಜ಼್‍ನು, ಅದ್ಮಿಖ್ಹಾರು ರೋಗ್‌ಮ ರ‍್ಹವಾಳ ಖ್ಹಾರಾನ ಅಜು಼ ಭೂತ್ ಧರಿರಾಖವಾಳ ಖ್ಹಾರಾನ ಯೇಸುಕನ ಲೀನ್ ಆಯು.

³³ ಗಾಮ್‍ ಅಖ್ಖೂಸ್ ಯೋ ಘರ್‌ನ ಬಾಕಲ್‌ನ ಖ್ಹಾಮ್ಣೆ ಭರೈರ‍್ಹೂಥು.

³⁴ ತದೆ ಯೇಸು ಖ್ಹಾರಿ ತರ‍್ಹಾನು ರೋಗ್‍ವಾಳ ಘಣ ಅದ್ಮಿನ ಅಛ್ಛು಼ ಕರ‍್ಯೊ. ಅಜು಼ ಘಣು ಭೂತ್ ಖ್ಹಾರು ಕಾಡ್ಯೊ, ಯೋ ಭೂತ್ ಖ್ಹಾರಾನ ಯೇಸು ಕೋಣ್‌ಕರಿ ಮಾಲುಮ್ ಥು, ಇನಾಖ್ಹಾಜೆ ಯೋ ಭೂತ್ ಖ್ಹಾರಾನ ವಾತ್ ಬೋಲಾದಿದೊಕೊಯ್ನಿ.

³⁵ ಇನ ವ್ಹಾಣೇಸ್ ವೇಳಿ ದನ್ ನಿಕ್ಳಾನ ಅಗಾಡಿ, ಅಂಧಾರು ರ‍್ಹಾವಾನಿಸ್ ವಖ್ಹತ್‌ಮ, ಯೇಸು ಉಠೀನ್ ಘರ್ ಮ್ಹೆಂದಿನ್ ಉಜ್ಜಾ಼ಡಿ ಝ಼ಗೋಪರ್ ಜೈ಼ನ್, ಪ್ರಾರ್ಥನೆ ಕರುಕರ್ತೊಥೊ.

³⁶ ಬಾದ್‌ಮ ಸೀಮೋನ್‍ಬಿ ಇನ ಜೋ಼ಡ್ಮ ರ‍್ಹವಾಳು ಯೇಸುನ ಢೂಂಡ್‌ತುಹುಯಿನ್ ಹಿಜ್ಜಾ಼ ಆಯು.

³⁷ ಹಿಜ್ಜಾ಼ ಯೇಸುನ ಮಳಿನ್, “ಅಖ್ಖುಜ಼ಣು ತುನಾಸ್ ಢೂಂಡುಕರಾಸ್” ಕರಿ ಬೋಲ್ಯು.

³⁸ ತದೆ ಯೇಸುನೆ ಇವ್ಣುನ, “ಅಪ್ಣೆ ಖನ್ನೆ ಛಾ಼ತೆ ಬಿಜ಼ಖ್ಹಾರ ಗಾಮ್‌ನಾಬಿ ಜ಼ಯ್ಯೆ಼. ಹಿಜ್ಜಾ಼ಬಿ ಮೇ ದೇವ್ನಿ ಅಛ್ಛಿ ಖಬರ್‌ನ ಬೋಲ್‌ನು; ಅನಾಸ್‍ಖ್ಹಾಜೆ ಮೇ ಐರ‍್ಹೋಸ್ತೆ” ಕರಿ ಖ್ಹಮ್‌ಜಾ಼ಡ್ಯೊ.

³⁹ ಬಾದ್‌ಮ ಯೇಸು ಗಲಿಲಾಯ ತಬರ್‌ಖಾನು ಖ್ಹಾರಿ ಬಾಜು಼ಮ ಜೈ಼ನ್, ಸಬೆ ಭರಾವಾನು ಮಂದಿರ್‌ಮ ದೇವ್ನಿ ಅಛ್ಛಿ ಖಬರ್‌ನ ಬೋಲ್ತೊಹುಯಿನ್, ಭೂತ್‌ಖ್ಹಾರು ಕಾಡುಕರ್ತೊಥೊ.

⁴⁰ ಖೋಡ್‍ ಲಾಗಿಹುಯು ಏಕ್‌ ಜ಼ಣೊ ಯೇಸುಕನ ಐನ್, ಇನ ಖ್ಹಾಮ್ಣೆ ಢುಕ್‌ಣ್ಯ ಟೇಕಿನ್, “ಮನ ಅಛ್ಛು಼ ಕರಾನ ತಾರೇಥಿ ಹುವಾಸ್, ತುನ ಮನ್ ಉಶೇತೊ ಮನ ಶುದ್ದಿ ಕರೆಜಾ಼ಯ್” ಕರಿ ಗಿಂಗೈಲಿದೊ.

⁴¹ ತದೆ ಯೇಸುನೆ ಇನಾಪರ್ ಘಣು ಗೋರ್‌ಖೈನ್, ಇನ ಹಾತೇಖ್ಹು ಛೀಮಿನ್‌, “ಮನ ಮನ್ ಛಾ಼; ಶುದ್ದಿ ಹೂ” ಕರಿ ಬೋಲ್ಯೊ.

⁴² ಅಮ್ ಬೋಲ್ತಾಸ್‌ನ ಇನು ಖೋಡ್‌ಖ್ಹಾರು ನಿಕ್ಳಿಜೈ಼ನ್, ಯೋ ಪಾಕ್‌ ಹುಯಿಗೊ.

⁴³ ತದೆ ಯೇಸುನೆ ಇನ ಝೇತೈನ್‌, “ಹಂದೇಕ್, ಮೇ ತುನ ಅಛ್ಛು಼ ಕರ‍್ಯೊ ಕರಿ ಕಿನಾಬಿ ನಕೊ ಬೋಲೀಶ್‌; ಕತೋಬಿ ತು ಯಾಜಕಕನ ಜೈ಼ನ್ ತಾರು ಆಂಗ್‌ತನ್‌ ವತಾಳಿನ್ ಮೋಶೇನೆ ಶುದ್ದಿನಖ್ಹಾಜೆ ಹುಕುಮ್‌ ದೀರಾಖ್ಯೋತೆ ಇಮ್‌, ಕಾಣ್ಕೆ ಖ್ಹಾರು ಲೀಜೈ಼ನ್ ದೇ. ಯೋಅಖ್ಖು ಅದ್ಮಿವೋನ ಸಾಕ್ಷಿ ಹುಯಿರ‍್ಹವಾದೆ ಅಮ್ ಕರಿ ಬೋಲಿನ್ ಇನ ಒಗ್ಗಿಸ್ ಮೋಕ್ಲಿದಿದೊ.

⁴⁵ ಕತೋಬಿ ಯೋ ಚ಼ಲ್ಯೂಜೈ಼ನ್, ಯೇಸುನೆ ಇನ ಅಛ್ಛು಼ ಕರ‍್ಯೊ ಕರಿ ಬೋಲಿನ್‌ ಖ್ಹಾರಿ ಬಾಜು಼ಮ ಫೈಲೈನಾಖ್ಯು. ಅನೇಥಿ ಯೇಸು ಬಿಜು಼ ಖೆವ ಗಾಮ್ಮಾಬಿ ಖ್ಹಾರಾನ ದೆಖಾವಾನಿ ಘೋಣಿ ಜಾ಼ವಾನ ಕೋ ಹುಯುನಿ. ಇನಾಖ್ಹಾಜೆ ಯೇಸು ಭಾರ್‌ ಉಜ್ಜಾ಼ಡಿ ಝ಼ಗೋಮ ಜೈ಼ನ್ ಥೊ, ತೋಬಿ ಚಾರ‍್ಹೆ ಆಡಿಥು ಅದ್ಮಿಖ್ಹಾರು ಇನಾಕನ ಅವ್‌ಕರ್ತುಥು.