COLOSSIANS 2

WBT

‹ Chapter 1 COLOSSIANS — All Chapters Chapter 3 ›

1 Aizii õaipan uaitapan na�apam õtiwautinan dadara, õkaminka�uta�azon idi unao, na�iki wunaou�u mishidainao Laodicea iainaouz, na�iki ipai ba�oran mishidainao aona�oraz zii ĩtukapauzon õgaru. 2 �tiwautinan dadara, õma�ozakada�azon idi ipai unao nyukunuu, umarainpaaka kizi umin-mishidannao tuma, na�apa�o ida�an kizi bauda�apa utaapan unyukunuu. �aipan uaitapan kaimanaiman kuwai tawuru�u mashaa�oraz Tominkaru taapauzon kiwiin. Christ daua�o wuru�u kuwaiz. 3 Uruu Christ ida�a�o wuru�u umanawun kida�o aitapaaba-kinai na�iki aitapa-karu ikoda-kaoaz. 4 �kowaadan u�ati kaikapa�a, aonaa kizi pidannao mariidan unao pana�iti�o pakuwaa ida�an, ĩkakuwaapan an kaimanaiman padamata, mishi�o kawan. 5 Mazan karikaonanu�o nii kaina�a õgaru utuma õdoronaa ii, õmunapon pu�u padamata unao ai. Na�iki pakawan õkonaukiitinan õabatan idi kaiman umashaapan bauda�apa utaapan unyukunuu, na�iki õabatan idi ma�ozaka utaapan umishidapan Christ. 6 Aizii unao uzaamatani�i naa Christ Jesus unaobanaa nii, ukau�an kaimana�a naa umashaapa upidanannaoun idi�i naa unao. 7 Ma�ozaka utaapa wuru�u umishidapanuz Christ, na�iki utominpa�a naa kaimanaiman udau�u uikoda kizi uma�ozaka-kinaa nii u�idi�iki, na�apa paoribai ikodan kawan pama�ozaka-kinaa nii pa�ishitaba�u kida di�iki. Pakawan kizi umishidan tuukii wuru�u utominapa-kida-kinaoaz Christ daua�oraz. Karikaonan kizi�i naa “kaiman manawun pugaru” ukian Tominkaru ati ukamunanun idi u�ati. 8 Uzaudinapa pa�i, aonaa kizi pidannao mariidan na�iki zaamatan unao, pakowaadapan ida�an wuru�u pamishidanii kidaz kuwai, pidan di�itinpan kawana�ati kida�oraz karikaonan, na�iki aimaakan kida daua�o, aonaa Christ daua�o mani wuru�u ĩkuwaa kidaz. 9 Christ kaawankan dono imi�i baara ati, pidan nii ukaawan, mazan upu�u Tominkaru mashaapan kaiman-daun uruu ida�a. 10 Na�iki kaimanaimana�ora�a naa Christ mashaapan unao ida�a. Uruu idi aona�a naa kanom unao aipan powa�a. Uruu pa�an wuru�u Naobanaiz manawun, kazowautapa�o ipai umanawun-tinpainao na�iki ma�ozaka-tinpainao naobanainao. 11 Christ mashaapan idi�i naa unao ida�a, na�apa�ora�a naa unao pidannao kawan, kainaabatinainaouznaa Tominkaru ati pachoota-kidan ida�an. Mazan waunao, aonaa ka�ui ida�ana�o mani pa�an wuru�u wakainaabatinanuz, soo Christ pa�an chootanii na�iki uso�otanii wa�ai, wuru�u wakaduz oia�oraz mashaapan wa�ida�a. 12 Pudida-kao kawanu�o Christ tuma wuru�u puchikaawunuu-kaoaz. Na�iki pukadishita-kida-kao kawanu�o utuma, pumishidan idi manawun Tominkaru kadishita-kidan Christ pamawaka-kizi iki pama�ozakan ida�an. 13 Tominkaru tukapan pu�u unao mawaka�o pidan kawan u�oian idi, na�iki umaso�otakan pu�u zii u�ai wuru�u oia�oraz ukaduz, mazan upu�u Tominkaru kadishita-kidan unao mashaapa�o nii Christ tuma. Ukau�an Tominkaru mainaabatani�i naa ipai wa�oian. 14 Ipai umainaabatan saadinpa�o wa�oian, wuru�u pataka�uta-kida�o ni�oraz padamata waunao, ipai utauka-kao cross paawa�a Jesus mawakan dono. 15 Uruu dono�o Tominkaru so�otan ma�ozakatinapa-karu oia�o doronainao ai, naobanai-tinpainao kidaz na�iki ma�ozaka-tinpainao kidaz. Utukapa-kida iriba pidannao ati na�apam pawinian ĩdyaun, Jesus mawakan ida�an cross paawa�a. 16 Ukau�an mana�a ukashaapa�ana�a pidannao kazowautapan unao, unikanii oo utuzanii dau�an, oo ubaokopainpauzon dau�an ipai wunu, oo ubaokopainpauzon dau�an kauzu koraudan dono, oo Sookapa-karu Kamoon dau�an. 17 Uruu kida ida�an ishazaba karikaonan Tominkaru tukapa-kidan Christ wa�ati. Mazan aizii kaimanaimana�a naa Tominkaru tukapa-kidan Christ wa�ati. 18 Mana�a ukashaapina�a naa pidan dyuudan dono usanadinpan na�iki ĩaipan an utoriinpan angelnao ati na�apa ĩnao kawan. Aizii ĩkian an “Tominkaru tukapa-kidanii wa�ati na�apa kida�o dau�an,” mazanu�o karikaonan wuru�u ĩna�apanuz. Aizii usha�apatan an wuru�u ĩsha�apaapanii kidaz, uwaziwaan nii wuru�u Tominkaru kowaadauzoniaz pataa�azon u�ati. Pidannao na�apainao, pabi�inaaka sodi kida ĩdi�itapan aimaakan panyukunuu kawana�ati karikaonan, uruu ida�an tuukii ĩatadinpan. 19 Pidannao na�apainao, aona�a naa ĩaipan Christ pazowaunaa nii. Mazan Christ, uruu mishidainao zowauz manawun, uruu taapa�oraz ĩdyaun baokopa na�iki bauda�apatinapa. Na�apa pidan zowau taapan kawan pananaa, bauda�apatinapa nanai, uaziuzon zaamataaka-kidan idizu. Ukau�an na�apa kapam Christ nanaa, wuru�u mishidainaouz, uzaamatapan idi ĩdyaun, ĩdyaupain kaiman Tominkaru aipan kawana�ati. 20 Aizii unao, mawakainaou�u naa pa�an Christ tuma, na�iki so�ota-kariwai�i naa unao, uizo�atin ai wuru�u toma-kariwai kidaz karikaonan kakinaorii. Mazan upu�u zii mooko uizo�ati�izon wuru�u kakinaorii kidaz, na�apa wunao kawanu�u mamishida-kainaouz? 21 Kaikapa�o wuru�u ĩkakinaotanuz pidannao: “Aonaa puzaamata�ana�a na�apa kida�o aimaakan,” “Aonaa punika�ana�a uruu kaduz wanyukunui,” na�iki “Aonaa pupishata�ana�a na�apa kida�o aimaakan." 22 Aizii wuru�u kaikapa kida�oraz aimaakan sha�apata-kaoa�a, ipai�o nii umainaabatinan ukaiwaa-kao dauna�an. Usha�apanum kau�an paaipan ati�o karikaonan pidannao toman, wuru�u kakinaorii kidaz. 23 Wuru�u na�apa kida�oraz kakinaorii, uabata-kao kaimana�o oo mishi�o kawanu�o. Kaina�a iriba ĩkakinaorinaa toma-kao pidan sha�apatan ni�o, patukapa-kida-kinaa ni�o kaikin pataainan Tominkaru ati. Uruu kakinaorii dyuuda kapam, pidan pataka�utan pananaa, na�iki sanadinapa-karu dadara�o ida�an. Mazan madiwautapa-ka�o karikaonan wuru�u, aonaa na�apa�o ka�iitan pamashaatan pidannao nyukunuu ĩsha�apaapan ai oia�o.

‹ Chapter 1 COLOSSIANS — All Chapters Chapter 3 ›

COLOSSIANS 2

Cite / Share This Page