ZABURU 22

1 To kapalana molaguna. Mboomo lagu: Rusa i wakutuuna raneeo. Zaburuna Daud. 2 E Aulataʼalaku, e Aulataʼalaku, pokia ubholiaku? Pokia upekaridho, inda utulungiaku tee inda uperangoi goraku? 3 E Aulataʼalaku, i wakutuuna eo iaku kudoʼa, maka Ingkoo inda ulawani, tee malo uka iaku kudoʼa, maka o ngangarandaku inda uka awesa. 4 Garaaka Ingkoo Momangkilona, Ingkoo ukokauncuramaka i bhawona manga kapujiana miana Israel. 5 Opu-opuamami aparacaeako. Manga incia aparacaea, to upasalaamatia. 6 Manga incia agora i Ingkoo, kasiimpo upasalaamatia; manga incia aparacaeako, tee inda upekaeaia. 7 Maka iaku sii mboomo ulo-ulo, mencuanamo mboomo maanusia. Manga maanusia ahinaaku tee mia abhari abanciaku. 8 Bhari-bharia mia mokamataaku aele-eleaku. Manga incia angiripiaku, tee alengko-lengkoakaaku bhaana, 9 “Incia atangkaaka KAWASANA OPU sumaimo taroakamo Incia mopabebasia! Taroakamo KAWASANA OPU mopasalaamatia roonamo KAWASANA OPU amaasiakea." 10 Maka Ingkoomo mopalimbaaku minaaka i nuncana kadhuma, tee ujaganiaku i sangoana inaku. 11 Mancuanaku apasarakaakaaku to Ingkoo pepuu minaaka i nuncana kompona. Apepuu minaaka i nuncana kadhumana inaku, Ingkoomo Aulataʼalaku. 12 Bholi upekaridho, roonamo o balaa amakasumo tee inda dhaangia motulungiaku. 13 Abhari o sapi umane molibutiaku, tee gulumana karambau umane minaaka i Basan alibuaku. 14 Manga binata sumai abungkale ngangana pekaewa i aroaku, mboomo singa mopapakina kinandena tee akomburu. 15 Kakaaku mboomo uwe motolali, bhari-bharia bukuku atorambasaka minaaka i losuaku. Ateku mboomo taru, arere i nuncana badaku. 16 Mbalo-mbalona bhorokoku amatuu mboomo kapasana balanga, tee o dhelaku apika i ngaraku. Ingkoo upewauaku mboomo mia mate. 17 Manga mantoa alibutiaku, tee gulumana mia madhaki alibuaku. Manga incia asula limaku tee aeku. 18 Bhari-bharia bukuku amembali kugagaria, manga incia atontoaku tee akamakamataaku. 19 Manga incia apodhawu-dhawuakea o pakeaku sumai, tee aʼundia. 20 Maka Ingkoo e KAWASANA OPU bholi umaridho minaaka i karoku! Ingkoomo mopekatangkana bukuku, umbamo madhei utulungiaku! 21 Rambasakea o inyawaku minaaka i ewanga, tee upasalaamatiaku minaaka i mantoa mopapakiaku. 22 Rambasakaaku minaaka i ngangana singa tee minaaka i tanduna karambau. Ingkoo padhamo upasalaamatiaku. 23 Iaku bhekupetulatulaaka saromu i manga witinaiku, tee i tanga-tangana jamaʼa bhekupuji-pujiko. 24 Pujimo Incia, e manga mia momaekana i KAWASANA OPU! E bhari-bharia siwuluna Yakub, muliangia o KAWASANA OPU! E bhari-bharia siwuluna Israel, sujumo i Incia! 25 Sababuna Incia inda apandaʼente tee ahina o mia motopisaki, tee inda abuniaka rouna minaaka i mia incia sumai, maka aperangoi o mia motopisaki sumai wakutuuna agora aemani tulungi i Incia. 26 Roonamo Ingkoo, iaku kupuji-pujiko i tanga-tangana jamaʼa mobhari sumai, tee iaku bhekupomea tolauna oniku i aroana manga mia momaekana tee Ingkoo. 27 Iaku bhekukemba manga mia misikini mamudhaakana akande sakawana amambosu; mia mopeelona KAWASANA OPU bheapujia; taroakamo manga incia bhari-bharia amarambe o umuruna! 28 Bhari-bharia lipu i dunia bheaudhania tee ambuli apuji kaogesana KAWASANA OPU. Bhari-bharia siwulu minaaka i manga lipu bheasuju tee asomba i aroana 29 roonamo tangkanamo KAWASANA OPU mokopamarintana, Incia moparintana i bhari-bharia lipu. 30 Bhari-bharia mia morangkaea i dunia sii bheasomba tee asuju i Incia. Bhari-bharia maanusia mofanaa bheasuju i aroana. 31 Manga opu-opuana naile itu bheasomba i Incia tee apetulatulaaka KAWASANA OPU i siwuluna bhemoumbana naile itu. 32 Manga incia bheaumba tee apetulatulaaka kabanara i lipu tee siwulu bhemoumbana naile itu ande o KAWASANA OPU aʼadili tee uumatina. Totuumo, Incia padhamo apewau mboo sumai.