ZABURU 27

1 Zaburuna Daud. KAWASANA OPU o kainawa tee kasalaamatiku, tee incema buaka iaku bhekumaeka? KAWASANA OPU o bentena dhadiku, tee incema buaka iaku bhekurengku? 2 Wakutuuna manga parampo aumba alibuaku to akande dagiku, siitumo bhari-bharia bhaliku tee musuku, manga inciamo mosindolina tee momandawuna. 3 Moomini alibuaku rombongana suludadu mobhari, i nuncana ngangarandaku inda kumaeka. Moomini dhaangia tee potimbea to moewangiaku, iaku sadhaadhaa kuparacaea. 4 Tangkanamo saangu iemaniku i KAWASANA OPU, siitumo ipeeluku, mamudhaakana kumboore i nuncana Bhanuana KAWASANA OPU saʼumurua dhadhiku, to kukamataaka kalapena KAWASANA OPU tee kupengkaabha-abha i nuncana Bhanuana Momangkilo. 5 Sababuna i wakutuuna kasukara, KAWASANA OPU bheajaganiaku i tampana peulusana. Incia bheabuniakaaku i nuncana Kemana Momangkilo, tee Incia bheaangkaaku i tampa moʼamani, siitumo i bhawona gunu bhatu. 6 Sumaimo, bhaaku indamo atungku i aroana manga musu molibuaku, tee i nuncana Kemana Momangkilo iaku bhekupasombaaka kurubani isumbele tee kusambo-sambo; iaku bhekulaguaka lagu kapujia to KAWASANA OPU. 7 E KAWASANA OPU, maasangia urangoa o suaraku wakutuuna kugora, maasiakaaku tee ulawaniaku! 8 Totona incaku aose firimanimu, “Maimo umba uʼibaadati i Iaku.” Sumaimo, kulausakamo kuumba to kuʼibaadati, e KAWASANA OPU. 9 Bholi ubuniaka karomu wakutuuna kuʼibaadati i Ingkoo. Bholi inda umaheruakea o bhatuamu sii i nuncana pamurumu. Ingkoomo moagoaku, bholi umendeuaku atawa ubholiaku, e Aulataʼala, mopasalaamatiaku! 10 Moomini amaku tee inaku abholiaku, KAWASANA OPU bheapepagoaku mboomo anana karona. 11 E KAWASANA OPU, adhariakaaku opea ipeelumu, tee ususuakaaku dhala momakate, roonamo bhaliku tee musuku. 12 Bholi upasaraakaaku i nawusuuna bhaliku, roonamo manga sakusii gau-gau akakaromo aewangiaku, siitumo manga mia modhadhina tee feʼeli madhaki. 13 Iaku sadhaadhaa kuparacaea ande iaku bhekukamata kalapena KAWASANA OPU, i lipuna manga mia modhadhi. 14 Antagimo KAWASANA OPU! Pekakaaia tee upekatangkea o incamu! Umbe, antagimo KAWASANA OPU!