ZABURU 3

1 Zaburuna Daud, wakutuu incia apalaiaka karona minaaka i anana mokosarona Absalom. 2 E KAWASANA OPU, abhari mpuu o bhaliku! Abhari mpuu moewangiaku! 3 Abhari o mia mopogauakaaku, “Aulataʼala amendeu atulungia.” Sela 4 Maka Ingkoo, e KAWASANA OPU, satotuuna o katangkesiku mojaganiaku, Ingkoomo mopamembaliaku kutohoromati tee mopadhadhina incaku pendua. 5 Iaku kugora kuemani tulungi i KAWASANA OPU, tee Incia alawaniaku minaaka i gununa momangkilo. Sela 6 Iaku kupotidhole kukole, kasiimpo alipa o mataku, tee kubhangu roonamo KAWASANA OPU motukoaku. 7 Iaku inda kumaeka tee rewu-rewuna musu bhemolibuaku minaaka i bhari-bharia rope. 8 Bhangumo, KAWASANA OPU, tulungiaku e Aulataʼalaku! Umbe, Ingkoo ubhebhe naunauna bhari-bharia musuku, tee upekakatu ngincina manga mia madhaki. 9 Kasalaamati aumba minaaka i KAWASANA OPU. Barakatimu to uumatimu! Sela