ZABURU 30

1 Zaburuna Daud to alaguaka wakutuuna lipuna Israel alimbaisi Bhanua Mangkilo. 2 Iaku kupujiko, e KAWASANA OPU, sababuna Ingkoo padhamo upasalaamatiaku tee inda utaroaka musuku asamboakaaku. 3 E KAWASANA OPU, e Aulataʼalaku, iaku kugora i Ingkoo kuemani tulungi tee Ingkoo mopauntona kapiiku. 4 E KAWASANA OPU Ingkoo padhamo uangkaaku minaaka i alamuna koburu, Ingkoo padhamo upotaangiaka dhadhiku sabutuna iaku inda kusapo i liana koburu. 5 E manga mia mosaalihi, laguakamea manga lagu kapujia to KAWASANA OPU, bhoasakamea o kasukuru to sarona momangkilona. 6 Satotuuna o amarana sabantaramea, maka o kalapena saʼumurua. Moomini tatangi samaloa, maka i wakutuuna saeona bhetakaunde-undemo. 7 Roonamo kumasanaa, kupogau, “Dhadhiku bheaʼamani torosu!" 8 E KAWASANA OPU, roonamo kalapena incamu, Upamembaliaku mboomo gunu momatangka. Maka wakutuuna ubuniaka roumu, iaku kumaeka. 9 I Ingkoo iaku kugora, e KAWASANA OPU, tee i Aulataʼala kuemani kaasi, 10 “Opea o faʼedana to Ingkoo ande amabhotu inyawaku tee kupesua i nuncana koburu? Amembali buaka o ngawu asukuru i Ingkoo tee apakoleleaka ande Ingkoo umembali utoparacaea? 11 E KAWASANA OPU, maasangia urangoa tee umaasiakaaku. E KAWASANA OPU, tulungiaku!" 12 Tangiku ubhaliia amembali manari kaunde-unde, kae kadhu tandana kaporona incaku ualea, tee o tangaku ubhokeakea tee kasanaa. 13 Sabutuna kumembali kulaguaka lagu kapujia to Ingkoo tee inda soo kukatongo-tongo. E KAWASANA OPU, e Aulataʼalaku, iaku gauku kusukuru i Ingkoo to saʼumurua.